Read Te B'aib'ara Nakoaia Ibonga 19 Bible Online

Nakoaia Ibonga 19 - Te B'aib'ara bible

Nakoaia Ibonga 19

¹E taku te UEA nakoni Moote

²kaangai nako ia Iteraera:

³Karinea tamam ma tinam, katabua te Taabati,[58]

⁴ao tai karaoi bouannanti ke katotoongan te b'ai teuana. Bon te UEA Ngai ae Atuami.

⁵Ngkana kam anga ami karea b'a te karea n raoi, taraia b'a a na iraki raoi nanon au Kaetieti.

⁶Kam kona ni kang iriko i nanon te bongi n anga karea ke n te bong are i mwina, ma kam na riai ni kabuoki nikirana ni karokoa te katenua ni bong.

⁷Ngkana kam kana tabeua mai iai i nanon te katenua ni bong, ao e na riki te karea anne b'a te b'ai ae e kam'araa nako Iu, ao N na aki butim'aia.

⁸Ma arona, kam na katuaeaki i bukin aki karinean baike I tuangngkami b'a a tabu, ao kam na aki riki b'a Iteraera.

⁹Ngkana kam taii ami uaanikai aika a uangingi, ao n taai nako katikui ao katei tabeua i mataniwiin nako ami nne n aroka, ao tai anai uaa akana a b'aka mai iai nako aontano.

¹⁰Tai taeki baan arokami kureebe ni kaitiaki ke ni booti uaana akana a b'aka. Katikui i bukiia akana a aki kaub'ai ma iruwa akana a maeka i buakomi. Bon te UEA Ngai ae Atuami.

¹¹Tai iraa, tai kewe, ao tai kam'aneia raomi.

¹²Tai kabonganaabuaka Arau ni karaoan berita aika kam na bon aki kaawakin. Bon te UEA Ngai ae Atuami.

¹³Tai iraa ke tao ni kam'anea temanna, ao tai toki ni kab'akai booia ami taani m'akuri ni katoa tokin te bong.

¹⁴Bon te UEA Ngai ae Atuami, ao I tuangngkami b'a kam na tai b'ainigareiia akana a bonotaninga, ke tao ni kab'aka te matakii.

¹⁵Karaoa te eti n taai nako, e aki akaaka b'a antai ane e motikaki taekana tai i nanonano i bukina b'a tao te aki kaub'ai ke tao te kaub'ai.

¹⁶Tai riki b'a te tia wiwinanti, ao tai tatab'ara n taetae n te kabowi, ti ngkana e na boni maiu temanna n am kaotioti.

¹⁷Tai tab'ara ni karaoa te kaetieti ae bon riai. E ngae n anne, ao e bure ngkana e aki kaetaki te aomata ane e bon tangira kaetana.

¹⁸Toki man te unun ao tai kataia ni kabooa kaim. Bon te UEA Ngai ae Atuami, ao I tuangngkami b'a kam na kakorakorai ngkami n tangiriia raomi n ai aron tangirakimi i boni i roumi.

¹⁹Kamenaia am nanai ni man aika kawakawa aika ti te arona b'a a na boni kariki i rouia, ao tai uniki uaekaki te aroka i nanon te tawaana ae ti teuana ke tao ni b'ain kunnikai aika a karaoaki man moti ni kunnikai aika uaekaki.

²⁰Te m'aane ngkana e wenenibure ma te toro te aine ae e a tia ni berita ma temanna n te mare, e riai te m'aane anne ni kab'aka te tuua, ma a na aki kamateaki. E ngae n anne, ma e bon teimatoa naba n riki b'a te toro n te tai anne.

²¹E riai te m'aane n uota te tiibu te teei nakoni mataroan te Um'antabunrianna, ao n angan te ibonga b'a e na anga b'a te karea nako Iu b'a e aonga ni kab'araaki ana bure.

²²E na karaoa te m'akuri ni kaitiaki nakon te m'aane aei te ibonga i bukin kaitiakan ana bure, ao te Atua e na kab'araa ana bure.

²³Ngkana kam roko n te aba ao kam na uniki aroka aika na uaa, ma kam na aki kang uaaia i nanon te moan tenua n ririki.

²⁴I nanon te kaaua n ririki ao a riai ni kaokoroaki te naan uaa b'a kaotan te kakaaitau

²⁵nako Iu, Ngai ae te UEA ae te Atua. Karaoa aei, ao n te kanimaua n ririki aroka akekei a na karikii uaaia aika a na rangi ni bati b'a kanami.

²⁶Tai kana irikon man aika kawakawa n aki akaaka. Tai karaoi m'akuri n tabunea.

²⁷I tangiringkami b'a kam na aki iman iran atumi, ke ni koroi buaimi,

²⁸ke ni korokoroingkami, ke n taitaiingkami i bukin taromaurian te mate.

²⁹Tai kariaia natimi aine b'a a na riki b'a ainen matawaan te tembora, b'a e kona n riki aei b'a kamaamaeaia ao kamaamaean naba te aba.

³⁰I tuangngkami b'a kam na karinea te Taabati ao te tabo are I taromauriaki iai.

³¹Tai karikingkami ni kam'araa nako Iu ni kawarakiia aomata aika taku b'a a kona n taetae ma te mate.

³²I tuangngkami b'a kam na kaota karineakiia aomata aika a kara, ao ongotaeka nako Iu n te maaku ma te rurubenebene.

³³Tai kaebuiia iruwa akana a maeka i abami.

³⁴Ma karaoa ae e raoiroi nakoia n ai aron ae ko karaoia nako ia kaain te aba, ao tangiriia n ai aron tangiram. Uringnga, bon te naa n iruwa ngkami ngkoa n te aba are Aikubita. Boni Ngai te UEA ae Atuami.

³⁵B'aina raoi te eti, ao tai iraa ngkana ko katinea te b'ai teuana, ke tao ngkana ko baaea te b'ai teuana.

³⁶Kabonganai b'ai ni baire aika a eti n aron, te kainikatine, te b'ai n anai ab'aki, Ngai te UEA ae Atuami, are I kaotinakoingkami mai Aikubita.

³⁷Kam na ongotaeka nakon au tua nako.