Read Te B'aib'ara Itaia 66 Bible Online

Itaia 66 - Te B'aib'ara bible

Itaia 66

¹E taku te UEA: Au kaintokanuea karawa ao nnen katokaniwaeu aonnaba. Tera te aekaki n auti ae ko na karaoia ibuku? E nga te tabo ae N na motirawa iai?

²I a tia ni karaoi b'aai nako; ao anne aron rikiia ni kabane. [269] Bon aei au taeka Ngai ae te UEA. Aomata ae I kawakinia riki bon aika nanorinano are a mena aia mwioko irou ao a ruru ngkana I taetae.

³Kam kareani taiani kaom'aane nako iu, ao kam tiriaomata; kam karean taian tiibu ataei nako iu ao kam karean taian kamea nakoia anti tabem'aang; kam karean taiani uita nako iu ao raraan taiani beeki nakon taian bouannanti; kam kabuoki b'ai ni kaboiarara nako iu ao kam neboi ami bouannanti.[270] Kam a tia ni rinea are kam tangiria b'a kam na karaoia ni karaoi m'akuri aika a rangi n ribaaki aikai aika b'aai aika kam rangi n tangiri ni kan karaoi.

⁴Kam rawa n ongo weteami ngke I weteingkami; Kam aki kan ongo nakon au Kaetieti. Ma kam a manga karaoi baika a ribaaki, ngke kam bon ataia b'a a bon kaairua. Ao ngkai N nang katuaaingkami [271] n te aro ae kam na rangi ni maaku iai.

⁵Ngkana kam ruru ngkana e taetae te UEA, ao kam na kakauongo nakon te b'ai ae e taekinna ae e kaangai: “A ribaingkami tabeman aomata ibuku ao a rawa naba iroumi ibuku. A b'ab'ainingare ao a taku, Ke E kaota m'akana te UEA! Ti a mataku i rouna ngkana e anganingkami te kukurei ni koaua.’ [272] Ma ane a na mamaa koraki akana a atong baikai.”

⁶Kam a ongo taian karongoa akekei ake i nanon te kaawa arei ma taian tatakarua aika a nako man te Tembora? Bon takaaruan te UEA ngkai e tabe ni katuaaia ana kairiribai.

⁷Ko a tia n ongongo taekan te aine ae e bungia natina i m'aain ae e mamarakinna?

⁸Antai ae e a tia n ongongo aei ke n iangoia b'a e konaa n riki? E konaa ni bungiaki te botannaomata n ti te bongina? ke ni manga maiu i nanon teuana te teekan? Bon ti te bo Ierutarem ma te tina ae e bungiia natina i nanon te tai are e mamaraki iai.

⁹Bon te UEA ae E kanakoraoa te bung. Ao E na bon nooria b'a e na karikiia natina aika a bati Tion. Boni Ngai ae te UEA ae I taetae.

¹⁰Kukurei ao takaarua, ngkana kam tangira Ierutarem! ngkana kam nanokawaki i bukina ngkoa kam na kakatonga ngkai.

¹¹E na m'aneingkami ao e na anganingkami te mwenga raoi, n aron raoi oin tinami, ni karokoa kam rauaki raoi. Kam na onrake n te kukurei n mimitongina ae e kamimii.

¹²E a tia ni berita te UEA: “N na kataonakoa Ierutarem ni kaub'aia botannaomata nako ao N na karika te kaawa b'a te tabo ae e mari. E na kammammaingkai Tion ni mammana, ao e na uouotingkami ni baina, ao e na b'ab'akoingkami i m'anokana.

¹³N na uouoingkami ikekei kaanga te tina ngkana e uoua natina.”

¹⁴Kam na kukurei ngkana kam nooria b'a a riki baikai; e na manga waekoa riki okin korakorami nakon te rikiraken te uteute ae e a tib'a bwebwerake. Ao ane a ataia aomata b'a e mena te UEA irouia ana taan m'akuri nako ao e un nakoia ana kairiribai ni kabane.

¹⁵E na ruorikaaki te UEA kaanga te ukeukenanti ao a na kaanibuaka aika taian ai. E na rangi n un ao ni katuaaia ana kairiribai n te ai.

¹⁶E na uota te motikitaeka ae e eti ana taeka te UEA ae e ura nakon taabo nako n te aonnaba aei ao e na tiringiia aomata aika a m'aiti.

¹⁷Iai tabem'aang mai buakomi aika a katauraoia ao a nakon te nne n aroka b'a a na taromauriia antiia ianena. [273] Kam kang irikon taiani beeki, taian beru, ao taiani kimoa. Ma N na tiringingkami Ngai ae te UEA i bukin karaoa aei.

¹⁸I ataia b'aai ni kabane aika kam karaoi ao aika kam iangoi! E a roko ngkai te tai [274] are a na ikotaki iai aomata nako aika a kakaokoro aia taeka ao botannaomata nako ni kaota nakoia mimitongiu

¹⁹man kakoauaan te b'ai ae I konaa ni karaoia. [275] N na karokoia taiani nikira ni maiu mai Taretiti, Bura, [276] Ruuta, Meteka, [277] Tubara, Iawan,[278] ni karokoa abam'akoro ake a raroa nako. N na kanakoia b'a a na katanoataa mimitongiu ae e kamimii nakoia botannaomata nako aika a tuai man ongongo taekau.

²⁰A na uotiia mai ami koraki man taiani botannaomata b'a taian karea nako iu, Ngai ae te UEA. A na roko i aon taian aoti, taian kaanibuaka ao kaani m'am'ananga, miure ao taiani kaamero [279] nako Ierutarem, ae Au maunga ae e tabu. A na riki b'a kaanga Iteraera aika a uoti taian karea nakon au Tembora.

²¹N berita nakoia b'a a na riki tabeman mai buakoia b'a taian ibonga ao tabeman b'a taan i buobuoki n au Tembora. Bon aio au taeka Ngai ae te UEA.

²²I berita naba b'a kam na teimatoa ni karikiia kanoami ao a na m'anuokinaki taekaia, kaanga ai aron karawa ae e boou ao te aonnaba ae e boou ae I a tia ni karikia are a na akea tokiia.

²³Ni moanibongin te Toa ae Moan Otin Nam'akaina ao ni katoa Taabati, a na bane aomata nako n taromauriai. Bon aio au taeka Ngai ae te UEA.

²⁴A na otinako au aomata ni kakaai rab'ataia ake a kakaitaraai. A aki konaa ni mate taian ino ikekei, ao e aki konaa n toki uran te ai, ao a na rangi n ribaaki taraan rab'ataia aomata aikai irouia aomata nako.