Read Te B'aib'ara Te Minita 7 Bible Online

Te Minita 7 - Te B'aib'ara bible

Te Minita 7

¹E raoiroi riki te atoatongaki ae e raoiroi n tain te mate nakon te tangira are e tararuaaki iai i nanon tain te bungiaki.

²E raoiroi riki irakin te bootaki n taunimate nakon irakin te baka n am'arake, a kauringiira taian taunimate b'a ti na manga boni bane naba ni mate.

³Rinea riki te nanokawaki nakon te ngare i bukina b'a e karabaa te nano ae e kukurei te mata n nanokawaki.

⁴A tang aomata aika a iangoraoi ma a aki toki ni ngare aomata aika a nanobaba.

⁵E raoiroi riki te kaetaki mani b'anaan ae e wanawana nakon te tabekaki ni b'anaan ae e nanobaba.

⁶Kangare aika a bubuaka bon te m'akuri n nanoroo. Kaanga ai aron tangin kaai aika iai ingiia ngkana a toorara i nanon te ai.

⁷E kananobabaia aomata aika a iangoraoi te uruaki n nano, [18] ao e konaa ni burimauniiko te kamaraato.

⁸E raoiroi riki te b'ai ae e a tia nakon te b'ai ae e a tib'a karaoaki; e raoiroi riki te taotaonaki n nano nakon te kainikatonga ae e korakora.

⁹A kakai un aomata aika a nanobaba ao a teimatoa buakakan nanoia.

¹⁰E aki wanawana te titiraki ae e kaangai, “E aera ngkai a rangi n nakobuaka b'aai ngkai nakon aroia ake mai m'aaina?”

¹¹E raoiroi riki te wanawana nakon te aomata ae te tia onomwi ni b'aib'ai.

¹²E kaawakiniko te rabakau n ai aron te m'ane; e na kairiko nakon te maiu te ataib'ai ma te iango raoi.

¹³Iangoi b'aai aika e a tia ni karaoi te Atua! Ngkana arona b'a e kab'aouai b'aai te Atua, ko konaa ni manga kaeti?

¹⁴Ko na rangi ni kukurei ngkana a nakoraoi taai, Ko na iango b'a tera bukina ngkai a roko taai aika a buakaka. E karikii te Atua ni kauoua b'a ti aonga n ataia b'a tera ae e na manga riki i mwiina.

¹⁵I a tia n noori b'aai ni kabane i nanoni maiu ae akea manena aei. I a tia n nooriia kaain te kaawa aika a mate i bukin karaoan te eti, ao I a tia n nooriia taani bure aika a maiu ni karokoa karaia.

¹⁶Ma ngaia are, ko na aki tiringko ni karaoan ae e rangi n raoiroi ke n rangi n tim'aati!

¹⁷Ko na tai mate i m'aain am tai ti i bukin karaoan ae e buakaka, ke karaoan m'akuri n nanobaba.

¹⁸Kateimatoako i nuukan te kawai. Ko konaa ni karaoa aei ngkana ko karinea te Atua.

¹⁹E na kakorakorako riki te wanawana nakoia taani kairiiri aika tengaun aika a korakora i nanon am kaawa ae e buubura.

²⁰Bon akea n te aonnaba aei ae e kaakaraoa te eti n taai nako.

²¹Ko na aki ongora nakon b'aai ni kabane aika a taekin aomata nako, b'a ko kaawa n ongo kamaraiaam iroun am toro.

²²Ko bon tuai kaakamaraiaiia koraki aika a bati?

²³Ao I taku i boni inanou b'a N na tim'aati ao N na kataia n atai b'aai ni kabane aikai, ma e rangi n ri aon ae I konaa.

²⁴E korakora riki te koaua nakoira. E rangi n nano.

²⁵Ma ngaia are, I a iangoia b'a N na neneri aron b'aai ni kabane, b'a I aonga ni wanawana raoi ni kunea aron ma bukin te maiu. Ao n te tai naba anne, ao I tangiria n ataia b'a e aera ngkai e kananoroo ao ni kakeaa te iango te riki n nanobaba ae e buakaka.

²⁶Aei mwiin te b'ai ae I kunea: E buakaka riki te aine ae e kam'araa nakon te mate. Bon te b'ai ni kam'ane ngaia, ae e kaaenakoa rab'atana ma nanona n raweiko. Ma ngkana ko ongotaeka iroun te Atua, ao ko na konaa ni biri nako mai rouna. Ngkana ko aki ongotaeka, ao e a tia ikanne.

²⁷I kataia n neneri n wanawanau aron b'aai nako b'a a kangaa n tomatoma raoi,

²⁸ma e aki te roko n reke irou. I ti ataia b'a iai ti temanna te aomata ae e raoiroi i buakoia tengaa, ma I tuai ma ni kunea te aine ae e raoiroi.

²⁹Iai te b'ai teuana ae I ataia: Ti rangi n raoiroi ngkoa ngke e moan karikiira te Atua, ma ngkai a tia ni b'aoua ara iango.