Read Te B'aib'ara Ana Anene Toromon 6 Bible Online

Ana Anene Toromon 6 - Te B'aib'ara bible

Ana Anene Toromon 6

¹Te kabanea n tamaroa n aine, tuangiira b'a e nakea teuarei. Kariaia b'a ti na buokiko ni kakaaea.

²E a tia n nako raou ae e tangiraki nakon ana nnenaroka ni b'ai ni kaboiarara, ike e na kaam'arakeia iai ana tiibu man rikoi taian kiebu.

³Bon ana b'ai ngai, ao au b'ai ngaia, ngke e tabe ni kaam'arakeia ana tiibu i buakon taian kiebu.

⁴Raou ae ko rangi n tangiraki, a aki tamaroa riki nakoim kaawa aika Tireta ao Ierutarem. A m'aaka riki am tabunea nakon taiani itoi ni kabane ake i karawa. [12]

⁵Katan nakoi matam b'a I a rannako iai. A tiotio iran atuum kaanga kakateken te kooti ae e nakomai mai Kireata.

⁶A mainaina riki wiim nakon te tiibu ae e a tib'a tia n tebokaki; a tab'anin raoi akea teuana ae e waraa.

⁷A raba i aan rabunan matam tabam aika tamaroan taian rooti. [13]

⁸Tera ngke I konaa ni karekeia onongaun ueanaine, waningaun buu, ao tengaa riki aine tabem'aang!

⁹Bon ti ngkoe au rinerine, au taobe ae akea waewaeam, te nati ae e mamate nanon tinana i rouna. A taekina kim'areireim ateiaine, ueanaine ao tabem'aang riki ngkana a anenea neboam:

¹⁰“Ko karineaki kaanga tanimainikun karawa n te ingabong ko mimitong kaanga nam'akaina are e katekei matara kaanga taai! A m'aaka riki am tabunea nakon taian itoi ni kabane aika i eta.”[14]

¹¹I ruorikaaki n nooria b'a a uee kaai aika akota, taiani kureebe, ao kai n am'arake.

¹²N au iango I karina n toka i aon te kaanibuaka ae e mimitong. [15]

¹³M'aie! M'aie! Te botonaine mai Turam, ti na noora m'aieem! E aera ngkai kam kan noora ainen Turam aei ngkana e ruoia ma tem'angina? [16]