Read Te B'aib'ara Nakoaia Ibonga 9 Bible Online

Nakoaia Ibonga 9 - Te B'aib'ara bible

Nakoaia Ibonga 9

¹N te bong are e bane iai karaoakin te katabu, ao Moote e wetea Aaron ma natina m'aane ao taani kairiiri i aon Iteraera.

²E taku nakon Aaron, “Anaa te kao te ataei ao te tiibu te m'aane ae akea toabuakan rab'ataia ao anga nakon te UEA, te kaom'aane i bukin te karea ni kab'arabure [30] ao te tiibu m'aane i bukin te karea ni kabuokaki.

³Ao i mwiina, ko na tuangiia Iteraera b'a a na karaoa te kooti te aine i bukin te karea ni kab'arabure, ma te kao te ataei ae ai tib'a teuana ana ririki ni maiu, ao te tiibuteteei ae ai tib'a teuana naba ana ririki ni maiu ae akea toabuakan rab'atana b'a te karea ni kabuokaki,

⁴ao te kaom'aane ma te tiibu m'aane b'a te karea n raoi.[31] A na riai n anga b'a aia karea nakon te UEA n reitaki ma te karea are te uita[32] ae e renganaki ma b'aan te oriwa. A na riai ni karaoa aei i bukina b'a E na kaoti te UEA n te bong aei.”

⁵Ao a uoti nako matan te Um'antabunrianna b'aai ni kabane ake e tuangiia Moote, ao a bane n ikotaki Iteraera ni kabane ikekei b'a a na taromauria te UEA.

⁶E taku Moote, “E mwiokoingkami te UEA b'a kam na karaoi b'aai aikai ni kabane, b'a E aonga ni konaa ni kaota ootan mimitongina nako imi.”

⁷Ao i mwiina, e taku nakon Aaron, “Naako nakon te baonikarea ao anga te karea ni kab'arabure ao te karea ni kabuokaki i bukin kab'araan aia bure aomata. Ko na kaoti taiani karea aikai b'a kab'araan aia bure aomata, n aron ana taeka te UEA.”

⁸Ao e nakon Aaron nakon te baonikarea ao e tiringa te kaom'aane ae te ataei i bukin te karea ni kab'arabure bon i bukina.

⁹A uota te raraa natina m'aane nako ina, ao e kateboa tabonibaina iai, ao e kararaei koron te baonikarea ake aua, ao e kab'aroa nikirana i aon te baonikarea.

¹⁰Ao i mwiina, e kabuoka te nenea, te kirine, ao m'akoron te ato ake a raraoi i aon te baonikarea, n aron ana Mwioko te UEA nakon Moote.

¹¹Ma e kabuoka te iriko ni man i tinanikun te maeka.

¹²E tiringa te man are te karea ni kabuokaki bon i bukina. Ao natina m'aane a uota nako ina te raraa, ao e taatara iai iteran te baonikarea ake aua.

¹³A manga anganna m'akoron atuun te man are teuana, ao e kabuoki i aon te baonikarea.

¹⁴Ao i mwiina, e kaitiaki taiani kanoannano ao rangan te man ake mai buki ao e kabuoki i aon te baonikarea ni katokai i aon taiani karea ni kabuokaki ake tabeua.

¹⁵I mwiin anne, ao e anga aia karea aomata. E anaa te kooti are e a kareanaki i bukin aia bure aomata, e tiringnga, ao e anga, n aron are e karaoia naba n te karea ni kab'arabure are bon i bukina.

¹⁶E uota naba te man i bukin karea ni kabuokaki ao e anga ni kaineti ma taian tua.

¹⁷E kaota te karea are te uita ao e anaa te abutana te buraawa ao e kabuokia i aon te baonikarea. (Aio are raon te karea ni katoa bong.)

¹⁸E tiringa te kaom'aane ao te tiibu te m'aane b'a te karea n raoi i bukiia aomata. Ao a uota te raraa natina m'aane nako ina, ao e tataara iai iteran te baonikarea ake aua.

¹⁹Ao Aaron e kaaki m'akoron te kaom'aane ma te tiibu m'aane ake a nenea

²⁰i aon b'aab'aan taiani man ao e uoti ni kabane nakon te baonikarea. E kabuoka te nenea i aon te baonikarea

²¹ao e kaoti taian b'aab'aa ao rangan te man ake mai buki b'a te b'aintangira ae e kaokoroaki nakon te UEA i bukiia ibonga, n aron ana mwioko Moote.

²²Ao ngke e a tia ni bane ana karea Aaron ni kabane, e tabeki baina i aoia aomata ao e kakab'aiaia, ao i mwiina, e ruorikaaki man te baonikarea ike e angakarea iai.

²³Ao a kaai n nako Moote ma Aaron nakon ana Um'antabunrianna te UEA ae e meemena iai, ao ngke a otinako, a kakab'aiaia aomata, ao e kaoti ootan mimitongin rokon te UEA nakoia aomata ni kabane.

²⁴Ao E kanakoa te ai te UEA n te tai ae e karina, ao e kamannangii karea ni kabuokaki ma m'akoron te man ake a nenea ake i aon te baonikarea. Ao ngke a noora arei aomata, a bane n takaarua ao a bobaraaki ni kabo mataia ma aontano.