Read Te B'aib'ara Ana Anene Toromon 5 Bible Online

Ana Anene Toromon 5 - Te B'aib'ara bible

Ana Anene Toromon 5

¹Au kainrou, ae bon ti au b'ai, I roko nakon au nnenaroka ao I kukurei ni boiararana. I kang kanau ake ngaon ao ana karewe te manibeeru; ao I nima nimau are te wain ao te miriki. Am'arake ao mooi ni karokoa kam a manging n te tangira.

²I boni matu, ao I mii: E tei teuare I tangiria i matan te mataroa, e karebwerebwe ao e taku, “Raou ae e tangiraki, ae bon ti au b'ai au taobe ae akea waewaeana, kauka te mataroa nako iu! E a makuna atuu n aoin te tairiki.”

³Ma I a kaman tia ni buuti au kunnikai ao n teboki waeu. N nang manga karin au kunnikai mani kabaarekai waeu?

⁴Ao e kaaenakoa baina raou ae e tangiraki b'a e na kanakoa rokan te mataroa, ao I kaantaninga inanou.

⁵Ngke I teirake b'a N na kauka te mataroa, ao e a waawaanako te boiarara mani baiu ao tabonibaiu.

⁶E kaantaninga nanou ngke e taetae nako iu, ma ngke I kauka te mataroa, ao e karina ni bua raou ae e tangiraki. I kakaaea ao I takaarua, ma e aki roko n te reke irou bon akea te kaeka.

⁷Ao I a kuneaki irouia taan tei ake a teiakina te kaawa ma n teiakina naba oon te kaawa. A kataereai ao a buta niiniirau.

⁸Ataeinainen Ierutarem, ngkana kam noora teuare I tangiria, ao I butingkami b'a kam na kaangai nakoina, “E a mamaara i bukin b'aruam.”

⁹Kabanean tikiraoia aine, e aera ngkai e rangi n raka iroum aron teuare ko tangiria ma m'aane nako? E aera ngkai ko buubutiira b'a ti na kaongoa arom?

¹⁰E botonim'aane ao e marurung, te kabanea n rianako arona mai buakoia tebwina te ngaa.

¹¹Te koora ni koaua atuuna; e m'aototo irana, ao e rooro kaanga te reeben.

¹²Ti te bo matana ake uoua ma reeben aika uoman aika a tebotebo n te raanga n ran ae e raanga ma te miriki. [10]

¹³Bon te nnenaroka ubuna ae e boiarara ni b'aai ni kaboiarara; taiani kiebu riana aika e timtim mai iai te boiarara.

¹⁴Anganibaina bon taiani m'aanga aika koora aika a rabunaki n taiani b'ai ni katamaroa; rab'atana bon koron te ereb'anti [11] ae katamaroaaki n taian tabeiro.

¹⁵Ti te bo rangana ma taian boua aika maabora i aon raurau ni wae aika koora. E tei ikekei ni karineaki kaanga te Maunga are Reb'anon ma arokana kaai aika tiira aika a rineaki.

¹⁶E karewerewe ana kiiti. I rangi ririkanaia! Ataeinainen Ierutarem, bon au tangira ao raoraou.