Read Te B'aib'ara Itaia 28 Bible Online

Itaia 28 - Te B'aib'ara bible

Itaia 28

¹E a reke n te kaangaanga te kaawa ae e buubura are Taamaria are e mena ietan te M'arua are e maiu aona! a koro ni manging ana taani kairiiri, ake a kaonia n tain am'arake ma taiani wain. Ma ane a na katotoongi taiani uee aika a na b'ata ma n rai.

²Bon ti te UEA ae e korakora ma ni m'aaka! E na oroia ni kab'akaia ni baina ae e korakora n angibuakan te karau te atiibu ke te ukeuke n anti ke te ieka ae e korakora.

³A bane taani manging i Eberaim [116] ni kakatonga iroun Taamaria, ma ane a na kamanatuaaki.

⁴E na waekoa ni mauna mimitongin Taamaria are i etan te m'arua are e maiu aona. E na kanaki nako kaanga moan uan te biiku ae e tai n tain te tai.

⁵Ngkana e roko te tai aei, ao ane e na mimitong ana baunuea te UEA ae moan te M'aaka i bukiia ana Aomata ake nikira ni maiu.

⁶E na nooria b'a e na tautaeka te eti ao a na konaa ni kaawakina aia kaawa ae e buubura ana Aomata.

⁷A bebe waeia ibonga ma burabeti b'a a koro ni manging. A rangi ni mangaongao aia iango n te aro are a aki konaa ni butim'aea ana rongorongo te Atua ke n anga babaaire aika a raoiroi.

⁸E a onrake rabunan aia taibora ni mumutaia ae e boiraa.

⁹Ti te bo ngkami aika taani kairiiri aika kam manging ma ataei aika a uarereke! Kam na kangaa n ataa ana rongorongo te UEA ke n reireiia aomata Ana rongorongo?

¹⁰Kam bon aki naba ongora ma kam ti kakaauongo nakon karongoaa aika a akea nanoia aika a na okioki. [117]

¹¹Ma ngaia are, E na taetae te UEA nakoia ana Aomata ni b'anaa aika a kaokoro ao n taeka n ianena. [118]

¹²E a tia ni berita iai nakoimi i bukin te rau ao te motirawa aika a kororaoi, ma kam aki kan ongo.

¹³Ao ngkai e nang riki ana rongorongo nakoim b'a taiani b'anaa aika akea nanoia aika a na okioki. [119] Ao i mwiina, ko na b'aka nako bukim, ma ni ikoaki ao ni m'ane.

¹⁴Bon akea te b'ai ae kam karaoia b'a ti te b'ab'ainingare; ao ngkai kam a riai ni kakauongo n te b'ai ae e taekinna te UEA.

¹⁵Tao kam taku b'a kam karaoa ami boraraoi ma te mate ao aia aonnaba maate? E aera ngkai kam onimakin ami kewe b'a kamaiuami man te kabuanib'ai ao te ieka ae e korakora?

¹⁶Ma ngaia are, E taku te UEA, “I kawenea te aana ae matoatoa i bukin te kaawa are Tion. E kakoauaaki b'a e onimakinaki raoi atiibun te koona ae e kakaawaki; akea temanna ae e onimakinna e na manga b'ara nanona.

¹⁷A na riki te eti ma te riai b'a taiani koranikaeti ake a na buokai ni kateana.” Ane e na urui ma ni uotinako katanami aika taiani kewe karau atiibu ao taian ieka.

¹⁸Ane e na uruaki ami boraraoi ma te mate ao aia aonnaba maate. Ao i mwiina, ane e na rabuningkami naao aika a ngare ma ni b'aro.

¹⁹E na uotingkami nako te kaarangaina, te tawanou, ao te tairiki b'a te ieka ae e makuakua. E na anganingkami te reirei aei b'aai aika a riki aika a kakamaaku:

²⁰E rangi ni uarereke am kainiwene, ao e kimototo rabunam.[120]

²¹E na buakaniia te UEA n ae e rangi ni matoatoa n aron are e karaoia n te Maunga are Beratim [121] ao n te M'arua are Kibeon. [122] Ma n te tai aio te UEA E na karaoa te b'ai ae e kakubanako, ae kam aki kaantaningaia.

²²Ma ngaia are, kam riai ni katoka ami b'ab'ainingare b'a kam kaawa ni kamatoatoaa riki kabaeami nakon are mai m'aaina. I ongo taekan te UEA ae Moan te M'aaka b'a e orea te aba ae b'anin ni kamaunaa.

²³Kakauongo raoi nakon te b'ai ae N na taekinna.

²⁴A aki ti kamaraua ma n urua te tano taani ununiki.

²⁵A na kamaae ni kamrarai atin te kumino aika a roroo ao kumino ake a aki roroo; a uniki atin te uita ma te b'aare ni nneia ni koaua.

²⁶A reireiniia aikai iroun te Atua.

²⁷Ao ngke a tia n taiiaki taiani kumino aika a roro ma ake a aki roro ao a oreaki ni kanakoaki mani kaiia, ma a aki kamanatuaaki n taiani kaa ni b'ai aika a katikaki irouia maan.

²⁸A oreaki taiani uita ma taiani b'aare, ma a aki oreaki ni karokoa maenikunna; a kamanatuaaki n taiani kaanib'ai aika a katikaki irouia maan ma a aki rangi ni kamantaki ni kab'autaki.

²⁹E roko te ataib'ai aei mai roun te UEA ae Moan te M'aaka are iai rabakauna ae moan te korakora.