Read Te B'aib'ara Itaia 38 Bible Online

Itaia 38 - Te B'aib'ara bible

Itaia 38

¹Ni bon te tai naba anne, ao e a aoraki Etekia ao e a kani mate. Ma ngaia are, I a nakoina ao I taku, “E taku te UEA b'a ko na aki marurung. Ko nang mate, ma ngaia are, ko a riai ni karaoi m'akuri aika a kainanoaki aika a riai ni katiaaki.”

²Ao e rairaki nakon te oo Etekia ao e tataro ni kaangai,

³“Ko na aki m'aninga ae I a tia ni kakaonimaki nakoim. I a tia ni ongotaeka iroum ma nanou ni kabane, ao I karaoi b'aai nako aika ko taku b'a a eti.” Ao i mwiin aei, e a tang n takaarua.

⁴Ao i mwiina, e a kanakoa te rongorongo te UEA nako iu

⁵i bukin Etekia ae e kaangai: Bon te UEA Ngai ae te Atua, ae I taataromauriaki iroun am bakatibu are Tawita, I a tia n ongo am tataro, ao I nooriko ngke ko tang. N na kamaiuko riki i nanon tebwi ma nimaua te ririki,

⁶ao N na kaawakiniko ma te kaawa aei mai roun uean Aturia.

⁷Ao ngkai N na kakoauaa raoi nakoim b'a N na bon kakoroa raoi nanon au berita.

⁸Ko noori nuun te b'akantaai i aon a na kaintam'arake te uea are Aati? N na manga karaoi taian nuu aikai b'a a na manga okirikaaki tebwiina te euta ni wae. Ao ane e na okirikaaki te nuu tebwiina te euta ni wae. [157]

⁹Aio te b'ai are e koreia Etekia ngke e a marurung:

¹⁰I taku ngai b'a N nang mate i nanon au bong n rorobuaka ma ni kabureaki n akea au tai i abaia maate.

¹¹I taku ngai b'a N na aki manga oki n nooriko, au UEA, ke aomata nako aika a maeka n te aonnaba aei.

¹²E anaaki mairou maiu kaanga te autinrianna ae e kab'araaki ma ni uotaki nako iroun te tia kaawakintiibu. Ko koreai kaanga karain te kunnikai man te b'aini karao kunnikai mai roun te tia raranga kunnikai; ko urubekeai n te bong ao te ngaina.

¹³Ni karokoa te ingaabong are i mwiina, I taku ngai b'a ko nang kamanti riiu kaanga te raian ae e rangi ni baki; ko urubekeai [158]

¹⁴I tang n ai aron te tuwaaro; I tanginiwenei n ai aron te taobe. A uraura matau i bukin kakaaeam, te UEA. I a tira. Taiaoka nakomai buokai. [159] E a oneaki maiu nakon ae e maai; N na aki nakonako raoi ni karokoa mateu.

¹⁵Bon akea te b'ai ae I konaa n taekinna ni kaekako, i bukina ngkoe ae ko karaoi baikai nako iu. [160] E a oneaki maiu nakon ae e maai; ao N na aki nakonako raoi ni karokoa mateu.

¹⁶E uota te maiu nako iu aomata nako am taeka ma am m'akuri, ao ngai naba. [161] I butiiko b'a ko na manga kamarurungai ao ni kakorakoraai.

¹⁷A roko taai aika a matoatoa n aron aikai i bukin iangoan arou. Ma e kaawakinai am tangira man te kabuanib'ai i nanon te m'anono ae e nano, [162] ao Ko aki kubari au bure nako.

¹⁸Bon akea temanna ae e konaa ni kaaitauko mai buakoia ake a mena i abaia maate ke n neboiko; akea mai nanon te m'anono ae e nano aei ae e konaa ni kaantaningaiko b'a ko na kaota nakoina aron am kakaonimaki.

¹⁹Bon ti aomata aika a konaa ni karab'ako, n aron ae I karaoia n te bong aei. Rooro nako a na kaongoia te roro ake i mwiia aron am kakaonimaki. [163]

²⁰Ko na kamaiuai, Ngkoe te UEA, ao ni kabane ara bong ni maiu ti na anene i nanon am Tembora n taian b'ainikatangitang aika taiani karai.

²¹I tuanga ana tia m'akuri te uea are Etekia b'a e na kaaki tabeua taiani biiku aika a kamantaki i nanon manekan Etekia, ao ane e na marurung.

²²Ao i mwiina, e a kakaaea te kakoaua Etekia b'a e na manga taromauri n ana Tembora te UEA.