Read Te B'aib'ara Itaia 49 Bible Online

Itaia 49 - Te B'aib'ara bible

Itaia 49

¹Kakauongo aomata ni kabane, e ngae ngkana kam mena n abaia ianena n taabo aika raroa nako i nanoni marawa. E rineai te UEA ao e anganai arau i m'aain bungiakiu.

²E kakangii au taeka n ai aron kabaang ke tabon te kanoanikatebe; ke kaawakinai raoi ni karabaai i nanoni baina.

³E taku te UEA nako iu, Iteraera, bon au tia m'akuri ngkoe; N na bon rangi ni karineaki i bukim.”

⁴I taku i bon irou, “I a rangi ni korakai; ao e a tia ni banebuaka au tai. Ma I karaoa aei i bukin te UEA ae te Atua, ao E na anganai kaniwangau.”

⁵E a kaman rineai te UEA ae te Atua i m'aain bungiakiu b'a N na m'akuri i bukina ao ni kaokiia Iteraera. Ma ngaia are, e a tia ni karineai te UEA ma ni kakorakoraai.

⁶Ao ngkai E taku te UEA nako iu “E aki tau nakoim am m'akuri ae ti au toro ngkoe. Ko na riai naba ni karaoa ae e m'aiti riki nakon anne ni kaokiia ake nikira ni maiu man barongan nako Iteraera. I a tia ni kaakiko ikai b'a kaanga te taura i bukiia botannaomata nako; ko na riai n anaa m'aakau ni kakamaiu nakoia aomata nako n te aonnaba.”

⁷Iteraera, bon te UEA Ngai ae te Atua ae e tabu, are e kamaiuko. Bon te toro ngkoe irouia taan tautaeka ao taian botannaomata ake a kabuaakakako. [215]

⁸Aei ana taeka te UEA: N na kaekai am tataro b'a I a tia n namata te tai are N na i buobuoki iai ngkana I roko ni kamaiuko. I a tia n rineiko b'a ko na uota au berita i bukin te kaantaninga nakoia botannaomata ni kabane. [216] Ko na manga karaoa te aba ma b'aina nako ake a uruaki, ao ane a na roko aomata ni maeka ikekei.

⁹Ko na kainaomataia buure man taiani kakai ake a rootongitong b'a a na noora ootan te ngaina. Ana kunei kanaia aika a m'aiti i aon kawaia n okira mwengaia, e ngae ngkana a mena i aon tabuki aika akea kain aoia.

¹⁰A na bon aki konaa ni baki ke n taka; a na aki namakina kabuebuen taai ke angin te rereua aika a kabuebue N na bon aki nanoanga ngkana I kairiia i nanon karaangan raan.

¹¹N na kaboraoi taiani maunga ao ni karaoi taiani kawai;

¹²Ao i mwiina, a na oki au aomata man aaba aika a raroa mai meang ao maeao ao man te kaawa ae e buubura are Tiene. [217]

¹³Tuangiia taiani karawa ao aonnaba b'a a na anene ni kukurei; tuangiia taiani maunga b'a a na ira buakon te anene. A tia ni karawawataaki ana Aomata te UEA ma E a tia ni kaota ana akoi ao e anganiia te mwengaraoi.

¹⁴A taku kaain Tion, “E a tia n tannako te UEA ma ni m'aninga taekara.”

¹⁵E taku te UEA, “E a tia ni m'aninga taekan natina te tina are e nanoanga natina ni mammana? E konaa n aki tangira te ataei ae e bon nako man oin rab'atana? Ngkana e konaa ni m'aninga te tina, ma Ngai N na bon aki m'aninga taekam.

¹⁶E na koreaki taamnein am kaawa are e buubura i nanoni baim. Ko meemena n taai nako n au iango nako!

¹⁷“E na waekoa ni karaoaki am kaawa nakon waekoan uruana [218] A na keerikaaki ao a na nako akana a buakanna.

¹⁸Noora rarikim nako! Ko na noori aomata aika a tabe n okira mwengaia. B'a ngkai I bon maiu, Ngai ae te UEA, ao I berita b'a e na rangi n taatangiraki n ai aron te kainrou te aine ae e taabianna ni bai ni katamaroa.”

¹⁹E a maenikun ngkai Ierutarem! Bon akea te b'ai teuana ae e tiku n te kaawa. Ma e na manga moan karaoaki ao e na manga waekoa n onrake n te aomata; ao a na kairiribai aika a iowawaa a na bane n nako n taabo aika a raroa.

²⁰Bon te aine Ierutarem aika a bungiaki natina ngke e mena i nanon te rawaawata ae moan te korakora [219] i mwiin buan kainabana. Ao ngkai a nang roko ataei aikai ni kakaei nneia n te kaawa ae e a onrake irouia aomata,

²¹ao e titiraki Ierutarem ni kaangai, “Bon tinaia ngai? N na kaanga ni bung ngkana I bon teimatoa naba n tangitang i abaia ianena? Antai ae e kaikawaia ataei aikai? ao a roko mai ia?”

²²E taku te UEA ae te Atua: “N na anga te kanikina n te tai ae e waekoa nakoia botannaomata nako b'a a na kaokiia natimi m'aane ao natimi aine nako nanoni bain Ierutarem.

²³A na roko ni boobaraaki ueanim'aane ma ueanainen taiani botannaomata aikai ake a kaikawaia. A na kaawakiningkami kaanga te toro ae e kaawakina te ataei. Ao ane ko na ataia iai b'a bon am UEA Ngai. E na aki b'ara nanom ngkana ko onimakinai.”

²⁴Bon akea kangaangan kamaiuan temanna mai roun temanna ae e korakora ae e iowawaa? [220]

²⁵Ma E a tia te UEA ni berita b'a E na tei man ara itera ao E na kamaiuia ara ataei mai rouia ara kairiribai aika a korakora ma n tiritiri aikai.

²⁶E na karaoia aomata aika a iowawaa aikai b'a a na bon kana irikoia ao a na mooi boni man raraaia. Ao ane a na ataai aomata nako b'a bon ara Tia kamaiu te UEA; Atuan Iteraera ae Moan te M'aaka are e kamaiuia ana aomata.