Read Te B'aib'ara Itaia 51 Bible Online

Itaia 51 - Te B'aib'ara bible

Itaia 51

¹Ngkana kam tangiria ni karaoa ae e raoiroi ao n ongotaeka iroun te UEA ao kam na katotoonga Aberaam. Boni ngaia te b'a are kam ekeaki mai iai.

²E rinea Aberaam ao Taara te UEA b'a ami bakatibu. E kakab'aia Aberaam te UEA ao man te aomata ane temanna anne ane a nako maiai kariki aika a m'aiti.

³E ngae ngke e uruaki Tion, E na uota te rau te UEA, ao e na rangi n taatangiraki te kaawa n ai aron te nne n aroka are Eten are E a tia ni katauraoia. Ao i mwiina, e na karaoa ana bootaki ni kukurei Tion; e na kakaaitau ao e na anenea te anene ni kukurei.

⁴E taku te UEA: au Aomata ngkami ao au botannaomata! Ma ngaia are, kam na kakauongo raoi irou. E na karekea te rau au reirei ao e na oota nako kaanga te oota i bukin te botannaomata.

⁵A ingainga n tataningaai b'a N na kamaiuia aomata ake a maeka n taabo aika a raroa nako i nanon te marawa. I korakora ao I tauraoi; N na roko ni kamaiungkami n te tai ae e waekoa ao N na tautaekaniia botannaomata ni kabane.

⁶Karaua n taraa karawa! Tarai aonnaba. E na mauna nako karawa kaanga te bubu; ao e na mangaingai te aonnaba kaanga taiani kunnikai. A na bane ni mate aomata aika i aon te aonnaba kaanga taian nango. E na akea tokin au tokanikai; ao e na teimatoa m'aakau ni kakamaiu.

⁷Ngkana kam tangiria ni karaoa ae e raoiroi ma n ongotaeka nakon au reirei ma nanomi ni kabane, ao kam na kakauongo raoi Irou. Kam na aki b'arannano ngkana iai aika a kamamaaeingkami ma n atong taeka aika a kamaraki nano.

⁸A na kanaki nako kaanga te kunnikai ae e kanaki n te koa. Ma n tokin au tokanikai; ao e na teimatoa m'aakau ni kakamaiu.

⁹Uti! buokiira te UEA. Ko na korakora ao tauraoi. Uti! Karaoa te b'ai are ko a tia ni karaoia nakoia am Aomata n taai ake ngkoa. Ko bon aki tataa Raaba [223] are te mannikaakang?

¹⁰Bon tiaki ngkoe ngkoa are ko kaoraa taari are e nano ao ko karaoa te kawai i bukiia am Aomata are a na toua ma ni kaawakinaki raoi iai i nanona ni karokoia n iterana are teuana?

¹¹A nang oki ngkai nako Ierutarem koraki ngkoa ake ko a tia ni kamaiuia, a na anene i aoni kawaia. A na katokaaki aia baunuea ma te kukurei ae moan te korakora, ao a na aki manga karawaawataaki n te nanokaawaki ao te rawaawata n nano.

¹²Bon te UEA Ngai, are E kaungaingkami. E aera ngkai kam maaka te aomata? A m'au ma ni mate kaanga te uteute.

¹³I taakina nako taiani karawa ao I kawenea aan te aonnaba. Ma kam a tia ni m'aninga taekau, Ngai ae ami UEA ao te Tia Karikib'ai. Kam katoabong ni maakuia koraki aika a un nanoia ma n taku b'a a na kabuakakako. Ma a mena ia ngkai?

¹⁴A bane n tang ma te maraki aomata ao a na waekoa ni kainaomataaki; a na kamaiuaki man m'aakan te mate ao a na aki manga baki.

¹⁵N na buokiia i bukina ngkai bon Atuami Ngai, te UEA ae Moan te M'aaka, are E kabuakaa marawa.

¹⁶I a tia n tuangngkami te b'ai ae kam na taekinna, ao N na teimatoa ni kamaiungkami i nanoni baiu. I taakina nako taiani karawa ao I kawenei aan nako te aonnaba. Ao ngkai I kaangai, “au Aomata kaain Ierutarem.”

¹⁷Ierutarem, uti! Teirake! Ko a rangi ni manging n te m'angko are e kanoaaki ni unin te UEA. Ko a tia n ong timtimna ni kabane, ao ko a aki konaa n nakonako raoi.

¹⁸Bon akea temanna mai buakoia natim aika a bati ae e mena ikekei ni kairiko n anganiko ana i buobuoki.

¹⁹Ko a tia n uruaki n te buaka ao te rongo; I a aki konaa n anganiko karauan nanom.[224]

²⁰E a un te UEA ae Atuam, ao a na wene n aki konab'ai natim ni koonan kawain nuukan te kaawa ni kabane, kaanga te ria ae m'ane n te karaun.

²¹Ko a reke n te kanganga ao ko a manging, ma tiaki man mwiin te wain. Ma ngaia are, kakauongo raoi

²²iroun te UEA ae Atuam, are e tei i bukim ao e kaangai, “I a tia n anaa te m'angko are e on n te un mai nanoni baim are ko riki ni manging iai. Ao ko na aki manga kairoroaki b'a ko na manga mooi iai.

²³Ma I a anga nakoia am kairiribai nako, ake a karikiko b'a te baareka ma n toubekaiko.”