Read Te B'aib'ara Nakoaia Ibonga 12 Bible Online

Nakoaia Ibonga 12 - Te B'aib'ara bible

Nakoaia Ibonga 12

¹Aikai tuua ake e anga te UEA nakon Moote i bukiia Iteraera. I mwiin bungiakin te nati te m'aane iroun te aine,

²ao e na tiku ni kam'araa te aine i nanon itiua te bong, n ai aron are n ana tai naba n aoraki n aine.

³E na korotabonim'aneaki te ataei n te kawani bong.

⁴Ao manga tenibwi ma tenua riki te bong i bukin kaitiakan raoi mwiin te raraa; e na aki tautaui b'aai aika a tabu, ke n rin i nanon te Um'antabunrianna are e tabu ni karokoa banen raoi ana bong ni kaitiaki.

⁵Ao ngkana e bungia te nati te aine, ao e na tiku ni kam'araa te aine i nanon te bwi ma aua te bong i mwiin bungina, n ai aron naba are n ana tai n aoraki n aine. Ao i mwiin anne, ao e na manga tiku ni kaitiakia riki i nanon onobwi ma onoua te bong, ni kaitiakia raoi i mwiin nakon raraana.

⁶Ao ngkana a bane raoi ana bong ni kaitiaki, b'a tao mwiin bungiakin te nati te m'aane ke te nati te aine, ao e na uota te tiibuteteei ae teuana ana ririki ni maiu b'a ana karea ni kabuokaki,[39] ao te bitin ke te taobe i bukin ana karea ni kab'arabure, ao e na angan te ibonga i mataroan ana Um'antabunrianna te UEA.

⁷Ao te ibonga, e na anga ana karea te aine anne nakon te UEA, ma ni karaoa te angakarea i bukin kaitiakan te aine anne. Ao bon aei te b'ai ae e riai ni karaoia te aine i mwiin bungina.

⁸Ngkana arona b'a e aki kona ni karekea te tiibuteteei te aine, ao e kona ni uoti uoman te taobe ke uoman te bitin, temanna i bukin te karea ni kabuokaki ao are temanna i bukin te karea ni kab'arabure, ao e na karaoa te m'akuri n angakarea te ibonga i bukin kaitiakan te aine anne man kam'araana, ao e na itiaki iai.