Read Te B'aib'ara Itaia 60 Bible Online

Itaia 60 - Te B'aib'ara bible

Itaia 60

¹Teirake, Ierutarem! ko na oota! E a kaarangaina am bong ae e boou. E rangi n oota nako ootan mimitongin te UEA i aom.

²A rabunaki aonnaba ma aomatana n te roo, ma e oota nako ootan te UEA i aomi.

³A na roko botannaomata nako ma uea nako nakon ootan karaangainan ami bong.

⁴Kauki matam! Taratara nako! A roko taian aomata. I aoni kawaia natimi m'aane n roko man taabo aika a raroa nako; ao a uotaki natimi aine kaanga ataei aika a uarereke.

⁵Ngkana kam noora te b'ai aei, ao a na uremangangaa matami, e na bukibuki manawami ao kam na onrake n te kakatonga. [245] A na bane ni uotaki nakoim baika a kakaawaki man taabo aika a raroa nakoa i aoni marawa ao kaub'aia botannaomata nako.

⁶E na onrake abam n te naani kamero aika ataei mai Miria ao Eb'a; [246] a uoti taiani koora ma b'aai ni kaboiarara b'a b'aini karineau, Ngai ae te UEA kaain Tieb'a [247]

⁷A na bane n nakoim tiibun Keta; taian tiibu m'aane mai Neb'aiota [248] a na riki naba b'a am B'ai. N na butim'aai b'a taian angab'ai ao a na uota te karineaki nakon au Tembora.

⁸Tera te b'ai ane e ieie kaanga taian nang ke kaanga taian taobe aika a okira aia auti?

⁹A tataningaai Ngai ae te UEA ami aomata n abam'akoro aika a raroa nako. [249] A kaira te kawai kaibuke ni m'am'ananga i bukin kaokaia nakon aia auti ma aia tirewa ao aia koora. Boni Ngai ae te UEA ae I karaoa aei i bukin karineaia ami aomata, b'a aonga ni karineai.

¹⁰Ierutarem, e na manga karaoaki oom irouia ianena; e na riki aia tautaeka b'a ami toro. I katuaaeko ngkoa n uniu ao ngkai N na nanoangaiko ao N na akoiko.

¹¹A na uki mataroan am kaawa n te ngaina ma te bong b'a aonga n rin taan tautaeka man botannaomata nako ngkana a kairiia aia aomata nakoim ma kaub'aia ni kabane.

¹²A na bane n kaungaaki botannaomata ma abanuea akana a rawa ni m'akuri i bukim.

¹³A na uotaki nakoim moan raraoin kaain Reb'anon kaai ake teatura, kaai ake bureen, ao kaain ake tiira. A na kamanenaaki n au Tembora i bukin katamaroaan te tabo ike N na katokaa iai waeu.

¹⁴A na bane ni katorobubua i matam aia kariki am kairiribai ake a ribaiko ma ni karaoa ae aki raoiroi nakoim. A na kaangai, “Bon Tion ngkoe, are ana kaawa te UEA, are Atuaia Iteraera ae e tabu.”

¹⁵E riiribaaki ngkoa ao e kiitanaki, ao e katinanikuaki ngkoa irouia aomata nako. Ma N na katikiraoiko, te kaawa ae e na kamoamoaaki i nanon taai aika a nako roko.

¹⁶Ko na atiki kaub'aia uea ma botannaomata nako. Ane ko na ataai b'a te UEA Ngai ae e m'aaka ae Atuaia Iteraera, ae I a tia ni kamaiungkami.

¹⁷N na uoti nakoim te buraonti ma te biti n onea mwiin te kai ma te atiibu; ao n onea mwiin te buraonti ma te biti, N na uota nakoim te koora ma te tirewa. N na rinea te rau ma te motiraoi b'a taan tautaeka ao taan kairiiri.

¹⁸E na aki manga kakiriweingkami te tiritiri, te urub'ai ao te kakeru i aon tian abami nako. Kam na arana oon ami kaawa nako b'a “Tokanikai” ao “Neboaki” b'a aran mataroan ami kaawa nako.

¹⁹Kam na aki kainanoa ootan taai ke nam'akaina. N na riki Ngai ae te UEA ae Atuami b'a ami oota n aki toki ao te tia karekea te karineaki.

²⁰E na aki manga bung ami taai ke ni bung ami nam'akaina. N na riki Ngai ae te UEA b'a ami oota ae akea tokina, ao a na toki ami bong n nanokawaki.

²¹A na maiu raoi ami aomata ma n teimatoa ni b'aina te aba; bon taian aroka ngaia aika I unikia b'a a na neboai.

²²E na riki naba b'a te botannaomata ae e korakora te utu ae te kabanea ni uarereke. Bon te UEA Ngai, ao N na kawaekoaai ni karaoa aei ngkana e roko te tai.