Read Te B'aib'ara Te Minita 5 Bible Online

Te Minita 5 - Te B'aib'ara bible

Te Minita 5

¹Taratara raoi n te b'ai ae ko karaoia ngkana ko rin n ana Tembora te Atua. Iai tabeman aomata aika a nanobaba aika a nako ikekei n angakarea, e ngae ngkana bon akea aia bure. [12] Ma e raoiroi riki ngkana ko ti kakauongo ngkana ko nako n taromauri.

²Ko na iango i m'aain ae ko taetae ke karaua raoi ni iangoia i m'aain ae ko karaoi am berita nakon te Atua. E mena te Atua i karawa, ao ngkoe ko mena i aon te aonnaba, ma ngaia ae, tai rangi ni b'arantiko.

³Ngkana ko kateimatoa iangoan te b'ai teuana, ao ane ko na miiakinna. Ngkana ko rangi ni b'arantiko ao ane e na bure te b'ai ae ko taekinna.

⁴Te Atua e aki tangiriia aomata aika a nanobaba. Ma ngaia ae, ko na aki waeremwe ni kakoroa bukin am taeka ni berita nakon te Atua.

⁵E raoiroi riki ngkana ko bon aki karaoa te berita, nakon ae ko karaoa te berita teuana ao ko aki kakoroa bukina.

⁶Ke e tai karekeko wiim n te kaangaanga! Ao ko na aki kaangai nakon te tia kaira te taromauri, “Kai I bon taetae ni manikangare.” E konaa te Atua ni kamaunai am b'ai ni kabane aika ko a tia ni karekei n am m'akuri, ma ngaia ae, ko na aki taekina te b'ai teuana ae e na un iai te Atua.

⁷Karinea ao ongotaeka iroun te Atua! E na kairiko te iango ni mii nakon taetae aika akea nanoia. [13]

⁸Ko na aki kubanako ngkana a kabuakakaaki aomata aika a maiu ni kainano i aon abam, ao e na oneaki mwiin te eti n te kaairua. A na riai ni karaoa te b'ai are a tuangaki mataniwi aika a rinano irouia ake a rietaata.

⁹I bukina ngke te kabanea n rietaata ni mataniwi te uea, ao e m'aiti riki tib'angana man te taekiti are e kab'akaaki man te aba. [14]

¹⁰Ngkana ko tangira te m'ane ma te kaub'ai, ao ko na bon aki konaa n rauaki ni b'aai akana iroum. Bon akea naba nanon aei.

¹¹M'aitin am b'ai, boni m'aitin naba ae a kaantaningaia aomata nako mairoum. Bon akea te b'ai ae e raoiroi ae e na anganiko am m'ane—ane a na kabanea tem'angina i bukim.

¹²Ngkana ko m'akuri korakora i bukin maium, ao ko na boni motirawa raoi n te tairiki, e ngae ngke e aki rangi n tau m'aitin kanam. Ma ngkana ko kaub'ai, ao ane ko na aki konaa ni matu raoi.

¹³I a tia n noora te b'ai ae e rangi ni kaairua. A kaub'ai aomata, ma bon akea raoiroina nakoia.

¹⁴Ao ane a na karina ni bua b'aai ni kabane ake a karekei man te anga n iokinib'ai ae e buakaka, ao ane e na akea ae e na tiku i bukiia natiia.

¹⁵A roko nakon te aonnaba ni bebeekan, a na mate, ao a na bebeekan naba. Bon akea te b'ai ae a konaa ni uotia nako, ao akea naba te b'ai ae a na konaa ni kaotia i bukin aia m'akuri ni kabane.

¹⁶Anne bon te b'ai ae e rangi ni kaairua. A kiitana te aonnaba n aron are a moan roko naba iai. Bon akea te b'ai ae a karekea i mwiin kakiokioan te ang.

¹⁷I rarikin aikai, ao a aki toki n am'aam'arake n te roo, a aki rau, a aoraki ao a un. [15]

¹⁸Tera te b'ai ae e rangi ni kakaawaki ae e riai ni karaoaki n te maiu ae e rangi ni uarereke ae e anganiira te Atua? I taku b'a ti riai ni kukurei n te am'aam'arake, te momooi, ao te m'akuri korakora.

¹⁹Iangoia b'a aongkoa ko a rangi ni kaub'ai, ao ko a kukurei n am b'ai nako. I mwiina, waakinako ao kakukureiko n te m'akuri ae e rawaawata-bon aei ana b'aintangira te Atua nakoim.

²⁰E na kateimatoa kukureim ae moan te bati te Atua, n te aro are ko na m'aninga iai raraoman nanom ni boong nako.