Read Te B'aib'ara Nakoaia Ibonga 1 Bible Online

Nakoaia Ibonga 1 - Te B'aib'ara bible

Nakoaia Ibonga 1

¹Ao te UEA, e wetea Moote nako matana i nanon ana Um'antabunrianna,[1] ao e anganna tuua aikai

²i bukiia Iteraera b'a a na karaoi nanoia ngkana a anga aia karea. Ngkana iai temanna ane e anga man aika kawakawa b'a ana karea, ao e riai n anga temanna mai buakon ana nanai ni kao, ke ana nanai n tiibu ao ni kooti.

³Ngkana iai ane e na anga ana man temanna man ana nanai ni kao b'a te karea are kakukureiau,[2] i aon te baonikarea are te buraonti [3] ao e riai n anga ana kao te m'aane ae akea toabuakan rab'atana. E na uotia nakon te UEA i mataroan ana Um'antabunrianna te UEA, b'a e aonga ni butim'aeaki iroun te UEA.

⁴E riai ni katokaa baina te aomata anne i aon atuun ana karea, ao e na butim'aea te karea anne te UEA, b'a te karea ni kab'arabure.

⁵E na tiringaki te kao m'aane ikanne i matan te UEA, ao e na uotaki te raraa nakon te UEA irouia ibonga ake natin Aaron, ao a na tatauriia koonan te baonikarea ake aua n te raraa, are te baonikarea are tei i mataroan te Um'antabunrianna.

⁶Ao e na kuota kunin te man are te karea, ao e na korokoreia ni kauarerekea,

⁷Ao e na karea kanaan te baonikarea te ibonga ma ni kauraa.

⁸Ao a na katokai m'akorokoron taian iriko, ma te atu ma te nenea i aon te baonikarea.

⁹E na bon kaitiaka kanoannanon, ma waen ana man te aomata, ao te ibonga e na kabuoka te karea ni kabane rab'atana i aon te baonikarea. E na rangi ni kakukureia te UEA te angakarea anne.

¹⁰Ngkana iai ane e na anga ana tiibu ke ana kooti, ao e riai n anga te m'aane ae akea toabuakan rab'atana.

¹¹Ao e na tiringnga n tanimeangin te baonikarea, ao a na tatauriia koonan te baonikarea ake aua ibonga n te raraa.

¹²Ao e na anai b'aina nako te ibonga i mwiin korokoreana iroun te aomata, ao e na katokai i aon te ai, n reitaki naba ma atuuna ao neneana.

¹³E na bon kaitiaka kanoannanon ma waen ana karea te aomata, ao te ibonga, e na uota te karea nakon te UEA, ao e na kabuoki ni kabane i aon te baonikarea. E na rangi ni kakukureia te UEA boiararan te karea aei.

¹⁴Ao ngkana e anga te mannikiba te aomata b'a ana karea ni kabuokaki, ao e na riai n anga te taobe b'a ana karea.

¹⁵Ao e na unora roroan te mannikiba arei te ibonga i aon kawaina ngke e uotia nakon te baonikarea, ao e na kabuoka atuun te mannikiba i aon te baonikarea. E na kawawaaea raraan te mannikiba nako rarikin te baonikarea.

¹⁶E na kanakoa b'aani kanana ma b'ain nanona nako [4] ao e na karenakoa i mainikun te baonikarea; n te tabo are nnen te mannang.[5]

¹⁷E na taui bain te mannikiba ni kauoua te aomata, ao e na katikia ni katabwena rab'atan te mannikiba, ma e na aki kounako bain te mannikiba. Ao i mwiina, e na kabuokia i aon te baonikarea. E bon rangi ni kakukureia te UEA boiararan te karea aei.