Read Te B'aib'ara Ieremia 1 Bible Online

Ieremia 1 - Te B'aib'ara bible

Ieremia 1

¹Arau bon Ieremia. Bon te ibonga ngai, ao tamau bon Irekia ao a bane kaain au utu n nako mai Anatota are n aban te baronga are Beniamin. Kanoan te boki aei bon taekan b'aai aika E taekin te UEA nako iu.

²E moana taetaena te UEA nako iu n ana katebwi ma tenua n ririki Iotia are natin Amon te mm'aane [1] n uea i aon Iuta,

³ ao E teimatoa n taetae nako iu i nanon ana tai n tautaeka natin Iotia are Ieoiakim te mm'aane. [2] Ana kabanea n taetae te UEA nako iu bon n te kanimaua n nam'akaina [3] n ana katebwi ma teuana n ririki Tetekia are natin Iotia te mm'aane n uea. Bon anne naba te tai are a uotaki nako iai kaain Ierutarem b'a taenikai.

⁴E taku te UEA:

⁵“Ieremia, bon Ngai am Tia Karikib'ai, I a kaman rineiko b'a ko na taetae ibuku nako ia taian botannaomata i m'aain bungiakim.”

⁶Ao I kaeka ni kaangai, “I babanga n taetae, te UEA ao I rangi ni uarereke.”

⁷Ao e taku te UEA, “Ko na tai taku b'a ko rangi ni uarereke. Ngkana I tuangko b'a ko na nako n taetae nakon temanna, ao ko na nako! Ao ngkana I tuangko te b'ai ae ko na taekinna, ao kona taekin b'aai nako aika I tuangko!

⁸I berita b'a N na mena iroum ao ni kaawakiniko, ma ngaia are, ko na aki maaku.”

⁹E kanakoa baina te UEA, ao e riinga wiiu ao e taku, “I anganiko taeka aika ko na taekin,

¹⁰ao I kanakoko ma te m'aaka ae tab'anin raoi n taetae nako ia botannaomata i buku. Ko na taekinna nako ia kabuanib'aia ao uruaia, ao manga teirakeia ao te manga kateitei.”

¹¹Ao te UEA, e kaota nako iu te b'ai teuana n te mii. Ao i mwiina E titirakinai ni kaangai, “Tera ae ko nooria, Ieremia?” Ao I kaeka ni kaangai, “M'aangan te kai ae te amon.”

¹²Ao e taku te UEA, “E eti anne. I moantaai [4] ni kakoroa nanon au berita.”

¹³Ao E kaoti b'aai tabeua ao e titirakinai ni kaangai, “Tera ae ko nooria ngkai?” Ao I kaeka, “I noora te b'aata n ran ae e buro i meang, ao e a kaan b'aroira.”

¹⁴E taku te UEA: N na kab'aroa te urub'ai i aon te aba ni kabane.

¹⁵Ko na mataku ngkana I weteia uea mai meang. Ane a na buaka ma n taua Ierutarem ao kaawa tabeua, ao i mwiina, a katei aia kaintokanuea ni mataroan nako Ierutarem.

¹⁶N na katuaaia au aomata, i bukina b'a a kaairua ngke a rairaki nako mairou n taromauri bouananti.

¹⁷Katauraoiko Ieremia! Naako tuangiia aomata te b'ai are I mwiokoiko b'a ko na taekinna. Ko na aki maakuia, b'a I kaawa ni kakamaakuko i mataia.

¹⁸E na kakorakorako m'aakau kaanga te nono ke taiani boua aika biiti ke te oo ae te buraonti. Ko na kaaitaraia kaain Iuta ni kabane, n reitaki ma ueana ao taani kairiiri, ibonga ao aomata.

¹⁹Ane a na buakaniko ma a na aki tokanikai. Bon aei au taeka Ngai ae te UEA A na bon aki konaa n tiringko.