Read Te B'aib'ara Itaia 24 Bible Online

Itaia 24 - Te B'aib'ara bible

Itaia 24

¹E nang minota te aonnaba te UEA n urua teina ma n onikia nakon te rereua. A na bane ni maae nako aomata nako,

²n reitaki ma ake bon aomata ao taiani ibonga, tooro ao tooro ake aia taani m'akuri taani b'aib'ai, taani kaboob'ai ao taani kabonako b'aai, taani kairiiri ao taan tangob'ai, kaub'ai ao ake a maiu ni kainano.

³E na kanakoaki ni kakeaaki te aonnaba ao e na tiku n aron anne. Bon anne ana berita te UEA.

⁴E a bane tain te aonnaba; a na mauna nako ana taani kairiiri n riki n akea manenaia. [106]

⁵E a kam'araa te aonnaba i bukiia aomatana aika a aki ongotaeka nakon ana tua nako te Atua, ma n urui aia booraraoi are akea tokiia.

⁶E a b'akaraki te aonnaba n te maraia; a mate aomatana i bukin aia bure.

⁷A m'autakataka taian nne n aroka ni kureebe: a kani bane n akea taian aroka kureebe e ongo te aba taian tang n onei mwiin taian takaakaa ni kukurei.

⁸Bon akea ae e manga katanga taian timbere ke b'aai n katangitang aika taian karai; a bane n toki taian karongoaa ni kukurei.

⁹A aki manga anene ngkana a mooi n te wain, ao e a maai i nanon te wii.

¹⁰A onrake ma ni mangaongao taiani kaawa; ao a rokanaki ni kamatoaaki taian auti.

¹¹A mauna nako taai ni kukurei man te aonnaba, ao a takaarua aomata ni kawain nako te kaawa ni kaangai, “E a bane ara wain!”

¹²A uruakaki taiani kaawa aika a buubura; ao a kamaaenikunaki ni kab'akaaki mataroan taiani kaawa.

¹³A na taekaki nako botannaomata kaanga taian kai aika oriwa ke nne n aroka ni kureebe i mwiin te bong n tai.

¹⁴A na takaarua aomata ake i maeao; a na neboa teuare E Karineaki ma te kukurei.

¹⁵Ai ngaia are, a na riai n neboa te UEA, ae Atuan Iteraera aomata ni kabane ake i mainiku ao aomata ake i aon taian abam'akoro.

¹⁶E na ongo te aba taian anene n nebo i bukin ana motikitaeka ae eti te Atua. Ma e rangi ni korakora ma n aki rau n te rawaawata n nano. Bon iai ae e konaa n onimakinaki? Bon angiina taani kewe!

¹⁷A tataningaia aomata nako baika a kakamaaku, b'aai ni kam'ane, ao taian ruarua.

¹⁸Ane ko na b'aka i nanon te ruarua ngkana ko maaku ma ni biri nako; ao ngkana ko manga kawanako man te ruarua, ko na manga m'ane ni b'aai ni kam'ane. E a tia ni bwenauaaki karawa kaanga te winto ae e kaukaki. A tia n ruru bouan aan te aonnaba;

¹⁹E na rina n uruaki te aonnaba, ma ni maaerikiriki.

²⁰E na bebebebe ma ni ioioaki kaanga te koro ni manging. ke te um'a ae e uarereke n tain te angibuaka. E na taonaki rikaaki n te bure; e na b'aka te aonnaba, ao e na aki manga teirake.

²¹E na katuaaia taian m'aaka ake i karawa[107] ao uean nako te aonnaba te UEA n te bong arei.

²²E na kab'akaia uea nako nanon taiani m'arua ma ni kaawakiniia kaanga buure. Ao rimwi riki, e na katuaaia.

²³A na kaai ni kamaamaaeaki ma ni kab'ainrangaki nam'akaina ma taai. E na tautaeka te UEA ae Moan te M'aaka i aon te Maunga are Tion i Ierutarem, ike e na kaota iai nakoia ana taan tautaeka kamimiin mimitongina.