Read Te B'aib'ara Nakoaia Ibonga 26 Bible Online

Nakoaia Ibonga 26 - Te B'aib'ara bible

Nakoaia Ibonga 26

¹E taku te UEA, “Boni Ngai te UEA ae Atuami. Ma ngaia are, tai karaoa ke n taromauria te bouannanti teuana ke katotoongan b'aai tabeua.

²Karinea te Taabati ao tabua te tabo are I taromauriaki iai, b'a boni Ngai te UEA.

³Kakaonimaki ongotaeka nakon au tua nako,

⁴ao N na kab'aka te karau n te aro b'a a na rikirake arokami ao ami kai nako a na kariki uaa.

⁵A na rangi ni bati ami uaa ake a uangingi ma ami kureebe ngkana kam taii, n te aro ae kam na aki ataa ae kam na karaoia iai. Kam na am'arake ao kam na rauaki, ao kam na maeka ma te kawakinaki raoi.

⁶N na kakab'aiaa abami ma te rau, ao kam na motirawa ma te aki maaku. N na oroi ni kanakoi man aika kawakawa aika a kaakang,

⁷ao N na kawakiningkami man aia buaka ami kairiribai,

⁸e aoria ngkana tii niiman ngkami ao tebubua ngaiia, ke tao tebubua ngkami ao ngaiia tebwina tengaa m'aitiia.

⁹N na karaoa te aeka n akoi aei nakoimi b'a a aonga n rikirake ni korakora ami botannaomata, ao N na kawakina naba au berita ma ngkami.

¹⁰A na taonako autin ami uaanikai ni uaa aika a uangingi ni katoa ririki.

¹¹N na maeka i buakomi ao N na aki manga taraingkami ma te riribai.

¹²N na nakonako ma ngkami—N na riki b'a Atuami, ao kam na riki b'a au aomata.

¹³Boni Ngai te UEA ae Atuami, ao I kamaiungkami mai Aikubita, b'a kam na aki manga riki b'a tooro. I a tia ni kainaomataingkami; ao ngkai kam nangi nakonako n tabeki atuumi.

¹⁴E taku te UEA, N na katuaaingkami ngkana kam aki ongotaeka nakon au tua.

¹⁵Ngkana kam rawa n ongo n au tua ma au Kaetieti nako, ao ngkana kam urui au boraraoi,

¹⁶N na katuuaingkami korakora, ao kam na uruaki. Kam na aoraki n te aoraki ae e aki kona ni katokaki, ao te biiua ae e na karika te matakii ma te rawaawata. A na kang uaan arokami ami kairiribai,

¹⁷ao N na tannako mai roumi, ao N na kariai ngkami b'a kam na kamaunaaki irouia taan eekinakoingkami. Ane kam na biritakaka n ongotaomi te bo ni buaka ngke bon tiaki te bo ni buaka.

¹⁸I mwina, ngkana kam bon teimatoa naba ni bonotaninga i Rou, ao N na katuaaingkami itiua te tai i bukin teuana ami bure,

¹⁹ni karokoa e baabane raoi ami kamoamoa ni kamanatuaaki. N na aki kab'aka te karau, ao e na riki karawa i aomi b'a kaanga te biti, ao te tano ane i aani waemi b'a kaanga te buraonti.

²⁰A na akea bonganan ami m'akuri korakora—ao a na akea naba ami uaa aika uangingi ma ami uaanikai ae kam na tai.

²¹Ngkana kam teimatoa n eekinakoai, ao N na katuaaingkami itiua te tai matoatoan aron kakatuaean ami bure.

²²N na kanakoi man aika kawakawa aika a kaakang b'a a na buakaningkami, a na kaniia natimi ma ami naa ni man aika kawakawa nako. Ma ngaia are, a na tii tabeman ami koraki n tiku n te aro ae e na aki bongana te kawai.

²³Ngkana kam teimatoa n riki b'a au kairiribai mai mwin ngkai,

²⁴ao N na teimatoa naba n riki b'a ami kairiribai n te aro ae korakora riki.

²⁵E na riki te buaka i bukina b'a kam urua ara boraraoi, ao ngkana kam biri nakon ami kaawa ake a oaki, ao N na katuaaingkami n te aoraki ae e korakora, ao kam na reke irouia ami kairiribai.

²⁶E na aki bati kanami, n te aro ae tengaun aine a na kam'ai kanaia n ti teuana te ainumuum. Ngkami n tatabemaningkami nako a na tii reke kanami taamruru, ao ane kam na baki.

²⁷I mwin aei ngkana kam boni kakaitaraa naba,

²⁸ao ikanne are I a boni karokoi naba ami bong i bukin ami bure.

²⁹Ao ni bon arona, ane kam na bon rangi ni kainano i bukin kanami n te aro ae kam na kaniia oin natimi.

³⁰N na urui ami auti n taromauri nako, N na urui ni kab'akai ami bao n angakarea i bukin te boiarara, ao N na katokai rab'atami ngkae a mate i aon nako ami bouannanti. Ao kam na riribaaki i Rou.

³¹N na kamaunai ami kaawa aika a uarereke ma ami auti nako n taromauri, ao N na aki manga kukurei ni boin nako ami karea.

³²E na rangi ni kananoanga abami n te aro ae ami kairiribai naba ake a maeka iai a na rangi ni kubanako ngkana a nooria.

³³Ngkana I a tia n urui ami kaawa nako aika a uarereke ma abami n te bo ni buaka, ao N na kamaenakoingkami i buakoia botannaomata.

³⁴Ao te aba e na kim'areirei n taabatin ana ririki ni kabane i nanon taai ake e wene iai ni kitanaki iroumi.

³⁵Ngkai buure ngkami n te aba ae kam ianena iai, ao oin abami a na kukurei mani motirawa, b'a e aki reke i rouia ngkoa ni katoa itiua te ririki ngke kam mena iai.

³⁶Ane kam na ruru ni maaku ni m'akaikain baan te aroka, kaanga te kabaang i abaia ami kairiribai.

³⁷Ao ane kam na mamaara ma n tatatata ao ni b'aka temanna i aon temanna, e ngae ngkana akea ae e kakioingkami.

³⁸A na bati i buakomi aika na mate n aaba aika a iruwa iai,

³⁹ao tabeman a na b'ara nanoia n te nanokawaki b'a boon ami bure ma aia bure ami bakatibu.

⁴⁰I mwiina, ao aongkoa kam a ataia ae I a eekinakoingkami ma n uotingkami nakon abaia ami kairiribai i bukin are ngkami ma ami bakatibu kam a tia n rangi ni kamatoaingkami ma ni bure nako Iu.

⁴¹Ngkana ko taekinna ma te nanorinano b'a ko a tia ni moana maiuakinan ae e eti,

⁴²N na kaawakina te berita are I a tia ni karaoia nakoia ami bakatibu ake Aberaam, Itaaka ao Iakob'a. N na kakab'aiaa abami,

⁴³ao N na kamotirawaa n te tai are kam mena iai n te aba n iruwa, ao kam na kab'aka boon aroaromi ni kakatei nako Iu ma au tua nako.

⁴⁴E aki akaaka b'a tera ae kam a tia ni karaoia, ma bon te UEA naba Ngai ae Atuami, ao N na bon aki manga katikui taekami, ke ni kairiribai ma ngkami i abaia ianena.

⁴⁵Ngke a mataku te botannaomata, ao I kamaiu ami bakatibu mai Aikubita b'a I aonga n riki b'a Atuaia. Eng, bon ami UEA Ngai, ao N na aki manga m'aninga ara boraraoi.

⁴⁶E mena Moote i aon te maunga are Tinai ngke e anganaki tuua ma reirei aikai iroun te UEA i bukiia Iteraera.