Read Te B'aib'ara Itaia 3 Bible Online

Itaia 3 - Te B'aib'ara bible

Itaia 3

¹E nang uoti nako b'aai ni kabane te UEA ae Moan te M'aaka aika b'aai aika kam tangiri mai Ierutarem ao Iuta ami kariki ma ami ran,

²tautia ma aomata aika a kakannato, taani moti ao burabeti, taani kairiiri ao aobitia n te taanga ni buaka,

³mataniwi ao taani iango, taani kaiwa, ao koraki riki tabeua ake a konaa n taekin kanoan boong aika a na roko.

⁴E na karikiia naati ao ataei [10] b'a taan tautaeka.

⁵Ane kam na iowawa n tatabemaningkami nako nakoia raoraomi ao kaain rarikimi. Ane a na taetae ni kamatauningaiia aia ikawai aomata aika a uarereke; ao bon akea ae e na karineia aomata aika a bon riai n aki karineaki.

⁶Ao ane a na taumatoaia aia koraki tem'angina mani kaangai, “Iai ngkoe kunnikaim ma ko nang riki b'a ara tia kairiiri ao ko na tautaekani b'ariko ni b'ai aika a uruaki aikai.”

⁷Ma ane e na kaangai kaekaana, “Bon akea te b'ai ae I konaa ni karaoia nakoimi. Kam na aki karikai b'a ami tia kairiiri. Bon akea nikiran te am'arake ke te kunnikai n au auti.”

⁸Ierutarem ma Iuta, kam kakaitaraa ami UEA ae e mimitong e boni kab'akai ngkami ami taeka ma ami m'akuri.

⁹Taraan moamoami e oti iai b'a ti te bo ami bure ma kaain Tootom, ao kam aki kataia ni karabaa. Kam a reke n te kaangaanga, ao kam a bon tia ni katokai i aomi ni kabane.

¹⁰Tuangiia aomata aika a ongotaeka iroun te Atua ni kaangai, “Kam rangi n tekeraoi kam na anganaki kaniwangami i bukin te b'ai ae kam a tia ni karaoia.”

¹¹Tuangiia aomata ake a aki ongotaeka iroun te Atua ni kaangai, “Kam a reke n te kaangaanga ae moan te buubura E na manga riki nakoimi te b'ai are kam a tia ni karaoia nakoia tabem'aang.”

¹²E ngae ngke a na aomata te Atua ngkami, ma kam tautaekanaki ma ni kabuakakaaki irouia aine ma ataei. kam kamangaoaki irouia taani kairiiri aika a kairingkami rikaaki n te kawai ae e kaairua.

¹³E a tauraoi te UEA ni bukiniia ao ni motikititaekaia botannaomata ni kabaneia.

¹⁴E na bon motikitaekami naba ngkami taan tautaeka ao taani kairiiri i aoia ana botannaomata. Kam tiringa arokana taiani kureebe [11] ao kam kaon ami auti nako ni b'aai aika kam kimoai mairouia aomata aika a maiu ni kainano.

¹⁵E taku te UEA ae Moan te M'aaka, “Kam a tia ni kamanatuaia au aomata mani kabaarekai mataia aomata aika a maiu ni kainano.”

¹⁶E taku te UEA: A kamoamoa ainen Ierutarem ao a aiwaa n aki akaaka, ma ni kamatararaoia. A karin i waeia b'aai aika a kekekeke ni katika mataia aomata n te kawai are a nakonako iai.

¹⁷Ma N na kaon atuuia Ngai ae te UEA n taiani kinaka, ao N na kaaki karabaan rab'ataia.

¹⁸Ngkana e roko te bong arei, ao N na uotii nako aia b'ai ni katikiraoi aika a rangi n tamaroa aine aikai ake a karin i waeia,

¹⁹atuuia, roroaia, taningaia, anganibaiia, b'airiia, tabonibaia, ao i aon kunnikaiia.

²⁰N na kanakoi rabunan mataia,

²¹roon nukaia, aia boiarara, aia b'aa n tabunea,

²²niiniiraia ni uea, ao kunnikaiia ni kabane aika a tikiraoi,

²³b'araia, ao aia b'auti ni m'ane.

²⁴A na oneaki mwiin taiani boiarara n taiani boiraa; a na oneaki mwiin taian roo n nuuka, n taian roobu; a na oneaki mwiin taian irannatu aika a biraki n taiani mara n atu. A na oneaki mwiin kunnikai aika a boobuaka ni kunnikai aika a raeraeaki; A na oneaki mwiin te botanaine, n taiani m'akam'aka aika a buakaka i aon rab'ataia.

²⁵A na tiringaki m'anen Ierutarem ake taani buaka n te buaka.

²⁶E na tanginiwenei te kaawa ae e buubura ao a na tekateka i aon te baareka, ao a na akea kaaina.