Read Te B'aib'ara Itaia 27 Bible Online

Itaia 27 - Te B'aib'ara bible

Itaia 27

¹Ao n te bong arei, ao Rib'aietan, [113] ane e na nim'atoaua ma ni birinako manin taari ae e kakamaaku, ma e na tiringnga te UEA n te kabaang ae e kakamaaku, ae e kakang.

²N te tai arei kam na riai n anenea te nne ni kureebe ae e rangi ni uaa [114]

³N na kaawakinna Ngai ae te UEA ma n tebotebokia n taai nako. N na teiakinna n te ngaina ma te bong ma ni kaawakinna ma taiani kabuanib'ai.

⁴E a toki uniu. Ma N na m'ananga ni buakanna ma ni kabuokia ni kamannangnga ngkana e kariki uaana aika a kateketeke.

⁵Ma ngkana e mwiokoai te nnenaroka ni kureebe i bukin kaawakinana, ao e na riki b'a raoraou ao N na rau ma ngaia.

⁶N te bong teuana ao ane e na nene wakaaia aomatan Iteraera kaanga te kureebe. Ane a na uee ma ni kariki uaa aika a na kaona te aonnaba.

⁷Bon te UEA Ngai, ae I aki katuaaia ma n tiringiia aomatan Iteraera n aron te tiritiri ao te katuua ae e kakamaaku are I tiringiia iai aia kairiribai nako.

⁸I Karaua ni wareb'aia tuaan Iteraera [115] ma ni kanakoa te ang ae e kabuebue b'a e na kakioia nako kiiraroa.

⁹Bon ti teuana te kawai ae e konaa iai ni kab'araaki iai ni kabane ana bure Iteraera: a riai ni kamaaenikuni atiibu nako ake aia baonikarea beekan ao aia tabo n taromauri.

¹⁰A na tiku taian nono kaanga taian rereua ike akea ae e maeka iai. A na nakonako taiani kao i aona ae e a urubekebeke, ni kabaabanei arokan aona.

¹¹Ao ngkana a b'aka m'aangana aika a m'aoto i aontano ao a manga roko aine n anaia b'a kanaan aia ai. Ma a bon rangi n nanobaba aomata aikai n te aro are E aki konaa n nanoangaiia te Atua are e karikiia.

¹²E a roko te tai are e na ioioa iai te aba te UEA are i marenan te Karaanga are Iuberetiti ao tian te aba are Aikubita, ao e na ikotiia ana Aomata temanna i mwiin temanna.

¹³E na ongo te aba tangin te bu ae e tangi m'aaka. Ao i mwiina, a na oki n taromauria te UEA i aon ana maunga ae e tabu i Ierutarem aomatan Iteraera ake a uaakinaki nako ngkoa nako Aturia ao Aikubita.