Read Te B'aib'ara Itaia 50 Bible Online

Itaia 50 - Te B'aib'ara bible

Itaia 50

¹E taku te UEA, “Ataei, I aki kaaka tinami ke ni kabooa nako i bukin kab'araan taian taarau; I kaakiia ao ni kabooa nako i bukin ami bure.

²I roko ni weeweteingkami, ma kam aki kan ongo. Tao e a tia ni bua m'aakau ni kamaiungkami ao ni katoka ami kangaanga? A ikinako taiani marawa ao taiani karaanga n au taeka ao a riki b'a taian rereua; a mate taian ika ao a m'aung i bukina ngke e a bane te ran.

³E onika karawa nakon te roroo kaanga te kunnikai ae e mangaingai are e kunnikaiaki n taian taunimate.”

⁴E anganai te UEA ae te Atua taeka ni koaua i bukin kaungaan nanoia aika a mamaara. E katoa ingaabong ni kautai ao I tangiria n kamateb'aia ana reirei;

⁵E karaoai b'a N na kakauongo ma n aki mangao ke ni biri nako.

⁶I kariaia b'a a na orea nuukau ma ni katika rake buaiu. I aki tannako mairouia ngke a kab'ainrangai ma ni baawarea matau.

⁷Ma e kaawakinai te UEA ae te Atua ma te kamaamaaeaki, ma ngaia are, e aki b'ara nanou, b'a I ataia b'a E na bon aki kab'akaai te Atua.

⁸E mena i rarikiu te tia kaawakinai, bon akea ae e konaa n tei ikai ni bukinai n te kaairua teuana.

⁹E na bon buokai te UEA ae te Atua ma ni kakoaua b'a bon tiaki te tia bure ngai. E na ongora te tia bukinai ao e na kunnikaia ae e kanaki n te koa.

¹⁰Bon akea mairoumi ae e karinea te UEA ke n ongotaeka nakon ana tia m'akuri. Ko nakonako n te roo ao tiaki te oota; ko aki onimakina aran te UEA ae Atuam. [221]

¹¹Rimoa ao nakonako n ootan te ai are ko a tia ni katauraoia. [222] Ma e na bon oreiko ma ni katuuaeko ni bon oin baina.