Read Te B'aib'ara Ana Anene Toromon 2 Bible Online

Ana Anene Toromon 2 - Te B'aib'ara bible

Ana Anene Toromon 2

¹Bon te rooti ngai man te aba are Tiaron, kiebun te m'arua.

²Raou ae e tangiriko, ngkana ko kabootauaki ma ataeinaine ake tekorakina, ao bon te kiebu ngkoe i buakon kaai aika a kateketeke.

³Ao ngkoe, au tangira, bon te kai ae te aaboro i buakon kain te buakonikai. E anganai te kukurei nuum; ao a karewerewe uaam.

⁴Ko kairai nakon am ru i bukin am baka n am'arake ao ko kab'aroa am tangira.

⁵Karina angiu ao kakorakoraai n taian kam'au ni kureebe ao taian aboro. I b'arua te tangira!

⁶Kawenea baim te maing i aan atuu ao rab'atai ni baim are te atai.

⁷Ataeinainen Ierutarem, kam na berita nako iu ni m'aakan te ria ma te anterobe [4] b'a e na aki kautaki te tangira i m'aain tauraoina.

⁸I ongo b'anaan te aomata ae I tangiria, ngke e tabe n eweewe i aoni maunga ma tabuki

⁹kaanga te ria ke te anterobe. Ao ngkai e a tei i tinanikun ara oo, ni kaninganinga man te winto

¹⁰man taetae nako iu. Raou ae e tangiraki, I tangiriko! Ti a airi n nako.

¹¹E a toki tain te kam'aitoro, e a tia n toki te karau;

¹²a rabuna aon te aba taiani uee, bon tain te anene. [5] E ongo te aba b'anaaia taian taobe i abara.

¹³A uaa taian biiku, ngkai a uee taiani kureebe ae a kianako boia i nanon te ang. Raou ae e tangiraki, I tangiriko! Ti a airi nako.

¹⁴Bon au taobe ngkoe ae raba i buakon taiani b'a i rarikin katatin te aba. Kariaia b'a N na noora kanikanim! Kariaia b'a N na ongo b'anaam ae e tangiraoi.

¹⁵A uee ara kureebe; ti na riai n rawei taiani kameanti aika a uarereke aika a aki toki n tiring arokara kureebe.

¹⁶Raou ae e tangiraki, Am b'ai ngai, ao au b'ai ngkoe, ngkai ko kaam'arakeia am tiibu i buakon taiani kiebu.

¹⁷Kaanga aongkoa te ria te teei ngkoe ae e m'am'aie i aon raabeen nako te maunga [6] ni karokoa rokon te ngaina ma ni mauna nako te roo.