Read Te B'aib'ara Nakoaia Ibonga 14 Bible Online

Nakoaia Ibonga 14 - Te B'aib'ara bible

Nakoaia Ibonga 14

¹Aikai tuua ake e anga te UEA nakon Moote

²i bukin kaitiakan te aomata are e a toki mai rouna te rebera.[42] E na uotaki nakon te ibonga te aomata n te tai are e katanoataaki iai b'a e aki kam'araa,

³ao e na kairiia nako te ibonga n tuoa i tinanikun te kaawa. Ao ngkana e a toki reberana,

⁴ao e na tuatua te ibonga b'a a na uotaki nako ina uoman mannikiba aika aki kam'araa, n reitaki ma m'akoron te kai are te tiira, ma te karai ae uraura ao m'aangan te utob'a.

⁵Ao e na manga tuatua te ibonga b'a e na tiringaki temanna te mannikiba i aon te boora are te kaatiibu are kanoaaki n ranin te koburake n ran ae itiaki.

⁶E na anaa te man are temanna, n ikotaki ma b'angun te kai are te tiira, ma te karai ae uraura, ao m'aangan te utob'a, ao e na kateboi ni kabane i nanon raraan te man are tiringaki.

⁷E na tatauriia iai te aomata are e na kaitiakaki man aorakina n te raraa arei itiua te tai, ao i mwiina e na katanoataa te aomata anne b'a e a itiaki. Ao e na anaa te man are temanna ni kakibanakoa.

⁸Ao e na teboka kunnikaina te aomata arei, ao e na korobuataua atuuna, man tebokia; ao e a tib'a itiaki. E a konaa n rin n te kaawa, ma e na aki riirin n um'ana n rianna i nanon itiua riki te bong.

⁹Ngkana e a koro itiua te bong, ao e na manga korobuataua atuuna, ma buaina, ma ana ari, ao buraen rab'atana ni kabane; e na uatiia kunnikaina man teboka rab'atana, ao e a tib'a itiaki raoi.

¹⁰N te kawanua ni bong e na uoti uoman taian tiibuteteei aika m'aane aika akea toabuakan rab'ataia, ao uoman naba tiibu aine aika kaka teuana aia ririki, aika akea naba toabuakan rab'ataia, ao tenua te kirokuraem te buraawa ae renganaki ma b'aan te oriwa, ao te katenim'akoro te riita b'aan te oriwa.

¹¹E na kaira te aomata anne te ibonga ma karea akanne nako matan te UEA ni mataroan ana Um'antabunrianna te UEA.

¹²Ao i mwiina, e na manga anaa temanna te tiibu teteei te aine te ibonga ma te katenim'akoro te riita b'aan te oriwa, ao e na anga b'a te karea ni kabomwi. [43] E na anga b'a te b'ai n tangira nakon te UEA i bukin te ibonga.

¹³E na tiringa te tiibuteteei n te tabo are tabu, are a tiringaki naba iai man aika kawakawa ake i bukin te karea ni kab'arabure, ao te karea ni kabuokaki.[44]

¹⁴E na anaa raraan te tiibuteteei teutana te ibonga, ao e na kararaaea iai reben taningan te aomata are nang kaitiakaki ma waebuan baina are te atai, ao waebuan waena naba are te atai.

¹⁵E na anaa teutana b'aan te oriwa te ibonga, ao e na kab'aroa teutana i nanon baina are te maing,

¹⁶ao e na kateboa tabonibaina are te atai, ma n tatauriia nako i matan te UEA itiua te tai.

¹⁷E na anaa teutana te b'a are i nanon baina, ao teutana raraan te tiibuteteei ni kararaaea iai reben taningan te aomata are nang kaitiakaki, ni ikotaki naba ma waebuan baina are te atai, ao waebuan waena naba are te atai.

¹⁸Ao e na kabanea te b'aa are i nanon baina i atuun te aomata anne. Ao ai anne ngkanne arona ni karaoa te angakarea i bukin te m'akuri ni kaitiaki.

¹⁹Ao i mwiina, e na anga te karea ni kab'arabure ao ni karaoa te m'akuri ni kaitiaki. Ao i mwiin anne, e na tiringa te man aika kawakawa are te karea ni kabuokaki,

²⁰ao e na anga ma te karea are te uita i aon te baonikarea. Ao ai anne ngkanne aron te ibonga ni karaoa te m'akuri ni kaitiaki, ao e a itiaki iai te aomata anne.

²¹Ngkana e rangi ni maiu ni kainano te aomata n te aro are e aki kona ni kareke b'aai aikai, ao e kona ni uota temanna te tiibuteteei ae te m'aane i bukin kaitiakana b'a ana karea ni kabomwi, are te b'ai n tangira nakon te UEA i bukin te ibonga. E kona ni uota ti teuana te kirokuraem te buraawa are renganaki ma b'aan te oriwa i bukin te karea are te uita, ao kateni m'akoron te riita b'aan te oriwa.

²²E na uoti naba uoman te taobe, ao uoman naba te bitin, b'a temanna i bukin te karea ni kab'arabure, ao are temanna i bukin te karea ni kabuokaki.

²³E na uoti nakon te ibonga i mataroan te Um'antabunrianna b'aai akanne n ana kawani bong ni kaitiakaki.

²⁴E na ana te tiibuteteei te ibonga, ni ikotaki ma b'aan te oriwa, ao e na anga nakon te UEA b'a te b'ai n tituaraoi i bukin te ibonga.

²⁵E na tiringa te tiibuteteei, ao e na anaa raraana teutana, ao e na kararaaea iai reben taningan te aomata anne are te angaatai, ao waebuan baina naba are te angaatai, ao waebuan waena naba are te angaatai.

²⁶Ao te ibonga, e na kab'aroa te b'aa i nanon baina are te angamaing

²⁷ao e na kateboa taboni baina iai are te angaatai ma n tatauriia nako itiua te tai i matan te UEA.

²⁸E na kab'aroa naba teutana te b'a n te tabo are mena iai ngkoa te raraa: are reben taningan te aomata arei are te angaatai, ao waebuan baina naba are te angaatai, ao waebuan waena naba are te angaatai.

²⁹E na kabanea ni kab'aroa te b'aa i nanon baina, ao e na kabira iai atuun te aomata arei, b'a bon anne ngkanne karaoan te m'akuri ni kaitiaki i bukin te aomata anne.

³⁰Ao i mwiina, e na anga temanna te taobe ke te bitin

³¹i bukin te karea ni kabuokaki. Ao anne ngkanne aron te ibonga ni karaoa te m'akuri ni kaitiaki.

³²Ao bon anne ngkanne taian tua i bukin te aomata ae reke i rouna te rebera, ma e aki kona ni karekei b'ain te m'akuri ni kaitiaki aika tangiraki n aron ae b'ainaki.

³³Aikai Tuua ake e anga te UEA nakon Moote ma Aaron,

³⁴ake tuan te rebera[45] are a reke n auti nako. (A na kamanenaaki tuua aikai irouia Iteraera ngkana a rin n te aba are Kanaan, are te aba are E a kaman anganiia te UEA b'a abaia.)

³⁵Ngkana e kunea te aomata temanna b'a E karokoa te rebera te UEA n ana auti, ao e na riai n nako n tuanga te ibonga taekan te rebera anne.

³⁶E na tuatua te ibonga b'a a na bane ni kaotinakoaki b'aai ni kabane man te auti i m'aain ae rin nako n tuoa te b'ai anne; b'a ngkana aki kaotinakoi b'aai man te auti, ao a na bane ni kam'araa b'ain te auti anne ngkana e tuoa te ibonga ao e na katanoata b'a e a kam'araa te auti anne. Ngkana a tia ni kaotinakoaki b'aai ni kabane, ao e a tib'a kona n rin

³⁷ma n tuoa te rebera arei. Ao ngkana e nooria b'a kaanga e kun, ke baauraura man tabe n rinnako nako nanon oon te auti,

³⁸ao e na otinako man te auti anne, ao e na rokana te auti anne i nanon itiua te bong.

³⁹E na manga okira te auti anne n te kaitiua ni bong ni manga tuoa riki. Ao ngkana e tabe n rakanako te rebera arei,

⁴⁰ao e na tuatua b'a e na uruakaki burikin te auti n te tabo are e riki iai te rebera arei, ao a na teweaki nako buriki akanne nako tinanikun te kaawa n te tabo are kam'araa.

⁴¹Ao i mwiin anne, ao e na manga tuatua b'a e na kabaneaki ni kaakaraki oon nanon te auti, ma te buraatita, ma ni karenakoaki i tinanikun te kaawa n te tabo are e kam'araa.

⁴²A na manga kamanenaaki atiibu aika boou n onei mwiin ake a tia ni kanakoaki, ao e na kanim'aki naba te buraatita ae boou i aon te o.

⁴³Ngkana e a manga kaoti naba te rebera arei i nanon te auti ngke e a tia ni kanakoaki atiibuna, ma ni kaaraki nako buraatitana,

⁴⁴ao e na manga nako riki te ibonga n nooria. Ao ngkana e a manga kaoti naba te rebera arei, ao e a bon kam'araa te auti anne.

⁴⁵E na kamaeaki te auti anne, ao a na bane ni karenakoaki atiibuna ma buraatitana i tinanikun te kaawa n te tabo are kam'araa.

⁴⁶Ngkana iai ane rin n te auti anne n te tai are e rokanaki iai, ao e na kam'araa te aomata anne ni karokoa te tairiki.

⁴⁷E na uatiia kunnikaina te aomata are wene, ke e am'arake n te auti anne.

⁴⁸Ngkana e a manga oki te ibonga, ao e aki manga kaoti te rebera arei i mwiin oneakin buraatitana, ao e na katanoataa te auti anne b'a e a itiaki, b'a e a tia ni kanakoaki te rebera mai iai.

⁴⁹Ao i bukin ngkanne kaitiakan te auti anne, a na karekeaki uoman te mannikiba, tabeua ma n te kai ae te tiira, te karai ae uraura, ao m'aangan te utob'a.

⁵⁰E na tiringa temanna te mannikiba i aon te boora te tano are iai kanoana are ranin te koburake n ran.

⁵¹Ao e na manga anaa te kai ae te tiira ma te karai ae uraura, ao te mannikiba ae maiu, ao e na kateboi ni kabane i nanon raraan te mannikiba are e a tia n tiringaki, ao i nanon naba ranin te koburake n ran.

⁵²Ao i mwiina, e na anaa te kai ae te tiira ma te karai are uraura, ao te mannikiba are maiu, ao e na kateboi i nanon raraan te mannikiba are e a tia n tiringaki, ao i nanon naba ranin te koburake n ran. Ao e na tatauriia iai te auti itiua te tai.

⁵³Ao i mwiina, e na kakibanakoa te mannikiba are maiu. Ao ai anne ngkanne arona ni karaoa te m'akuri ni kaitiaki i bukin te auti, ao e a itiaki te auti anne.

⁵⁴Ao akanne tuua i bukin aorakin te kun;

⁵⁵te kinaka, te ngongo, te baauraura,

⁵⁶ke aorakin te kunnikai ke te auti.

⁵⁷Bon aikai tuua ake a kona n tuangko b'a e kam'araa te b'ai ke e raoiroi.