Read Te B'aib'ara Nakoaia Ibonga 16 Bible Online

Nakoaia Ibonga 16 - Te B'aib'ara bible

Nakoaia Ibonga 16

¹E taetae te UEA nakoni Moote ngke a tia ni mate uoman m'aane natin Aaron, ake a tiringaki ngke a anga te ai are aki tabu nakon te UEA.

²E taku te UEA, “Tuanga tarim are Aaron b'a e na aki rin i nanon te Tabo are Moan te Tabu n te tai n aki akaaka, i bukina b'a anne te tabo are I kaoti iai n te nang i aon matan te Atiniberita. Ngkana e aki ongotaeka ao e na tiringaki.

³Ko na riai n anga te kaom'aane b'a te karea i bukin am bure nako[47] ao te tiibu m'aane i bukin te karea are kakukureiau [48] ngkana ko na rin te tabo are Moan te Tabu aei.”

⁴Ao E anga te UEA kaetieti aikai. I m'aain rinin Aaron nakon te Tabo are Moan te Tabu, e na riai moa n tebotebo ao e na karina kunnikaina n ibonga: te niiniira ao te kawaerake, te bare, ao te m'aita.

⁵Ao e riai te bootaki n Iteraera n anga uoman taiani kooti aine i bukin te karea ni kab'arabure ao i bukin te karea ni kabuokaki.

⁶E na riai n anga te kaom'aane i bukin te karea i bukin kab'araan aia bure kaain ana utu.

⁷Ao i mwiina, e na uoti kooti akana uoman akanne nakon mataroan ana Um'antabunrianna te UEA ike E mena iai.

⁸Ao e na karaoa te kaiwa [49] ikanne, n atiibu aika uoua, te atiibu teuana e m'aakenaki “i bukin te UEA,” ao are teuana i bukin “Ataera”.[50]

⁹E na riai Aaron n anga te karea are e rineaki n te kaiwa are te karea ni kab'arabure.

¹⁰Te kooti are e reke b'a ana b'ai Ataera e na kaotaki ni kamaiuaki nakon te UEA, ao e na kabirinakoaki nako nanon te rereua nakon Ataera, b'a e na uoti nako aia bure aomata.

¹¹Ngke e anga te karea Aaron are te karea ni kab'arabure bon i bukina ma ana utu,

¹²e na riai n anaa baanin te ai ae e on n te kooro ae e ura man te baonikarea, ao uaabuata te b'ai ni kaboiarara are e kaakabubuaki, ao e na uoti nakon te Tabo are Moan te Tabu.

¹³E na kaaki te b'ai ni kaboiarara are e kaakabubuaki i aon te ai i matan te UEA, ao e na waerake bubuna n taona aon matan te Atiniberita b'a e aonga n aki mate.

¹⁴E na anaa teutana raraan te kaom'aane n tabonibaina, [51] ao e na kaitiua tataaurian etan tani mainikun te Atiniberita iai. [52]

¹⁵I mwiin anne, e na tiringa te kooti i bukin kab'araan aia bure aomata, ao e na uota raraana nakon te Tabo are Moan te Tabu, ao e na taataauria aon matan te Atiniberita, ao i mwiina, nanoaan te Atiniberita, n aron are e karaoia naba ma raraan te kaom'aane.

¹⁶Ao e na waakinaki te bootaki n aron anne i bukin kaitiakan te Tabo are Moan te Tabu man kam'araia Iteraera ao man aia bure ni kabane. E riai ni karaoa aei nakon te Um'antabunrianna naba kioina b'a e tei i nuukan te maeka, are e bon aki itiaki.

¹⁷E na riai n akea te aomata i nanon te Um'antabunrianna n te tai are e tuai n rin iai Aaron n te Tabo are Moan te Tabu b'a e na karaoa te kaitiaki ni karokoa otinakona. Ngkana e tia ni karaoa te waaki ni kaitiaki i bukina ma ana utu,

¹⁸ao e na manga otinako nakon te baonikarea are b'aini kabuokan taiani karea, ao e na kaitiakia. E na riai ni uota teutana raraan te kaom'aane, ao teutana raraan te kooti, ao e na kaaki teutana i aon koron koonan te baonikarea.

¹⁹E na tatauriia teutana te raraa nako aon te baonikarea itiua te tai. Ao e na kaitiaka te baonikarea n te aro anne man aia bure Iteraera ao e na manga katabua.

²⁰Ngkana ko a tia ni kaitiaka te Tabo are Moan te Tabu, te Um'antabunrianna, ao te baonikarea are te buraonti, ko na uota te kooti ni kamaiua nako matan te Um'antabunrianna.

²¹Ao ko na katokai baim i aona ikekei, ngke ko tabe ni kaoti aia bure aomata ake a tia ni karaoi, ao ko na rinea temanna are e na kaira te kooti nakon te rereua, b'a e aonga ni uotinako aia bure nako.

²²Ao n tokina te kooti e na uoti nako rawaawatan aia bure Iteraera ma ni kab'akai i kabin te rereua.

²³Ao i mwiina, e na nako Aaron n rin n te Um'antabunrianna, e na buuta te kunnikai n ibonga are e a tia ni karinna i m'aain rinna n te Tabo are Moan te Tabu, ao e katikui ana kunnikai ikekei.

²⁴E na tebokia i nanon te Tabo are e tabu ao e na karina are boni kunnikaina. Ao i mwiin anne, e na otinako n anga te karea ni kabuokaki i bukin kanakoan oin ana bure ao aia bure aomata.

²⁵E na waerake bubun nenean taiani karea aikai i aon te baonikarea te buraonti.

²⁶E na tebokia naba te aomata are e kaira te kooti nakon te rereua ma ni kanakoa nakon te anti are Ataera, ao e na uatiia naba kunnikaina i m'aain okiran te maeka i rouna.

²⁷A na uotaki nikiran b'ain te kaom'aane ao raraan te kooti are e uotaki raraana nakon te tabo are Moan te Tabu, ao e na manga uotaki ni kaotinakoaki i tinanikun te maeka ma ni kabuokaki.

²⁸E na riai n tebotebo te aomata ma n onika kunnikaina i m'aain okina nakon te maeka.

²⁹Ni katebwinan bongin te kaitiua n nam'akaina: kam na aki am'aam'arake ni kaota nanokawakimi i bukin ami bure, bon akea temanna, n reitaki naba ma Ianena akana a maeka i buakomi, ao akea naba temanna ae kariaiakaki ni m'akuri.

³⁰Aio te bong are e na karaoaki iai te angakarea i bukin kab'araan ami bure i matau,

³¹ao man te tai aei, e na bukamaruaki ni katoa ririki. Kam na aki am'aam'arake ma ni karika te bong aei b'a te bong ni motirawa n aron te Taabati.

³²E na riai n anga ana karea te ibonga are e rietaata i bukin kab'araan te bure, ao e na kunnikainna n taian riinen aika tabu.

³³E na anga taiani karea aikai i bukin te Tabo are Moan te Tabu n te Um'antabunrianna, ao te baonikarea are te buraonti, ibonga ni kabane ao te bootaki ni Iteraera.

³⁴Kam na riai ni bukamarua te bong aei ni katoa ririki b'a boni Bongin Te Kab'ara Bure i bukin aia bure Iteraera ni kabane. E karaoi raoi b'aai ni kabane ake e tuangaki Moote iroun te UEA.[53]