Read Te B'aib'ara Itaia 8 Bible Online

Itaia 8 - Te B'aib'ara bible

Itaia 8

¹E taku te UEA, “Itaia, karekea te b'ai ae ko na koroboki i aona. Ao koroboki ni kabuuburai manin [23] te ara ae, MAE-TARA-ATI-BATI.[24]

²N na tuanga Uria are te ibonga ao Tekaria are natin Ieberekia b'a a na riki b'a taani kakoaua i bukin te baei.”

³I mwiin tabeua te tai, ao e a reke natira te m'aane mai roun buu, ao e taku te UEA, “Aranna b'a Mae-Tara-Ati-Bati.

⁴i bukina b'a i m'aain ae e konaa n taekina ae e kaangai ‘Mamma’ ke ‘B'ab'aa’, ao e na roko uean Aturia ni buaka man uotinako b'aai ni kabane aika a kakaawaki i Tamateko ao Tamaria.

⁵E manga taetae riki nako iu te UEA:

⁶A tia aomata aikai n aki butim'aea ranin Tiroa aika a raanga ni karaurau [25] ao a tia ni kukurei ni kaaina ana itera te Uea are Retin ao te Uea are Bika.

⁷Ngkai N nang kanakoa uean Aturia b'a e na kaaitaraia ma korakoran ana taanga ni buaka, are e na buakaniia kaanga korakoran te Karaanga are Iuberetiti aika a taonako i mataniwiina nako.

⁸A na kaona Iuta aia tautia kairiribai kaanga te ieka ae e iabuti n roota te roroa. Ma te Atua iroura.[26] E na taakin baina ao e na kamanoa abara.

⁹Ngkami aika botannaomata aika ianena, waaki nako ao katauraoi nakon te buaka. ma ane ko na kamanatuaaki.

¹⁰Ikotingkami ao karaoi ami babaaire nako, ane kam na konaaki b'a e mena iroura te Atua.

¹¹E tauai te UEA ni baina ae e korakora ao e taku: I kauringko! Ko na aki katotoongia aomata aikai.

¹²Ko na tai boboota te iango ni kamangao ti i bukina ngke a karaoia, ao tai maaka te b'ai teuana, ti i bukina ngke a maaku.

¹³Bon ti Ngai ae ko riai ni maakua mani karinea. Bon te Atua ae e tabu Ngai, te Atua ae Moan te M'aaka!

¹⁴Biiri nako iu i bukin b'aai ni kamanoakimi. Bon Ngai te b'aa ae e kaai n kab'akaaki man kamaaeaki iai riin aban Iuta ma Iteraera.

¹⁵Bon te b'ai ni kam'ane Ngai are e na raweia kaain Ierutarem—-a na konaaki ma ni katikitikaki nako.

¹⁶A na riai ni kanikinaeaki au rongorongo man anganaki au reirei.

¹⁷Man te tai arei ni karokoa ngkai, ao I bon tiku naba n onimakina te UEA, e ngae ngke e a aki kukurei iroun Iteraera.

¹⁸Ngai ma natiu bon taian kanikina ni kauring nakoia Iteraera mai roun te UEA ae Moan te M'aaka, are e maeka n te Maunga are Tion.

¹⁹Ane a na kaangai tabeman nakoimi, “Naako kawariia taani kaiwa ake a wiwiirikiriki ke n titirakini tamneia maate. Ma e ngae n anne, ao e riai te botannaomata ni konaa n titirakina oin antina nako

²⁰b'a tera ae e na karaoia.” Bon akea mai buakoia aika a konaa n taetae n aron anne ae e na maiu ma n noora ootan te bong!

²¹A na minomino ni maraki ao a na rangi ni baki n te aro are a na karereantia aia uea ao antiia. Ao ngkana a kataia ni kakaaea buokaia mai karawa

²²ao i aon te aba, e na reke nakoia te kiriwe ao te rotongitong, te kiriwe ae moan te kangaanga ao te rootongitong ae moan te korakora.