Read Te B'aib'ara Itaia 19 Bible Online

Itaia 19 - Te B'aib'ara bible

Itaia 19

¹Aio rongorongon Aikubita: E roko te UEA mai Aikubita, n toka i aon te nang. A aki konab'ai aomata i bukin maakuia. A rurubenebene aia bouannanti ngke e roko man taku,

²“N na katuaaea Aikubita n taiani buaka n nanoaa ane a na buaka i bon irouia aaba ma ake i rarikiia, kaawa ma kaawa, ao taian abanuea n tatabeua nako.

³“E na anaaki ninikorian Aikubita ngkana I kamangaoi aia babaaire nako. Ane a na kataia n titirakiniia aia bouannanti b'a tera ae a riai ni karaoia, ao mairouia tamneia ake a tia ni mate, ao mairouia naba taani kaiwa.

⁴N na kaakiia kaain Aikubita i aani m'aakan te uea ae e iowawa ae akea ana Tangira. I a tia ni berita n aei Ngai ae te UEA ae Moan te M'aaka.”

⁵Ane e na m'autakataka te Karaanga are te Naire ao e na riki b'a te aba ae e mate te tano.

⁶Ane a na m'aung karaangana ake a uarereke, E na akea te ran i Aikubita, ao ane a na rai taiani maunei ma tain uteute ake a ab'ab'aki.

⁷Ane a na rereua taian tawaana ni kabane ake i mataniwiin te Naire; ao a na bane ni mauna nako taian aroka.

⁸Ane a na b'ara nanoia akana a akawa i nanon te Naire ao a na tang.

⁹A na aki ataa te b'ai ae a na karaoia taani karaokunnikai [72] ao a na rai mataia.

¹⁰Ane a na mangaongao taan raranga kunnikai; ane a na nanokawaki man tang taani m'akuri ake a kabooaki.

¹¹Burababaia i bon irouia ana mataniwi uean Toan [73] ma aia taeka n reirei aika a nanobaba. A na kangaa ni kaangai nakoina. “Ti rangi ni wanawana, ao a oki rikaaki nakoia uea ara utu ni boong ake ngkoa?”

¹²A ngaa ngkai m'aane aika a rabakau aikai? ngkana a konaa, ao ke a taekinna b'a tera ae e iangoia te UEA ae Moan te M'aaka i bukin Aikubita.

¹³A burababa ao a kam'aam'ane ana mataniwi te uea i Toan ao i Membiti. A tia n anga aia kaetieti aika a buakaka nakoia botannaomata taani kairiiri n tautaeka nako.

¹⁴E a tia te UEA ni kamangaongaoa Aikubita; a tia taani kairiiri ni karaai waena ao ni kamumutaa kaanga te koro ni manging.

¹⁵Bon akea temanna mai Aikubita ae e konaa ni karaoa te b'ai teuana, e aoria ngke antai ngaiia.

¹⁶Ngkana e katuaaea Aikubita te UEA ae Moan te M'aaka ni baina ae e korakora, ao a na bon rangi ni mamaara kaain Aikubita ao a na ruru ni maaku.

¹⁷A na rangi ni maaku i Iuta n te aro are a rootaki naba n te maaku ti ngkana a ongo arana. E na riki i bukin te b'ai are e na karaoia te UEA ni kaaitaraa Aikubita.

¹⁸E a roko te tai are e na taetae te aba iai n Ebera ni kaawan Aikubita ake nimaua, ao a na riki kaaina b'a taan onimakina te UEA. E na aranaki kaawana teuana b'a kaawan Taai.[74]

¹⁹E na kateaki te baonikarea i bukin te UEA i nuukan Aikubita; ao e na kateaki te baangota i bukin karineana i aon tian te aba.

²⁰Aio are e na kauringiia kaain Aikubita ae e meemena irouia te UEA ae Moan te M'aaka. Ao a na buubutiia buokaia ngkana a reke n te kaangaanga, ao e na kanakoa temanna b'a e na kamaiuia mairouia aia kairiribai.

²¹E na kaotia te UEA nakoia kaain Aikubita b'a antai Ngaia, ao ane a na ataia ao a na taromauriia te UEA. Ane a na uoti aia karea ma taian angab'ai nakoina, ao ane a na kakoroa nanon aia berita nakoina.

²²Ane a na rairaki aomata nakoina, ngkana e a tia te UEA ni katuaaea Aikubita. Ao i mwiina, e na kaekaa aia tataro, ao a na kamaiuaki kaain Aikubita.

²³Ane e na iai te kawai ae e raoiroi ae e biri mai Aikubita nako Aturia. Ane a na m'am'ananga iai kaain Aikubita ma kaain Aturia mai Aikubita nako Aturia, ao a na kaai n taromauri.

²⁴E na ikotaki Iteraera ma aaba aika uoua aikai. Ane a na riki b'a b'aai ni kakab'aia nakoia kaain aonnaba ni kabane,

²⁵Ao i mwiina anne, e na kakab'aiaia te UEA ae Moan te M'aaka ni kaangai, “Bon au aomata kaain Aikubita. I karikiia kaain Aturia ao I rineia Iteraera.”