Read Te B'aib'ara Itaia 59 Bible Online

Itaia 59 - Te B'aib'ara bible

Itaia 59

¹E tuai ni bua korakoran m'aakan te UEA; E boni konaa naba n ongo ao ni kaekai taiani tataro.

²A riki ami bure b'a taian totoko i marenami ma Atuami. Ao bon anne bukina are e aki kaekai iai ami tataro ke n aki iai noora matana.

³A onrake ami taeka n taiani kewe ao ni iango n tiritiri; a buta tabonibaia ni kabane n te raraa.

⁴Kam bukiniia tem'angina n te aro ni kewe ao kam taekina te kewe n te kabowi ni kaburebure; araia natimi boni buure ma kangaanga.

⁵Kam kang bunnatoin taian naeta aika a rangi ni boitin, ao a m'aiti riki naeta aika a aenako man bunnatoia ake a uki. Kam rarangai ngaon ten takareau,

⁶kam aki konaa ni karaoi taiani kunnikai mani ngaon ten takareau aikai ke ni karabaingkami i akuiia.

⁷Kam waetata nakon karaoan te kaairua ke tiringan konami aika akea aia bure. A akea riki te b'ai ae kam iaiangoia i rarikin te bure; a tiku n urubekebeke taabo akana kam kiitan.

⁸Kam aki ataa aron te maiu i nanon te rau ke karaoan ae e raoiroi nakoia tabem'aang. A b'aoua taiani kawai aika kam karaoi; ao e aki konaa n reke te rau irouia akana a iririingkami.

⁹Bon akea ae e a tia n roko n tei i bukira ke ni uota te motiraoi nakoira. Ti kaantaningaa bongin te oota, ma e ti reke iroura te rootongitong, ao te tairiki ae e ianroo.

¹⁰Ti kaenakoi baira ni kakaaea kawaira, kaanga aroia aomata aika a matakii; a toki waera ngke e tawanou, kaanga ai aron ae e a bong. Bon ti te arona ara taratara ma te aomata ae e a mate. [244]

¹¹Ti kungkung kaanga taiani bea ao ti tang kaanga taian taobe. Ti kaantaningaa te eti ao te tokanikai, ma a biri nako mairoura.

¹²Ai m'aitira te tai ae ti bure ma n tannako mairoum te UEA ae Atuara? E a kabuakakaira ara bure nako! Ti a tia ni karaoa ae e kaairua.

¹³Ti a tia ni kaaitarako ma n rawa n iriko. A iango n aonikai nanora, ngaia are ti b'anga ni kewe iai; ti babaairea aron kabuakakaia tem'aangina ao ti rairaki nako mai roum.

¹⁴E mena te motibuaka n taabo nako; E taraa n raroa nako te motiraoi. E kakioaki nako te koaua man te boowi ni kaburebure; e butuaki nako te raoiroi.

¹⁵A bane aomata n taekina te kewe; tokiia akana a nako man te maiu ae e buakaka bon te urubekebeke. Ngkana e ataia te UEA ae e a tia ni mauna te motiraoi, ao E na bon aki kukurei iai.

¹⁶E na bon rangi n ribaaki riki i rouna ngkana e ataia ae akea ae e konaa ni karaoa anne. Ma ngaia are, e na bon karekea te tokanikai i bukin te koaua n oin baina ae m'aaka.

¹⁷Ana taanga te UEA bon te motiraoi; ao b'arana ni buaka bon te m'aaka ni kakamaiu; kunnikaina bon te un ma te irantaanga.

¹⁸E na rangi n un ngkai te UEA ao e na karaoia nako ia aia kairiribai ake a kaan ma ake a raroa te b'ai naba are a karaoia nako ia ana Aomata.

¹⁹E na buaka kaanga te ieka i nanon te angibuaka ae e korakora. Ane a na karinea ma n neboa arana ae e kamimii botannaomata ake i maeao ao i mainiku.

²⁰Boni Ngai ae te UEA ae I a tia ni berita b'a N na kamaiua te kaawa are Tion ao ana kariki Iakob'a ake a rairaki man aia bure.

²¹E taku te UEA: “Au Aomata, I berita b'a N na anga Tamneiu ma au taeka. E na riki aei b'a au b'aintangira nakoimi ma ami utu n aki toki. Bon aei au taeka Ngai ae te UEA.”