Read Te B'aib'ara Ana Anene Toromon 7 Bible Online

Ana Anene Toromon 7 - Te B'aib'ara bible

Ana Anene Toromon 7

¹Bon te natinuea te aine ngkoe, ao a kakateke waem i nanon am kau. Boton rangam bon ana m'akuri te tia karaob'ai ae e tabonibai, aika te naan tirewa ni kauaai;

²Butom bon te kiraati ni wain ae e taonako kanoana. E buabuaki raoi rab'atam ao e beebete taraam kaanga te b'ariko ni uita aika a kabaeaki n taiani kiebu.

³Ti te bo mmamam ma taian ria aika taiani bwebwee.

⁴Ti te bo roroam ma te aiwere, ao a kiakia matam kaanga taian nei ake i Etibon i rarikin mataroan Bata-Rabim. E tamaroa b'airim kaanga te Maunga are Reb'anon are i aon te kaawa are Tamateko.

⁵E rietaata atuum kaanga te Maunga are Karemera; e rangi ni kantara iran atuum ao e a taenikai te uea iai. [17]

⁶Ko botonaine, ko rangi ni b'arub'aruaki!

⁷Ko irariki n ab'ab'aki kaanga te kai te baam, ao a buabuaaki raoi mammam.

⁸N na tam'arakea te aroka anne ma n toka n taui m'aangana nako. Ao n na kunea b'a ngaia bon taiani b'ariko ni kureebe mammam, ao boiararan te aboro ikeikem.

⁹E rangi ni karewerewe riki te kiiti ma ngkoe nakon nimakin te kabanea n tamaroa ni wain. Ai tamaroara ao ai kangkangira! [18]

¹⁰Raou ae e tangiraki, am b'ai ngai, ao ko b'aruai.

¹¹Ti a nako n nakonako i nanon taian tawaana ma ni matu n taiani kaawa aika a uarereke.

¹²Ao ti na utinako n te kaarangaina n noori kureebe ao kainam'arake ngkana tao a uee. N na anganiko au tangira, ngkana ti roko ikekei.

¹³Raou ae e tangiraki, e kaonaki te ang ni boiararan te uee ae e m'aaka. [19] I a tia ni kaawakin i bukim aekaki n uaanikai nako aika a kangkang i matan ara mataroa.