Read Te B'aib'ara Itaia 57 Bible Online

Itaia 57 - Te B'aib'ara bible

Itaia 57

¹A uaakinaki nako ma n tiringaki ana Aomata te Atua aika a kakaonimaki, ao bon akea temanna ae e tabe iai. A kamaunaaki n te buakaka,

²ma e reke irouia te rau i nanon te mate i bukin te ongotaeka iroun te Atua. [235]

³Aomata ngkami aika kam aki kakaonimaki! Kam nako ia taani kaiwa ao kam taromauri bouannanti. Kakauongo raoi irou ngkai!

⁴Antai ae ko na b'ainikirinna? Antai ae ko na kakanikoa? An tarai moa am bure aika kateinibabako.

⁵Ti te b'ai ae kam iaiangoia bon te wene ni bure i aan taian aroka aika a mawaawa aikai ike a mena iai ami bouannanti aika kam taataromauri. Kam kareaniia natimi i aon taiani baonikarea ake a karaoaki i nanon taian m'arua i aan nanganangan b'aa.

⁶Kam a tia ni baaireia b'a kam na taromauri taian bouannanti aika a karaoaki n taian atiibu; [236] Kam a tia n anganiia taian angab'ai ake te wain ao te uita. N na kukurei n anne?

⁷Kam a tia n taakin ami kainiwene i aon taubukin maunga aika a rietaata, ike kam angakarea iai nakon taian bouannanti.

⁸Ao kam a tia naba ni kaaki n ami auti nako aia banna taiani beekan ni katoobibia ami kainiwene nako. Eng, kam a tia ni katinanikuai, kam kabooa rab'atami nakoia ami tangira, ao kam nako ni wene ma ngaia. [237]

⁹Kam kabira baimi ni b'aan te oriwa ao aekaki ni boiarara nako ngkana kam taromauria te anti are Moreka. [238] Ao kam kakaea naba buokami man tamneia aika a tia ni mate.

¹⁰E ngae ngke kam a bon kakuaingkami ni kakiokioia taian bouannanti, ma kam bon rawa naba n toki. A rangi ni korakora nanomi n te aro are kam bon waaki nako naba.

¹¹Ko m'aninga taekau ao ko a aki kakaonimaki i bukina ngke ko maaka te aomata temanna? Tao I a tia n aki kakarongoa n te tai ae e maan [239] n te aro are ko a aki maakai?

¹²Tao ko taku b'a ko rangi n raoiroi, ma N na kaota te koaua.

¹³Ko na bubutiia am bouannanti akanne b'a a na buokiko ngkana ko a reke n te kangaanga. Taratara raoi, e ti ukaki teutana n angin te wii ao e a ubaranako naba. Ma ngkana ko nako mai nako iu ni kamanoko irou, ao e na riki te aba aei ao au Maunga ae e Tabu aei b'a am b'ai n aki toki.

¹⁴E taku te UEA, “Kaitiaka te kawai! Katauraoia i bukiia au aomata.”

¹⁵E maiu n aki toki Atuara n taiani karawa, ao aei ana taeka: Ngke I maeka n ae e rietaata i eta n te tabo ae e tabu, ma I bon mena naba ikai b'a N na buokiia aika nanorinano aika a ti mwiokoai.

¹⁶au Aomata, e a toki uniu ao I aki manga bukiningkami. B'a bon te tia karikingkami Ngai. I aki tangiringkami b'a e na b'ara nanomi n te aro ae moan te korakora.

¹⁷E kamaraka nanou nanonrangim. Ao bon anne bukina are I katuuaingkami iai ao I ribaa rekeu iroumi, i nanon ami tai n okiri maiumi nikawai aika a bure.

¹⁸I a ataa arom! Ma N na kamaiuko, N na kairiko, ao N na anganiko te mweraoi, ni karokoa te tai are a na anene n nebonebo [240]

¹⁹koraki aika a tang E aoria ngkana ko mena iai, N na kamaiuko Ngai ae te UEA [241] ao N na anganiko te rau.

²⁰Aomata aika a buakaka bon naoni marawa aika akea motirawaia ao a kauekea te bokaboka.

²¹Ma I a tia ni berita Ngai ae te UEA b'a bon akea temanna ae e buakaka ae na maiu n te rau.