Read Te B'aib'ara Itaia 35 Bible Online

Itaia 35 - Te B'aib'ara bible

Itaia 35

¹Ane a na kukurei taian rereua aika a mate n taka; ane a na ngarengare aaba aika akea kain aoia ao a na ure ueeia.

²Ane a na ure ueen taian rereua n taabo nako ao a na anenei kuuna aika a kakukurei. A na kakannato n ai aron te Maunga are Reb'anon, ao ni mimitong kaanga te Maunga are Karemera ke te M'arua are Tiaron. Ane a na bane aomata nako n noora kamimiin mimitongin te UEA ae Atuara.

³Bon aei te rongorongo nakoia aika a mamaara, aika a ruru, aika a iango n raraoma:

⁴“Kakukureingkami! Kam na aki maaku. E a roko te Atua b'a e na katuaaia ami kairiribai. Ane e na irantaangaia te Atua ao e na kamaiungkami.”

⁵Ane a na nooraki aika matakii, ao a na kamaiuaki aika a bonotaninga.

⁶Ane a na eweewerake aika a m'auku kaanga taian ria; neewe aika a bae a na manga takaarua. Ane a na manga raanga raan ri nanon te rereua.

⁷Ane e na manga onikaki te tano ae e a b'atata nakon te neinei n ran, e na taorake te tano ae e m'autakataka n taiani koburake n ran. A na rikirake uteute n te tano ae m'aim'ai, ike a karaoa iai mwengaia nanai ni kamea aika a aki manana. [148]

⁸E na mena te kawai ae e raoi ikekei, ao e na aranaki b'a “Kawain te Atua ae e Tabu.” bon akea te aomata temanna ae e aki tau n taromauri ae e na toua te kawai arei. Ao bon akea naba te nanobaba ae e na toua te kawai arei. [149]

⁹Bon akea taian raian ke maan aika a aki manana ae a konaa ni kaaniia te kawai arei; bon ti koraki aika e a tia kamaiuia te UEA aika a konaa n rikekei.

¹⁰A na oki ma te anene aomata aika e a tia te UEA ni kamaiuia ngkana a rin i Tion. E na riki te kukurei b'a aia bau ni uea ae a na baunna n aki toki. A na bukamaruia ao a na takaarua b'a a nako ni kabane rawawataia ma raraomaia.