Read Te B'aib'ara Itaia 37 Bible Online

Itaia 37 - Te B'aib'ara bible

Itaia 37

¹Ao ngke e ongo naba te rongorongo arei Etekia, ao e raeuai kunnikaina i bukin rawaawatan nanona, ao e karin kunnikai aika a mangaingai. Ao i mwiina, e nako n rin n ana Tembora te UEA.

²E tuanga te Buraiminitita are Eriakim, te kauoman ni buraiminitita are Tebena, ao te ibonga b'a a na kunnikaiia ni kunnikai aika a mangaingai ao a na kaangai nakon Itaia:

³Itaia, bon taai aika a matoatoa ma ni bubuaka taai aikai. Ti te bo ara botannaomata ma te aine ae akea korakorana ni bungiia natina, ngke e a bon roko ana tai ni bungiia natina.

⁴Ti butiiko b'a ko na tataro i bukiia aika a tiku ni maiu. E kanakoa ana mataniwi ni buaka uean Aturia ni kakaewenakoa te Atua. Tao e bon ongo te UEA te b'ai are e taekinna ao E na karaoa te b'ai teuana, ngkana ko tataro.

⁵Ngke a roko taani kairiiri aikai nako iu,

⁶ao I tuangiia ana rongorongo te UEA nakon Etekia ae e kaangai: Bon te UEA Ngai. Ko na aki tabe ma taeka aika a buakaka aika e a tia n taekinna ibuku akana e taekin ana tia uarongorongo uean Aturia.

⁷N na kab'araa nanona n taian maningongoo i bukin b'aai aika a riki i mwiina i abana. Ane e na oki, ao N na karaoia b'a e na mate n te mate ae e kakamaaku.

⁸Ao i nanon te tai arei, ao e ongo mataniwin te taanga ni buaka n Aturia b'a e a tia n nako ana uea ni kiitana te kaawa are Rakiti ao ngkai e a buakana Ribena. Ma ngaia are, e a manga nako ikekei.

⁹Ni bon te tai anne, e a ataia uean Aturia b'a i aoni kawaina uean Itiobia are Terata [151] ni buakanna. Ao i mwiina, e kanakoa ana tia uarongorongo ma taeka aika a kaangai nakon Etekia:

¹⁰Ko na aki onimakina Atuam ke ni kaburababaaki n ana berita i bukin kaawakinan Ierutarem mai rou.

¹¹Ko bon ongo taekara ngaira aika uean Aturia ngke ti kamaunaia botannaomata ake tabeua. Ao tera ngkanne ae ko taku b'a ko rangi ni mano iai.

¹²Uean Aturia are i m'aaiu e kamaunaa kaawan nako Kotan, Aran, Reteba, ao kaain Eten ni kabane ake a maeka i Terata. Tera ae e karaoia aia anti nakoia?

¹³A tia naba ni mauna Amata, Arebata, Tebarewaim, Ena, ao Iwa.

¹⁴Ngke e tia Etekia ni wareka te rongorongo mai roun uean Aturia, ao e uotia nakon te Tembora ao e taakinna b'a E na nooria te UEA.

¹⁵Ao e tataro:

¹⁶Te UEA ae Atuaia Iteraera ae Moan te M'aaka, e mena am kaintokanuea i aon baika a maiu aika iai baiia ni kiba. [152] Ko karaoa karawa ma aonnaba, ao bon ti Ngkoe n tautaekan taian abanuea n te aonnaba.

¹⁷Ko na bon noora ana m'akuri Tennakeriba ni kabuakakako, ngkoe te Atua ae e maiu.

¹⁸E boni koaua Atuara, ae a tia uean Aturia n onikia botannaomata nakon taian rereua.

¹⁹A tia n urui taian bouannanti aika taiani kai ma atiibu ake a tia ni karaoi ao n tataromauri iai botannaomata aikai.

²⁰Ma bon ara UEA ao Atuara! Ti butiiko b'a ko na kamaiura mai roun uean Aturia. Ao ane a na ataiko iai aomata ni kabane n taian botannaomata b'a bon ti Ngkoe te UEA.

²¹I nakon Etekia ao I tuangnga b'aai ni kabane ake e taekin te UEA ae Atuan Iteraera nakoina:

²²Etekia, ko tataro nako iu i bukin Uean Aturia are Tennakeriba. [153] Ao ngkai, aio te b'ai ae I taekinna nakon te uea anne: Aomatan Ierutarem a ribaiko mani kakanikoko; ao a ngareakiniko mai akuum.

²³Tennakeriba, ko a kamaraiaaki, ko takaarua, ao ko ngare ni kakaniko nako iu, Ngai ae Atuan Iteraera ae e tabu.

²⁴Ko karaoia am mataniwi b'a a na kabuakakaai, Ngai ae te UEA. Ao aei te b'ai are ko taekinna bon i bukim, “I kairiia au kaanibuaka nako aon te kabanea n rietaata ni maungan nako Reb'anon. I rinnako i buakon buakonikaina, ma ni koroi tiirana ao m'aiangona aika taiani kabanea n raoiroi.

²⁵I kam'autakatakai karaanga ni kabane ake n te aba are Aikubita, ao I mooi n taian m'anib'a ake I a tia ni keni.”

²⁶Ko na ongora, ngkai Tennakeriba Irou, Ngai ae te UEA. I baairea te b'ai aei man taai aika a nako. Ao ko tuai man ataia ae bon ti Ngai ni baaireia b'a ngkoe ae ko na karaoi b'aai aikai. I karaoiko b'a ko na urui kaawa aika a buubura.

²⁷A riki ni mamaara aia aomata, ma ni mangaongao. Kaanga ai aron taian uteute aika a riki n aki akaaka ke taian uteute aika a tib'a bwebwe i aon taubukin te auti ke kaanga ai aron te tawaana ni uita i m'aain ae a tai. [154]

²⁸I a kaman ataiko e ngae ngkana ko a rangi ni un irou.

²⁹I a tia n noora kainikatongam ao unim ae e rangi ni korakora irou. Ao ngkai N na kaaki te matau i b'airim, ao te b'ai ni bwe i nanoni wiim, [155] ao i mwiina, N na kaokingkami. nakon te tabo are kam nako mai iai.

³⁰Etekia, N na tuangko te b'ai ae e nang riki. N te ririki aei ko na am'arake man taian uita aika a maiu i bon irouia, ao n te ririki ae e na roko ko nang kang taian uita aika a maiu i mwiin taiani uita aikai. Ma n te katenua n ririki, ao ane ko nang unika te kureebe ao ane ko nang kana ae ko taia.

³¹Koraki aika a tiku ni maiu i Iuta bon te koraki aika ai aron taian kureebe ake a kanene wakaaia rikaaki ao a kariki ua.

³²Ngai ae te UEA ae Moan te M'aaka, N na bon kakoauaa anne b'a a na tiku ni maiu aika a maiu i Ierutarem.

³³I berita b'a e na bon aki roko i nanon Ierutarem uean Aturia, ke ni katebea te kanoanikatebe nako nanon te kaawa are e buubura, ke ni katobibia ma ni katauraoia ni buakani ngkami.

³⁴I bon koaua ngkai bon te UEA Ngai, ao e na boni manga okira te kawai are e nako mai iai ao n aki manga okira Ierutarem.

³⁵N na bon kaawakinna i bukin karineau ao i bukin naba te berita are I a tia ni karaoia nakon au tia m'akuri are Tawita.

³⁶E kanakoa te anera te UEA nakon aia kaemb'a kaain Aturia, ao e tiringiia tebubua waningaun ma niman tengaa te aomata n teuana te tairiki. N te bong are i mwiina, ao e a onrake te maeka arei n taiani mate.

³⁷Ao i mwiin anne, ao e a oki te uea are Tennakeriba nako Aturia ao e maeka n te kaawa are e buubura are Ninewe.

³⁸Ao n te bong teuana e tabe n taromauri n ana tembora antina are Nitiroka, ao a roko naba natina m'aane ake uoman ake Aterammereka ao Tiaretera n tiringnga n aia kabaang. A biri nako nakon te aba are Ararata, ao e a manga uea natina te m'aane are Etaraaton. [156]