Read Te B'aib'ara Itaia 46 Bible Online

Itaia 46 - Te B'aib'ara bible

Itaia 46

¹A b'aka i aoni waeia, te anti are Bere ao Nebo [204] ngke a uotaki nako bannaia ake taiani kai i aoia maan aika a korakai.[205]

²A b'aka i aon bubuaniwaeia ni kakaaea angan kabebetean te uota, ma a bon uotaki naba taiani bouannanti nako abaia ianena.

³Ngkami aika nikira ni maiu i Iteraera, tii ongora irou, Ngai ae te UEA. I a kaman uouotingkami ni moa man te tai are kam a tib'a bungiaki iai.

⁴Ao N na bon karaoa naba anne ngkana kam a kara ma ni iaia, ao N na bon kaawakiningkami. I karikingkami. I uotingkami ao I tararuaingkami n taai nako.

⁵Iai iroumi ae e konaa ni kabootaua ma Ngai? Iai ae e booraoi ma Ngai?

⁶Tabem'aang aomata a kabooia taani karaobiti ao a anga taian tirewa ao taiani koora b'a e na karaoaki mai iai te bouannanti b'a a na taromauria.

⁷A uouota te bouannanti i aon angaia, ao i mwiina a katokaa i aon te kaintei, ma e aki konaa ni kakam'akuri. A weewete nakon te bouannanti ngkana a reke n te kaangaanga ma e bon aki kaekaia, ao e bon aki konaa n anga a na i buobuoki.

⁸Kam na kaaki inanomi te baei, [206] ngkami aika aomata aika taani bure. Ao kam na aki m'am'aninga.

⁹Bon ti Ngai te Atua! Bon akea riki atua i rarikiu; bon akea naba n ai arou. Kam na iangoi baika a tia n riki n ririki aika a b'aka nako.

¹⁰I a kaman taekin baika a na riki mai moana, i m'aain ae a riki. I kakoroa bukin au taeka

¹¹ao I karokoa temanna man te aba ae e raroa nako b'a e na karaoa te b'ai ae I tangiria. E buaka mai mainiku, kaanga te aoki ae e kiba rikaaki. Ao ngkai N na kakoroa bukin au berita ma ni karaoa te b'ai are I a tia ni iangoia.

¹²Kam bon taningabono ngkami aika aomata ao kam a kan reke n te kangaanga, kam na kakauongo nako iu.

¹³N na waekoa n roko ni kamaiungkami. I a kaan ao N na bon aki kabane tai; I kakatia iroun Iteraera ao N na kamaiua Iteraera.