Read Te B'aib'ara Nakoaia Ibonga 7 Bible Online

Nakoaia Ibonga 7 - Te B'aib'ara bible

Nakoaia Ibonga 7

¹Aikai tuua i bukin te karea ni kabomwi, ake a rangi n tabu.

²E na riai n tiringaki te man i bukin te karea aei n iteran te baonikarea are mai meaang, ike a tiringaki iai maan i bukin te karea are te kab'anin, ao e na tataariaki iai iteran te baonikarea ake aua. [22]

³A na riai ni kanakoaki taian nenea aikai ni kareanaki i aon te baonikarea: nenean te buki, te nenea are e rabun taiani kanoannano,

⁴taiani kirine ao taian nenea ake i aoia, ao m'akoron te ato ake a raraoi.

⁵E na riai te ibonga n kabuoki taian nenea ni kabane i aon te baonikarea b'a te karea are te am'arake nakon te UEA. Bon te karea ni kabomwi.

⁶A na riai ni kanna m'aane ni kabane ake a nako man taian utu ni ibonga, ma e na riai ni kanaki n te tabo are tabu,[23] i bukina ngke e rangi n tabu.

⁷Iai te tua teuana ae e konaa ni kamanenaaki nakon te karea i bukin te karea i bukin te bure ao te karea ni kabomwi: bon te iriko ni man are aia b'ai ibonga are e karaoa te angakarea.

⁸E na anga te aba kunin te man are te karea ni kabuokaki [24] b'a ana b'ai te ibonga are karaoa te angakarea.

⁹Aia b'ai naba ibonga ake a karaoa te angakarea nakon te Atua, taiani karea are te uita [25] are e kam'aaki n te ainumuum, ke e katauraoaki n te baan n tintin.

¹⁰Ma taian karea are te uita ni kabane ake a tuai ni kuukanna, b'a e aoria ngkana e renganaki ma te oera ke e m'au, a b'ainaki irouia kaain Amora ni kabane ake taian ibonga ao e na riai n tib'aaki raoi i marenaia.

¹¹Aikai taiani kaetieti i bukin te karea n raoi [26] ake a kaotaki nakon te UEA.

¹²Ngkana arona b'a iai te m'aane ae e karaoa te karea aei b'a te karea ni kaaitau nakon te Atua, ao e na riai ni kaotia, n reitaki ma te man are e na kareanaki, te angab'ai are te kariki are e aki itinaki: e konaa n ae te kariki are e mmani ae e karaoaki man te buraawa ae e renganaki ma te oera, ke te berena ae e bururuaki aona n te oera, ke te keeke ae e karaoaki n te buraawa ae e renganaki ma b'aan te oriwa.

¹³N raonaki ma anne, e na riai naba n anga te kariki ae e karaoaki ma te iti.

¹⁴E na riai ni kaota teuana m'akoron te aekaki ni kariki nako b'a te karea ae e kaokoroaki i bukin te UEA; bon ana b'ai te ibonga are e anaa raraan te man ma n tatauriia iai te baonikarea.

¹⁵E na riai ni kanaki irikon te man n te bong n angakarea; bon akea nikirana teuana ae e na katukaki nakon te bong are i mwiina.

¹⁶Ngkana arona b'a e roko te aomata ma te karea n raoi b'a kakoroan nanon ana taeka ni bau, ke bon oin ana karea n anganano, a na aki kanaki ni kabane n te bong are e karaoaki iai te angakarea, ma ngkana iai nikirana a na manga kanaki nakon te bong are i mwiina.

¹⁷E na riai ni kabuokaki te am'arake are e tiku nakon te katenibong.

¹⁸Ngkana arona b'a e kanaki te am'arake n te katenibong, ao e na aki butim'aea ana karea te aomata anne te Atua. E na aki warekaki te karea anne b'a raoiroina, ma e na atongaki b'a kam'araana, ngkana iai ane e kanna, e na manga bon okiraki ni mwiina.

¹⁹Ngkana arona b'a e boo rab'atan te iriko ni man ma te b'ai teuana ae e kam'araa, e na riai n aki kanaki, ma e riai ni kabuokaki. E na kanaki te iriko ni man iroun temanna ae e aki kam'araa

²⁰ma ngkana e kanaki iroun te aomata ae e kam'araa, ao e na aki atongaki te aomata anne b'a ana Aomata te Atua.

²¹Ngkana arona b'a e kanaki naba te iriko ni man ae te karea aei i mwiin boona ma te b'ai teuana ae e kam'araa, tao b'ain rab'atan te aomata ke te man ae e kam'araa, ao e na aki atongaki te aomata anne b'a ana Aomata te Atua.

²²Aikai Tuua ake e anga te UEA nakon Moote

²³i bukiia Iteraera, Akea nenean te kao, te tiibu, ke te kooti ae na kanaki.

²⁴E na aki kanaki nenean te man aika kawakawa ae e mate i bon i rouna ke e tiringaki irouia mannikaakang, ma e konaa ni kabonganaaki i bukin te iango teuana.

²⁵E na aki atongaki b'a ana Aomata te Atua te aomata ane e kana nenean te man are e na kareanaki nakon te UEA b'a te karea are te am'arake.

²⁶N taabo nako ike a maeka iai Iteraera, a na aki roko n te kamanenaa raraan te mannikiba ke te man i bukin te am'arake.

²⁷Ane e urua te tua aei, e na aki atongaki b'a ana Aomata te Atua.

²⁸Aikai Tuua ake e anga te UEA nakoni Moote

²⁹i bukiia Iteraera: A riai aomata nako akana a anga karea n raoi n uota m'akorona b'a te b'aintangira ae e kaokoroaki nakon te UEA,

³⁰ao e na uoti n oin baina b'a te karea are te am'arake. E na riai ni uota nenean te man ma b'aab'aana ma n tabekiarake [27] b'a te karea are te b'aintangira ae kaokoroaki nakon te UEA.

³¹E na riai te ibonga ni kabuoka te nenea i aon te baonikarea, ma e na b'ainaki m'akorona are b'aab'aana irouia ibonga.

³²E na kanakoaki rangan te man are te angaatai b'a te buoka

³³nakon te ibonga are e anga raraan ao nenean te karea n raoi.

³⁴Bon te b'aintangira ae e onoti b'aab'aan te man, ao rangana te angaatai bon te buoka are E a tia n anaia te UEA mairouia Iteraera ma n anganiia ibonga. Aio te b'ai ae a riai Iteraera n anga nakoia ibonga n taai nako ni boong aika a na roko.

³⁵Anne m'akoron te am'arake are e anganaki te UEA are e anganaki Aaron ma natina m'aane n te bong are a katabuaki iai b'a ibonga.

³⁶E mwiokoia Iteraera te UEA n te bong arei b'a a na anganiia m'akoron te karea aei. Bon te tua ae a riai Iteraera n ongotaeka nako iai n taai nako ni boong aika a na roko.

³⁷Ao akanne tuua i bukin taiani karea ni kabuokaki, taiani karea are te uita, taiani karea ni kab'arabure, taiani karea ni kabomwi, taiani karea ni katabutabu, ao taian karea n raoi.

³⁸E anga tuua aikai te UEA nakon Moote i aon te Maunga are Tinai i nanon te rereua n te bong are e tuangiia iai Iteraera b'a a na moana karaoan karea aikai.