Read Te B'aib'ara Nakoaia Ibonga 2 Bible Online

Nakoaia Ibonga 2 - Te B'aib'ara bible

Nakoaia Ibonga 2

¹Ngkana iai ane anga ana karea are te kaaitau [6] nako iu, ao e na riai moa ni kamanta raoi ana buraawa, ao e na renganna ma b'aan te oriwa, ao te b'ai ni kaboiarara are e kaakabubuaki,

²ao e na uoti nakoia ibonga ake natin Aaron. Ao e na abuta te abutana te buraawa te ibonga, ma b'aan te oriwa, ao te b'ai ni kaboiarara are e kaakabubuaki ni kabane, ao e na kabuoki i aon te baonikarea b'aai ake tatabeuta akekei man taian am'arake ake karea b'a kaanga ai onean mwiin naba te am'arake ni kabane are te karea nakon te UEA. E rangi ni kakukureia te UEA te karea aei, are te am'arake.

³Ao a na b'aina nikiran te karea ibonga. A rangi n tabu am'arake aikai i bukina ngke a anaaki man am'arake ake taian karea nakon te UEA.

⁴Ngkana kam na b'aina te kariki are umunaki n te ai n umum b'a ami karea, ao kam na aki itina. Kam na karaoa te kariki ae maten, ae renganaki ma b'aan te oriwa, ke te kariki ae manii, ae bururuaki aona ni b'aan te oriwa.

⁵Ngkana e kukanaki te kariki are te karea n te b'ai ni karao keeke, ao e na renganaki burawana ma b'aan te oriwa, ma e na aki itinaki.

⁶E na korokoreaki ni kauarerekeaki, ao e na kab'aroaki riki te b'a i aona. Ao anne ngkanne aron karaoan te karea are te uita nakon te UEA.

⁷Kam na riai n rengana te buraawa ma b'aan te oriwa ngkana kam na kukana ami kariki are te karea n te baan.

⁸Uoti ami karea nakon te UEA, ao angan te ibonga are a na manga uoti nakon te baonikarea.

⁹Ao e na anai tatabeuta mai iai te ibonga b'a kaanga arina, are e na anganaki te UEA, ao e na kabuokia i aon te baonikarea. E na rangi ni kakukureia te UEA boiararan te am'arake aei are te karea.

¹⁰Aia b'a ibonga nikiran te karea; e bon rangi n tabu te am'arake anne i bukina ngke a anaaki man taian am'arake ake taian karea nakon te UEA.

¹¹Bon akea temanna ae na anga nakon te UEA ana karea are te uita ae e itinaki. Kam na bon aki kamanenaa te iti ke ana karewe te manibeeru n te am'arake are te karea nakon te UEA.

¹²Kam na uoti ami karea are uaan te moan tai n te ririki, ma kam na aki kabuoki i aon te baonikarea.

¹³Kam na taoron ami karea ni kabane ake uita, i bukina b'a bon kanikinaean ana berita te UEA ma ngkami te taoro (Kam na taoron ami karea ni kabane.)

¹⁴Kam na anga te uita are e tinimaki ke te uita are kamantaki teutana.

¹⁵Ao kam na renganna ma b'aan te oriwa, ao te b'ai ni kaboiarara are e kaakabubuaki.

¹⁶Ao e na anai tatabeuta man baikanne te ibonga ni ikotaki ma b'aan te oriwa, ao te b'ai ni kaboiarara are e kaakabubuaki ao e na kabuoki b'a am'arake aika taian karea nakon te UEA.