Read Te B'aib'ara Itaia 53 Bible Online

Itaia 53 - Te B'aib'ara bible

Itaia 53

¹Iai ae e a tia ni kakoauaira ke n noora korakoran m'aakan te UEA ni m'akuri?

²Kaanga ai aron te aroka ae e a tib'a bwebwe man te tano ae m'auteretere te tia m'akuri ae e rikirake n te ongotaeka iroun te UEA. Bon tiaki ngaia temanna mai buakoia uea aika a bootonim'aane. Bon akea naba taraana ae e na konaa n anaa nanora.

³E ririibaaki ao e katinanikuaki; e onrake maiuna n te nanokawaki ao te rawawata ae e kakamaaku. Bon akea temanna ae e kan tarataraia. Ti kabuakaka ao ti kaangai, “Te aomata n aki akaaka!”

⁴E rawaawata ao e ri nanon te maraki ae e korakora i bukira, ma boon te rawaawata bon te katuuaeaki mai roun te Atua.

⁵E ikoaki ao e kamanatuaaki i bukin ara bure nako; e reke ae e riai i roura i bukina ngke E anaa tuuara.

⁶Bon tiibu ngaira ni kabane aika a m'aninga nako. Ti a tia n toua nako kawaira n tatabemaniira, ma e anganna te UEA te tuua are ti bon riai ni katuaaeaki iai.

⁷E rangi ni kabuakakaaki, ma e bon aki ngurengure. E aki kakarongoa kaanga te tiibuteteei ae e kairaki nakon te tia tiringa te tiibu ao e aki tangitang ngkana e koroburaeaki.

⁸E motikaki taekana nakon te mate n te moti ae e aki eti. Antai ae e konaa ni iangoa te b'ai are e nang riki nakoina? E anaaki maiuna i bukin b'aai aika a bure aika a tia ni karaoaki irouia au aomata [231]

⁹E raoiroi ao e nimaamannei, ma e taunaki n ruanimateia aika a iowawa ao a kaub'ai. [232]

¹⁰E motikia te UEA b'a e na karawaawataaki ana tia m'akuri b'a te karea i bukin kab'araan te bure ao te kaairua i bukiia tabem'aang. Ngkai e na maiu te tia m'akuri b'a e na nooria ake oin ana kariki. [233] E karaoi b'aai ni kabane ake E a tia ni baaireaia te UEA.

¹¹Ti na karekea raoi nanon te ongotaeka iroun te UEA i nanon rawaawatan te tia m'akuri. E ngae ngke akea ana bure, ma e na bon anaa naba tuaaia taani bure tem'angina, b'a a aonga ni m'aiti mai buakoia aika a na b'ara aia bure.

¹²E na anganna te UEA kaniwangana te karineaki ao te m'aaka ngkai e kareana maiuna. A taku tabem'aang b'a te tia bure ngaia, ma e karawaawataaki i bukin ara bure nako ao e buubutia te Atua kab'araan ara bure.