Read Te B'aib'ara Nakoaia Ibonga 25 Bible Online

Nakoaia Ibonga 25 - Te B'aib'ara bible

Nakoaia Ibonga 25

¹Ngke e mena Moote i aon te Maunga are Tinai, ao te UEA e tuangnga

²b'a e na kaangai nakoia Iteraera: Ngkana kam a tia n roko n te aba are N na anganingkami, ao e riai te motirawa teuana te ririki ni katoa itiua te ririki.

³Kam kona n unukii uita ma kureebe i nanon onoua te ririki,

⁴ma n te kaitiua n ririki kam na riai ni kamotirawai ami tawaana ma ami nne ni kureebe b'a karineakiu, ngai ae ami UEA.

⁵Aio bon tain te motirawa ae e b'anin i bukin ami tawaana ma ami nne ni kureebe, ma ngaia are, tai anai te naan uaa mai iai.

⁶E ngae n anne, ma ngkami ma ami toro ma ami taani m'akuri akana a tangoaki,

⁷n ikotaki ma ami man aika kawakawa akana a manana ma akana aki manana, a na am'arake man aroka aika bon riki i rouia.

⁸E taku te UEA nakoia ana Aomata: Ni katoa abwi ma ruaiwa te ririki

⁹n te katebwina ni bong n te kaitiua n nam'akaina, ae te Bong ni Kab'arabure, a na katangaki te naa ni bu i aon te aba ni kabane.

¹⁰E tabu te kanimabwi n ririki, bon te tai n inaomata ma ni kukurei ngkae a nangi bane n oki oin aia b'ai aomata nako, ao tooro a nang okiri mwengaia n aia utu nako.

¹¹Aei bon ririkin te kukurei ae kororaoi, ma ngaia are, tai ununiki ao tai rikoi uaanikai man ami tawaana ma ami nne ni kureebe.

¹²N tain te kukurei ae tabu aei kam na ti am'arake mani kaai ake a bon riki i rouia.

¹³N ririkin te Iubire aei, ao a riai ni bane n oki b'aai nakoia naake bon aia b'ai.

¹⁴Ma ngaia are, ngkana kam kabooa ni karekea ke tao kam kabooa nako te tabo n ununiki, baairea raoi boona ao tai babakanikawai.

¹⁵E na riai ni baireaki boona mani m'aitin te uaa are e na kona ni karekeaki mai iai i m'ain rokon Ririkin te Iubire are e na roko.

¹⁶Ngkana tao e rangi n ab'ab'aki te tai i m'ain rokon te Iubire anne, ao e na buubura boona, i bukina b'a te baere e kabooaki ni karekeaki bon te uaa are e na reke man te aba anne.

¹⁷Boni Ngai te UEA ae Atuami, ongotaeka i Rou ao tai kataia ni baabakanikawaiia tabeman.

¹⁸Ngkana kam ongotaeka nakon au tua nako ma au reirei, ao kam na maeka ma te rau n te aba,

¹⁹ao kam na kim'areirei ni uaana aika bati.

²⁰Tai kataia n raraoma i bukin kanami i nanon te kaitiua n ririki ngkae kam ribaaki b'a kam na aki ununiki ma n tai iai.

²¹N na taraia raoi b'a kam na taiia ae e tau i nanon te kaonoua n ririki i bukin tenua te ririki.

²²N te kawanua n ririki kam na marike man are kam taiia man te kaonoua n ririki, ao n te karuaiwa n ririki kam na am'arake man ake kam uniki ma n taiia man te kawanua n ririki.

²³Akea te aba ae na kabooaki ni karekeaki raoi, ke ni kabooaki nako raoi. Abau ni kabane, tiaki abami, b'a kam ti maeka iai i nanon te tai ae e uarereke.

²⁴Ngkana e na kaboonakoaki te aba, ao e riai n anganaki moa te tia b'aib'ai ni koaua iai b'a e na kabooa.

²⁵Ngkana iai i buakomi Iteraera ae e maiu ni kainano ae e kairoroaki b'a e na kabooa nako abana, am koraki ni kaan ae na kabooa ni kaokia,

²⁶ti ngkana iai ana m'ane. Ao rimwi riki, ngkana e a reke am m'ane ae ko kona ni kaokia iai.

²⁷Ngkana e nang okiriko b'a ko nangi manga bon abanna, ao ko riai ni kab'aka nakon te aomata ane e mena i rouna ngkai abam anne, te m'aiti ae e na kaaitaraa m'aitin are e nang reke i rouna i m'ain rokon Ririkin te Iubire.

²⁸Ma ngkana akea am m'ane ae ko kona ni kab'aka iai te m'aiti ae e tau nakon te tia abaaba, ao ko na tataninga ni karokoa rokon Ririkin te Iubire.

²⁹Ngkana ko kabooa nako te auti ae e mena i nanon te kaawa ae e ooaki, ao bon ti teuana te ririki taina ae ko riai ni kabooa ni kaokia iai.

³⁰Ngkana e bane teuana te ririki ao ko aki kabooa ni kaokia, ao e a riki naba b'a ai bon ana auti ni koaua te aomata are e kabooa ngkoa, ao e na aki okiriko n Ririkin te Iubire.

³¹Ma te auti ae e mena i tinanikun te kaawa, e kona ni kabooaki ni kaokaki n te tai n aki akaaka kanga ai aron te tawaana. Ao e riai ni kaokaki nakon te aomata are bon abana ni koaua n Ririkin te Iubire.

³²Ngkana iai kanoan Rewi ae iai ana auti i nanon te kaawa ae ooaki, iai i rouna n taai nako te m'aaka ni kona ni kabooa ni kaokia.

³³Ao aia auti aika aki kabooaki ni kaokaki i rouia, a na kaokaki n Ririkin te Iubire, i bukina b'a bon aia b'ai ni koaua i buakoia Iteraera.

³⁴Akea taabo n uteute aika abaia kanoan Rewi ae e na kona ni kabooaki nako: bon abaia ni koaua.

³⁵Ngkana iai i buakomi aika a kainano aika aki kona ni kamaiuia i bon i rouia, kam riai ni buokiia, n ai aron ae kam riai ni buokiia iruwa aika a maeka i buakomi.

³⁶Tai karekeia b'a b'aai ni kareke raka n te aro are e na anaaki te bakao mai rouia, ke tao ni kabooa nako te am'arake nakoia ni karekea te raka iai.

³⁷Kam na aki tangira rakan te m'ane are kam anga b'a e na taarauaki irouia aomata nako aika a maiu ni kainano, n ikotaki naba ma te am'arake are a kang.

³⁸Uringnga, bon te UEA Ngai ae Atuami. I kamaiu ngkami mai Aikubita ao I anganingkami te aba are Kanaan, b'a I aonga n riki b'a Atuami.

³⁹Aongkoa iai tabeman i buakoia ami koraki aika rangi ni kainano n te aro are a nang kabooia nako nako imi b'a tooro.

⁴⁰Kam riai ni karikiia b'a taani m'akuri, ma tiaki tooro. N Ririkin te Iubire ao a na kainaomataaki,

⁴¹ma ngaia are, ngaiia ni ikotaki ma natiia a na oki nakoni mwengaia ma aia utu ao nakon naba aia b'ai.

⁴²I kairiia mai Aikubita b'a au taani m'akuri, ma a na aki kabooaki nako b'a tooro.

⁴³Ma ngaia are, ongotaeka i Rou, ao tai b'ainikiriniia aika a aki kaub'ai.

⁴⁴Ngkana kam kani karekeia ami toro, kabooia man reeti ake tabeua

⁴⁵ke mairouia iruwa akana a maeka n oin abami, ao karikiia b'a ami b'ai.

⁴⁶Kam kona ni b'ainiia, ao kam kona naba ni katikuia irouia natimi ngkana kam mate, ma tai toroniia oin ami aomata, ke tao ni b'ainikiriniia.

⁴⁷Ngkana tao iai i buakomi te Iteraera ae e rangi ni bati ana taarau n te aro ae nang kaboonakoa iai ngaia nakoia iruwa akana i aon abami,

⁴⁸e kona ni kainaomataaki iroun ana koraki, n aron tao teuane tarina, ke teuane m'anena,

⁴⁹ai tamana, ai m'anena, ai tarina, ke temanna riki ae kaain ana utu. Ma ngkana boni iai aia m'ane ae e tau m'aitina, ao e kona ni kabooa inaomatana iai.

⁵⁰E riai ni kaaitibooa ma te aomata are e kabooia ngkoa, ao a na wareki ririki ake e moani kabooaki iai, ao ni bairea raoi naba booia iai ni kaineti ma m'aitin te ririki are i m'ain Ririkin te Iubire are e na roko.

⁵¹Ngkana ai ti tabeua te ririki i m'ain Ririkin te Iubire, ao e na m'aiti naba boona ae na kaokia.

⁵²Maanin te tai boni m'aitin te m'ane ae na kab'aka.

⁵³Ao ngkana e riki b'a te toro irouia iruwa i aon oin abana, a na taraia ana aomata b'a e na aki buraakiakonaki.

⁵⁴Ngkana e a bon reke angan kainaomataakina man aanga aikai, ngaia ma natina a na kainaomataaki n Ririkin te Iubire.

⁵⁵Iteraera, boni Ngai te UEA ae Atuami, ao I kaotinakoingkami mai Aikubita b'a au taani m'akuri ni koaua.