Read Te B'aib'ara Itaia 30 Bible Online

Itaia 30 - Te B'aib'ara bible

Itaia 30

¹Aio ana rongorongo te UEA i bukiia ana Aomata aika a kamangao: Kam iri oin ami babaaire ao kam aki iri au babaaire; kam karaoi taiani boraraoi i marenami ma tautaeka tabeua ao kam titirakinai moa, ao kam teimatoa ni buubure.

²Kam onimakina Aikubita i bukin kamanoami. Ma ngaia are, kam rawa nakon au babaaire. ao kam kanakoia ami taan uarongorongo nako Aikubita ni buubutiia aia uea buokami.

³“Ane ana b'ara nanomi, ma ni kamaamaaeaki i bukin onimakinan Aikubita.

⁴E roota te kaawa are Toan ni bo nako aiaki ni karokoa Aneti m'aakan te uea. [127]

⁵Ma e bon aki konaa ni kamanoko Aikubita, ao onimakinan te botannaomata anne bon te m'akuri ae akea manenana ao te m'akuri n nanobaba.”

⁶Aio rongorongoia manin te Rereua are maiaki: “Ngkami aomata aika kam uouoti kaub'aimi i aon taian aati ma kamero. Kam m'ananga nakon te botannaomata ae e mamaara ri nanon te rereua ae e kaangaanga ae e onrake n taian raian ao taian raakon aika a tiritiri aika a kiikiba.

⁷E aki konaa ni buokiko Aikubita! Ao bon anne bukina ae I arana te botannaomata anne b'a te manni kaakang ae akea ana i buobuoki.” [128]

⁸E tuangai te UEA b'a N na korea te rongorongo i bukiia ana Aomata aei, b'a e aonga ni meemena ikekei n aki tootoki.

⁹A tia ni kaaitaraa te UEA ao a aki konaa n onimakinaki. A tia n rawa nakon ana taeka n reirei

¹⁰ao a tia n taetae ni kaangai nako ia ana tia uarongorongo nako ma ana burabeti nako: Kam na aki tuangiira te b'ai ae e a tia ni kaotia te Atua nakoimi ao kam na aki kab'arab'araa te koaua. Kam na ti taekina ae ti tangiria b'a ti na ongo, e aoria ngkana e kaairua.

¹¹Ani katoka te b'ai ae e a tia n taekinna te Atua! Ti aki kani manga ongo taekan Atuaia Iteraera ae e tabu.

¹²Ao ngkai aio ana kaeka Atuaia Iteraera ae e tabu: “Kam katinanikui au rongorongo, ao kam onimakini m'akuri n iowawa ao taiani kewe.

¹³Ti te bo te bure aei ma te tabwena are e karika waekoani b'akan ao maenikunin

¹⁴te oo ae e rietaata kaanga te boora ae e manatua. Bon akea m'akorokorona ae e tau buuburana i bukin uotakin te kooro ae e buee ke ni ititiia te ran ni kanakoa.”

¹⁵E a tia n tuangiira ni kabane te UEA ae E tabu ae Atuaia Iteraera ni kaangai, “N na kaawakiningkami ngkana kam oki Nakoiu ma ni karau nanomi. N na manga kakorakoraingkami ngkana kam nanoraoi n onimakinai.” Ma i mwiina kam a manga bonotaninga

¹⁶ao kam taku, Ti aki! Ti na bon maiu ngkana ti biri nako n rawei maiura i aon aoti aika a biri m'aaka.” Ma ane a na biri m'aaka riki akana kakioingkami.

¹⁷Ngkana ti tabeman b'a ti niiman ke ti temanna, e na bon tau i bukin kakioakiia teuana tengaa mai roumi. N tokina, ti nikiraia ake a reke maiuia bon ti tabeman aika a tiku n timoimoi kaanga kain te buraeki i aon te tabuki ae e rereua aona.

¹⁸E tataninga te UEA ae te Atua ni kaota m'aitin ana akoi ao n nanoangaingkami. E aki toki te UEA ni kaakaraoa ae e raoiroi; e kakab'aiaia akana a onimakinna.

¹⁹Kaain Ierutarem, kam a aki riai ni manga tang riki. E akoi te UEA ao ni bon te tai naba are E ongo iai tangimi n tangira buokami, ao e a roko naba.

²⁰E a tia n anganingkami te kangaanga ma te nanokawaki te UEA n aron te am'arake ma te mooi. Ma kam na manga noora naba riki te UEA, ami tia reirei, ao E na kairingkami.

²¹E ngae ngkana kam rairaki nakon te angaatai ke te angamaing, ao kam na bon ongo naba te b'anaa ae e kaangai, “Aio te kawai! Kam na iria ngkai.”

²²Ao ane kam karaoia ami bouannanti ake taian tirewa ma koora kaanga taian turam ni maange; kam na karenakoia kaanga taian uraeki ae e a kam'araa.

²³E na kanakoa te karau te UEA b'a e na teboki taian Atiniberita akana iroum-a na manga kariki riki taian uaa am tawaana nako nakon are ko bon tangiria, ao a na am'arake am nanai ni kao n taian tabo n uteute aika a tangaina.

²⁴Ao a na am'arake naba taiani kao m'aane ao taian aati ake a kamaraua aia tawaana n taiani uita aika a rangi n raraoi. [129]

²⁵Ane a na tiringaki aomata ma n uruakaki taian taua n te bong arei, ma a na raanga taian karaanga n ran man taian tabuki ao maunga aika a rietaata.

²⁶Ao i mwiina, e na bauti ikoakiia ana Aomata te UEA ma ni kamaoi ikoakiia ake e bon kariki. E na oota nako ootan nam'akaina kaanga ai aron ootan taai, ao e na oota taai itiua riki rakan ootana nakon aroarona mai m'aaina. E na karina n oota n ai aron ootan itiua te bong n te tai naba arei.

²⁷E a roko te UEA man te tabo ae e raroa ma unna ae e korakora ao te bubu n nang ae matenten. [130] E waerake uran ana taeka n un kaanga ai aron te ai ae e urub'ai;

²⁸E katinakoa ikeikena b'a te ieka are e iabuti rake nakon te roroa. E raumeaia botannaomata ao e kamaunaiia. Ao e kaaki taian bwe ni kairiiri i nanoni wiia ianena ni kabane ao e kairiia nakon te kabuanib'ai.

²⁹Ane a na anene ana Aomata te UEA n aron are a karaoia ngke a kauringa te Riao [131] n te tairiki. Te UEA bon ana b'aa ae e korakora Iteraera, ao ane a na kukurei ana Aomata n aroia ngkoa ngke a ira tangin te kaib'ab'aa nakon te Maunga ike e taromauriaki iai.

³⁰E na rangi ni un te UEA. E na ongo te aba b'anaana ae e kakamaaku, ao e na nooraki baina ae e tauraoi n oro, ao e na riki unna b'a kaanga te ai ae e urub'ai, ae e irianaki ma rebwen taiani baa ao taiani karau atiibu.

³¹Ngkana a ongo b'anaan bain te UEA kaain Aturia ma n nooria n oro n okona te biti, ao ane a na maaku.

³²E na buakaniia n te buaka, ao ni katoa oreakiia i rouna, ao e na riki b'a tangin taian timbere ao taian aabi.

³³N taai ake ngkoa iai te tabo ae e katauraoia te UEA i bukin kabuokakin rab'atan te uea ae e a mate. [132] E nano nnen te ai ao e warebwerebwe, e b'aenaata te ati n rietaata, ao e na kauraa te ai te UEA ni kaotinakoa ikeikena ae te ai.