Read Te B'aib'ara Te Minita 8 Bible Online

Te Minita 8 - Te B'aib'ara bible

Te Minita 8

¹Antai ae e tim'aati ni konaa ni kab'arab'arai b'aai ni kabane? E kaungaa nanom te wanawana ao e anganiko te matangare.

²Ngkana ko berita nakon te Atua b'a ko na kakaonimaki nakon te uea, ao I tuangko b'a ko na riai ni kakoroa raoi nanon am berita.

³Ko na tai waetata ni kaaitaraa te uea ke ni kauntaeka ma ngaia, ngkana e karaoa ana babaaire.

⁴Bon te tua ana taeka te Uea. Akea ae e konaa n titirakinna ni kaangai, “E aera ngkai ko karaoa aei?”

⁵Ko na aki reereke n te kaangaanga ngkana ko ongotaeka iroun te uea. Ma ngaia are, ko na tim'aati, ao reireiniko arom ae ko riai ni karaoia, ao karaoia.

⁶E matoatoa te maiu, ma bon iai tain ao nnen b'aai ni kabane,

⁷e ngae ngke bon akea ae e konaa n taekin kanoani boong aika a na roko.

⁸Ti aki konaa n tautaekana te ang [19] ke ni baairea ara bong ni mate. Bon akea ae e konaa ni biri nako mani boong ni buaka, ao akea naba ae e konaa ni karabaa i akuun te buakaka.

⁹I noori baikai ni kabane ao I karawaawata iangoaia b'a ai tera ae e riki n te aonnaba aei. E aera ngkai iai tem'angina aika iai m'aakaia ni kaikoakia tem'angina?

¹⁰I noora te aomata ae e buakaka ae e taunaki ma te karineaki, ma a kiitana te kaawa ae e tabu ana Aomata te Atua, ao e m'aninga te aba taekaia. [20] Bon akea nanon b'aai aikai ni kabane.

¹¹Ngkana ti nooriia aomata aika buure ma buakaka b'a a teimatoa ni kaakaraoa te bure ao a aki katuaaeaki, ao e na kairiira b'a ti na kani kaakaraoa naba te bure.

¹²A karaoi buure aika tebubua m'aitiia, ao a maiu ni karokoa karaia, ao a aki reke n te taeka n rabakau are e kaangai: A na teetekeraoi aomata nako aika a maiuakina te raoiroi ao a karinea te Atua,

¹³ma bon akea ae e bure man tannako mairoun te Atua ae e na teetekeraoi ke n anaanau maiuna.

¹⁴Bon iai te b'ai teuana ae akea nanona irou. Kaain te aba aika raraoi a karaoaki b'a kaanga buure ma buakaka, ao buure ma buakaka a karineaki b'a kaanga kaain te aba aika a raoiroi.

¹⁵Ma ngaia are, I iangoia b'a ti na karekei ara b'ai man te maiu n aron are ti konaa ni karekei. Bon akea riki te b'ai ae e raoiroi nakon ae te kakukureira ni kanara ao nimara ao reken te tai ae e raoiroi. Ao n te aro anne, ti na konaa iai n ri nanon kangaangan te maiu, n aron are e a tia n anganiira te Atua n te aonnaba aei.

¹⁶I aki mamatu ni bong ao ni ngaina, b'a I kan ataia b'a tera ae e riki ngkai n te aonnaba aei.

¹⁷I noori b'aai ni kabane aika e karaoi te Atua, ao I a ataia b'a bon akea temanna ae e konaa n atai aroia. Ti konaa n rangi ni wanawana, ma bon akea boonganana b'a tao m'aitira ara tai ni kataia, ke n taekinna b'a ti ataia, ma ti bon aki atai b'aai n aroia ni kabane.