Read Te B'aib'ara Itaia 6 Bible Online

Itaia 6 - Te B'aib'ara bible

Itaia 6

¹N te ririki are e mate iai te uea are Utia, [15] ao I noora te kaotioti i bukin te UEA. E tekateka i aon te kaintokanuea i eta, ao e kaona nanon te Tembora niiniirana.

²Ao a kibakiba ietana b'aai aika a maiu aika a ura aika kakaoneai baiia ni kiba n tatabemaniia nako. A rabuni mataia ni baiia ni kiba ake uaai ao a rabun rab'ataia n ake uaai, ao a kamanenai baiia riki ake uaai ni kibakiba iai,

³ngke a takaarua ni kaangai, “E tabu, e tabu, e tabu, te UEA ae Moan te M'aaka! E on aonnaba ni mimitongina.”

⁴Ao a ruru bouan nako mataroan te Tembora, ao e on te Tembora n te bubu.

⁵Ao I takaarua ni kaangai, “I a reke n te kabuanib'ai! A bane n on n te bure au taeka aika I atong, ao ai uana naba ma aia taeka aomata nako aika i rarikiu. Ma e ngae n anne, ma I a tia n noora te UEA ae Moan te M'aaka.”

⁶Ao e kiba nako iu temanna mai buakon b'aai ake a maiu ma te kooro ae e ura ae anaaki man te baonikarea n te karibai ae te biti.

⁷E riinga riau n te kooro are e kabuebue ao e taku, “E a tia ni boo ma riam. A kab'araaki am bure, ao akea am bure.”

⁸Ao i mwiin aei, ao I ongo ana taeka te UEA ae e kaangai, “Iai ae e konaa n nako? Iai ae e na nako i bukira?” Ao I kaeka ni kaangai, “N na nako, kanakoai!”

⁹Ao i mwiina e a kanakoai te UEA ao I taekina te rongorongo aei nakoia aomata ni kaangai: “Kam na ongo man ongo, ma kam na aki ataa nanona. kam taraia man taraia, ma kam na aki nooria.” Ao e taku naba te UEA,

¹⁰“Karaoaia aomata aikai b'a a na taningabono! bonoti taningaia, rabun mataia, karaoaia b'a a na aki ataa te b'ai teuana. Tai katanimaia nako iu b'a a na kamaiuaki.”

¹¹Ao i mwiina, I a titirakina te UEA ni kaangai, “A toki n ningai baikai?” Ao e kaeka te UEA: Ni karokoa a mauna nako aia kaawa nako ao a rereua aia auti, ni karokoa akea kanoan aia tawaana,

¹²ao a tia ni kanakoaki nakon taabo aika a raroa nako, ma ni kiitan abaia aika a urubekebeke.

¹³E ngae ngkana ti teuana te katebwina aomata n tiku, N na bon tiringiia naba. A na riki b'a kaanga boton kaai aika a tia ni koreaki ni kab'akaaki, [16] A na tiku tabeman au aomata aika a rineaki.