Read Te B'aib'ara Itaia 63 Bible Online

Itaia 63 - Te B'aib'ara bible

Itaia 63

¹Antai ae aei ae roko mai Botira [253] i Etom ma kunnikaina ae e kakiriurauraaki? Antai te aomata ae e kakannato aei ae e m'ananga ma ana kaboraoi ae e mimitong?

²Te naan raa kiri uraura aikai? E Kiri uraura am kunnikai i mwiin toutouan taian kureebe. [254]

³“Bon ti Ngai ae I toutoui taiani kureebe! Bon akea riki botannaomata aika a i buobuoki. I toutouia botannaomata nako i bukin marakin nanou ao e kiri uraura au kunnikai n raraaia.

⁴I karaoa aei i bukina b'a I irantaanga e a roko te tai i bukin kamaiuaia au aomata.

⁵Bon akea ae e mena ikekei ni buokai ke ni boutokaai, e tokanikai n te buaka anganibaiu ae e korakora man uniu.

⁶I toutouia botannaomata ni bonon nanou ao I karaoia b'a a na koro ni manging; a tii nako raraaia nakon taabo nako n te aonaaba.”

⁷N na taekin aron ana m'akuri te UEA aika E a tia ni karaoi. A bon riai n nebonebo! E a tia ni kaota ana akoi te UEA nakoia Iteraera; e a tia n akoi ao ni karaoa ae e raoiroi.

⁸E kamaiuia ana Aomata te UEA, ao e taku, “Bon Au b'ai. A aki konaa ni kam'aneai.”

⁹E mwengabuaka te UEA ngkana e noori aia kaangaanga, ma a kamaiuaki iroun ana Anera. [255] E nanoanga ni koaua te UEA, ai ngaia are, e kamaiuia ana Aomata. E m'aneia ni baina ao e uotia i nanon ririki aikai ni kabane.

¹⁰Ao i mwiina a rairaki ana Aomata te UEA ni manga kaitaraa ao a kananokawakaki Tamneina ae e Raoiroi ae e Tabu. Ma ngaia are, e a manga riki b'a aia kairiribai ao e a manga buakaniia.

¹¹Ma ana aomata a uringa te b'ai are e riki ngkoa n ana tai Moote [256] E bon aki uotiia ngkoa te UEA [257] ma aia taani kairiiri nako ma ni kaawakiniia raoi i nanon taari? E [258] bon aki anganiia ngkoa Tamneina ae e Raoiroi?

¹²E M'aati m'aakan te UEA i rarikin Moote. E na neboaki te UEA n aki toki i bukin bwenauaakin taari.

¹³E kairiia ana Aomata i aon taari kaanga taian aoti aika a biri i nanon te ang n aki tokitoki waeia.

¹⁴E anga te motirawa Tamneina are e Raoiroi nakoia, kaanga nanai ni kao aika a motirawa ngkana a kairaki nakon te m'arua.[259] E neboaki aran te UEA i bukin karaoan b'aai ni kabane.

¹⁵Taiaoka te UEA, taratara rikaaki man am tabo ane e tabu ma ni mimitong ane mwengam ane n taiani karawa ao noora te b'ai ae e riki. Ko a aki tangiria? E ngaa m'aakam? Kaotia b'a ko bon tabeakiniira [260] ao ko nanoangaira!

¹⁶A tia ni kaai ni katinanikuira ara bakatibu ake Aberaam ao Iakob'a. Ma Ko bon teimatoa naba n riki b'a Tamara; Ko a tia n riki b'a te tia kaawakiniira man taai ake ngkoa.

¹⁷E aera ngkai ko karaoira b'a ti na tannako mairoum, ara UEA? E aera ngkai ko karaoira b'a ti na aki tangiria n ongotaeka iroum? Taiaoka bita nanom! Bon am taani m'akuri ngaira, ao bon am aomata ni koaua ngaira.

¹⁸E aki rangi ni maan ni b'ainaki am tembora iroura. [261] ao ngkai a tia ara kairiribai ni kab'aka.

¹⁹Ti karaoa aron ae kaanga ko aki tautaekaniira ke ti tuai aranaki b'a am Aomata.