Read Te B'aib'ara Itaia 11 Bible Online

Itaia 11 - Te B'aib'ara bible

Itaia 11

¹Kaanga te m'aanga ae e bwebwerake man te boto, ao ai aron naba temanna ae e na nako man ana utu Tawita [46] are e na uea n te bong teuana.

²E na meemena taamnein te UEA i rouna n anganna te ataib'ai, te rabakau, ao te wanawana. E na korakora, ao e na ataa te UEA ma ni karinea.

³E rangi ni kukurei n ongotaeka iroun te UEA. E na aki motikitaeka ti n te b'ai ae e nooria ke n taian maningongoo.

⁴E na karaoaki raoi te eti ma te riai nakoia aomata aika a maiu ni kainano ao a tangira buokaia. Ana riki ana taeka b'a taian tua i aon te aba ni kabutaa, ao a na bane n tiringaki taani bure.

⁵Ana niiniira ni uea bon te raoiroi ma te riai.

⁶A na kaai ni wene taian reeb'ari ma taiani kooti, ao a na kaai ni katoki kuaia taiani kamea anti ma taian tiibu te teei. A na kaai n am'arake taian kao te teei ma taian raian ao a na kaawakinaki irouia ataei aika a uarereke.

⁷A na kaai n am'arake n aia uteute ae ti teuana taiani kao ma taiani bea; ao a na kaai ni wene ni katoki kuaia buniia. a na kaai ni kana te uteute taian raian ma taian kao.

⁸A na takaakaro ataei i rarikin b'angaia taian naeta. A na karin baiia i nanon b'angaia taian naeta aika a rangi ni boitin ao a na aki ikoaki.

⁹Akea te kabuanib'ai ae e na konaa n riki i aon ana Maunga ae e tabu te UEA. Aron te ran ngkai ae kaona taari ao ai aron naba te aba b'a e na kaonaki irouia aomata antai ae e ataa ma ni karinea te UEA.

¹⁰E na roko te tai are e na anga iai te kanikina nakoia aomatan te botannaomata b'a a na ikotaki. A na iri ana kaetieti, ao a na tanoata taekaia ake bon oin ana botannaomata.

¹¹Ngkana e roko te bong arei, ao e na manga arora baina ae e m'aaka te UEA ni kaokiia ana Aomata nakoni mwengaia ake taian nikira ni maiu mai Aturia, Aikubita, Bateroti, Itiobia, [47] Eeram, Tina. Amata, ao te aba are i mataniwiin taari.

¹²E na anga ana kanikina nakoia botannaomata akanne, ao e na manga ikotiia taan rawei maiuia mai Iuta, ake a tia ni uamaae nako i aon te aonnaba ni kabutaa.

¹³E na aki manga bakantang Iteraera iroun Iuta, ao e na aki manga riki Iuta b'a a na kairiribai Iteraera.

¹⁴Ma a nang ikoikotaki ni buakana Biritia i maeao. Ao i mwiina, a na kataenikaia kaain Etom, kaain Moaaba, ao kaain Ammon ake i mainiku. A na tautaekaniia aomata aikai ma n anai mairouia b'aai ake a tangiri.

¹⁵E na kam'autereterea m'aangan Taari are Uraura te UEA are i rarikin Aikubita, [48] ao e na kanakoa te ang ae e kabuebue b'a e na bwenaua te Karaanga are Iuberetiti nakon itiua m'aangana aika a konaa n nakonako i nuukana aomata.

¹⁶Ao e na karekea te kawai ae e tamaroa mai Aturia i bukiia ana aomata ake nikira ni maiu, n aron te kawai naba ae e tamaroa ngkoa i bukiia aia bakatibu ngke a kiitana Aikubita.