Read Te B'aib'ara Nakoaia Ibonga 23 Bible Online

Nakoaia Ibonga 23 - Te B'aib'ara bible

Nakoaia Ibonga 23

¹E tuangaki Moote iroun te UEA

²b'a e na tuangiia Iteraera ni kaangai: I a tia n rinei taai i bukimi b'a kam na bootaki n taromauriai.

³Iai onoua ami bong ae kam kona ni karaoi ami m'akuri iai, ma e tabu te kaitiua ni bong ni katoa wiiki i bukina b'a bon au bong. E aki akaaka b'a kam mena ia, ma kam riai ni motirawa n te Taabati[60] ao ni bootaki n taromauri iai. E na tai bitaki te tua aei.

⁴Tataekin tooa aikai n taia.

⁵Te Riao bon ami tai naba ni bootaki n taromauriai, ao e riai n rungaaki n tairikin katebwi ma aua ni bongin te moan nam'akaina

⁶E moa te Toa are te Kariki ae Aki Karikaki mani katebwi ma nimauan naba te nam'akaina aei; e na karaoaki i nanon itiua te bong, ao i nanon boong aikai kam riai ni karineai ni kanakin te kariki ae e aki karikaki.

⁷Ni moani bongin te toa aei kam riai ni motirawa man ami m'akuri nako ao kam na bobotaki n taromauri.

⁸Ni katoa bong i nanon tain te toa aei kam riai n angakarea. Ni kabaneani bongina kam riai naba ni motirawa man ami m'akuri nako, ao kam na bootaki n taromauriai. Akea te m'akuri teuana ae e na karaoaki iai.

⁹E tuangaki Moote iroun Te UEA

¹⁰b'a e na kaangai nakoia Iteraera: Ngkana kam rin n te aba are N anganingkami, ao kam na anganai te moani b'ab'ati ni uaa nako. Ma ngaia are, angan te ibonga

¹¹n te bong are i mwin te Taabati. E na tabekia rake [61] ni katabua nako Iu, ao N na butim'aia.

¹²Kam riai n anga te karea ni kakukureiai. Ma ngaia are, angan te ibonga te tiibuteteei ae ai tib'a teuana ana ririki ae akea naba nukana,

¹³n ikotaki ma uoua te kiro te buraawa ae e manti raoi ae e renganaki n te oera. E na katokaa i aon te baonikarea are te buraonti, ao e na kanakoa nako Iu n te bubu ae e boiarara ae e kakukureiai. I rarikin naba baikai, kam riai naba n uota teuana te riita te wain b'a te karea ae te mooi.

¹⁴Boni ngai Atuami, ao I ribaingkami ni kana te uaanikai ae e uangingi ae e boou, ke te b'ai teuana ae e karaoaki mai iai, ma ti ngkana kam a tia n anganai moa te karea aei. E na tai bitaki te tua aei. E taku te UEA:

¹⁵Itiua te wiiki i mwiin kareanakin b'ab'ati ni uaa aika a uangingi aikai, ao utu n tatabeua nako a riai n uota te karea ae boou ae uaanikai aika a uangingi.

¹⁶Karaoa raoi aei i mwin nimabwi te bong, ae bon te bong are i mwiin te kaitiua n Taabati.

¹⁷Uoti uoua kariki ni buraawa b'a a na tabekaki rake ni katabuakaki nako Iu. Kariki ni buraawa aikai n tatabeua nako a na karikaki ma te iti ao uoua te kiro te buraawa ae manti raoi ake mani moani m'akoron ami tai.

¹⁸N te tai naba aei, ao Iteraera a na riai n uoti itiman te tiibu teteei aika ai tib'a kaka teuana aia ririki, temanna te kao te teei ae te m'aane, ao uoman tiibu aine. Man aika kawakawa aikai a riai n akea nukaia, ao a riai ni kareanaki b'a karea ni kabuokaki nakon te UEA, n raonaki ma karea ake a uangingi, ao te karea are te mooi te wain.

¹⁹Kareana te kooti b'a te karea i bukin te bure, ao uoman tiibu aika kaka teuana aia ririki b'a te naa ni karea n raoi.

²⁰E na tabeki rake te ibonga tiibu aikai ma te kariki ni katabuaki nako Iu. A tabu karea aikai ao bon au b'ai n tangira nakoia ibonga.

²¹Aio bon te bongi n runga ma n taromauri, ae te tai ni motirawa man ami m'akuri. Ngkami ma kanoami kam riai n ongotaeka nakon te tua aei.

²²Ngkana kam taii ami uaa ake a uangingi, katei tabeua n taai nako i rarikin nako ami tawaana ao tai anai akana a b'aka nako aontano. Katikui nakoia ake a kainano ma iruwa akana a maeka i buakomi. Bon te UEA Ngai ae Atuami.

²³E tuangaki Moote iroun Te UEA,

²⁴b'a e na kaangai nakoia Iteraera: E na riai n riki moa ni bongin te kaitiua n nam'akaina b'a te bongi ni motirawa ae e b'anin. Ma ngaia are, n tangin te naa ni bu, ao kam riai ni bootaki n taromauri ao n angakarea i aon te baonikarea.

²⁵Kam na anga te karea are te am'arake nakon te UEA, ao kam na tai karaoa te m'akuri teuana iai.

²⁶E taku te UEA ae te Atua nakoni Moote,

²⁷N te Katebwina ni bongin te kaitiua n nam'akaina bon te Bong ae Kakannato i bukin te Kab'arabure: [62] Boni bongin te taromauri; a riai aomata ni kabane n aki am'arake ni kaota nanokawakiia i bukin aia bure, ao a riai ni kabuokaki karea.

²⁸Akea ae e na m'akuri n te bong anne, bon te Bong i bukin te Kab'arabure, ike N nang anganaki iai te naa ni karea, b'a I aonga ni kab'arai ami bure.

²⁹N na kamaunaa ane e rawa ni karaoa te aki mamatam.

³⁰Bon akea temanna irouia au aomata ae e na karaoa te m'akuri naba teutana n te bong anne, ngkai ao ni boong aika a na roko. N na kanakoia akana karaoa te m'akuri.

³¹Bon akea te m'akuri teuana ae kam na karaoia. Aio te tua ae na karaoaki nanona i roumi irouia ami roro nako, n taabo nako.

³²Mani bungin taai ni karuaiwan bongin te nam'akaina nakon bungin taai ni katebwinan bongina kam na motirawa iai, ao akea te bae kam na kanna naba iai.

³³E tuangaki Moote iroun te UEA

³⁴b'a e na kaangai nakoia Iteraera: Ni moanaki mani katebwi ma nimauani bongin te kaitiua n nam'akaina n reiti nako ni karokoa itiua te bong, ni kabane te koraki a na kauringa te Toa ae M'anganikaai i bukin karineau.

³⁵Akea temanna ae e na karaoa te m'akuri ni moani bongin te toa, bon te tai n roko i bukin te taromauri.

³⁶E na angakarea te aba i aon te baonikarea i nanon itiua te bong. Ao n te kawani bong bon tain naba te motirawa ae e b'anin, ao bon te bongi naba n angakarea i aon te baonikarea, ao n roko ni bootaki n taromauri.

³⁷I a tia n rinei taian toa aikai b'a aia tai au aomata n roko ao ni bootaki n taromauri, ao n anga naba te naa ni karea aika maan aika kawakawa, uaanikai aika a uangingi, ao te wain. E na anga te aba karea aikai ni bongiia.

³⁸A riai n rungaaki tooa aikai b'a raon te Taabati, ao taai naba ake kam anga b'aintangira iai, ao n raon naba karea i bukini kaawakinan te berita ke karea n anganano.

³⁹Uringnga ni moana te Toa ae M'anganikaai mani katebwi ma nimauan bongin te kaitiua n nam'akaina i mwin taian ami uaa. Rungaa te toa aei i nanon itiua te bong ni karineai, ao tai karaoa te m'akuri ni moani bongina, ke n te bong are i mwin te runga.

⁴⁰Anai moan uaan arokami ao koroi m'aangana akana a bati baana ni kabonganai n tain te runga ni kukurei aei i bukin karineau.

⁴¹I tuangngkami b'a kam na rungaa te toa aei n te kaitiua n nam'akaina ni katoa ririki.

⁴²A riai ni maeka Iteraera n te naan um'anrianna i nanon itiua te bong,

⁴³b'a a aonga n ataia rooro aika a na roko b'a I kamaekaia aia bakatibu i nanon um'anrianna ngke I kaotinakoia mai Aikubita. Boni Ngai te UEA ae Atuami.

⁴⁴Aio aroni Moote n tuangiia Iteraera aron rungaakin ana toa te UEA.