Read Te B'aib'ara Ieremia 10 Bible Online

Ieremia 10 - Te B'aib'ara bible

Ieremia 10

¹E taku te UEA: Ongora i Rou, ngkami aika Iteraera. Kam na aki irii kateia botannaomata aika ianena aika a mamaaku ngkana a noora te b'ai teuana ae e kamimii ae e riki i karawa.

³Bon akea nanon aia aro! A koroi ni kab'akai taian aroka, ao a karaoi taian banna iai i bukin aia bouannanti,

⁴a kabiria n te tirewa ma te koora ao i mwiina a neeraia ni kamatoa b'a e aonga n aki b'aka.

⁵Bon ti te bo te bouannanti ma b'ain kakamaakaia maan. E bon aki konaa n taetae, ao e na bon ti uouotaki. b'a e aki konaa n nakonako. E aera ngkai e taromauriaki te bouannanti ae e aki konaa ni buobuokingkami ke ni kaikoakingkami?

⁶Ara UEA, ae E korakora ma ni m'aaka bon ti Ngkoe te Atua.

⁷Bon aia Uea botannaomata nako Ngkoe. A riai n taromauriiko aomata ni kabane. Bon akea riki te aomata ae e wanawana nakoim.

⁸Bon akea manenan taiani bouannanti, ao bon taian nanobaba aomata akana a taromauriia!

⁹A karaoaki taian bouannanti irouia aomata. E korobanna te kai te tia korobanna. E amana kooran Ubati ke te tirewa mai Taretiti te tia m'akuri n te biti b'a rabunana. Ao i mwiina, e kunnikaiaki te bouannanti n te kunnikai ae e buru ma ni beebo.

¹⁰Te UEA, bon ti Ngkoe te Atua ni koaua ae e maiu. Ko na tautaeka n taai nako. E m'aieie te aonnaba ngkana ko un, ao a mauna nako botannaomata.

¹¹Ko tuangai b'a n na taekinna b'a a aki karaoa taiani karawa ma aonnaba taian bouananti, ao Ko na kamaunai taiani bouananti Ngkoe ae te UEA.

¹²Ko karaoa te aonnaba ao ko taakin taiani karawa ni wanawanam ao m'aakam.

¹³A rurunga raan ake n taiani karawa n am taeka. Ko kabetirakei naang ko kanakoi taian ang man am autinib'ai ao ko karaoa te iti i nanon te karau.

¹⁴A rangi n nanobaba aomata aika a karaoi taian bouananti! A na b'ara nanoia i bukina b'a a bon aki maiu antiia ni kewe.

¹⁵Kaanga bon ti taian b'ai ni keekewe ao a na manga kamaunaaki ngkana e a roko te tai.

¹⁶Ko karaoi b'aai nako Ngkoe ae Atuaia Iteraera, ao ko rinea Iteraera b'a am b'ai ni koaua. Aram bon te UEA ae Moan te M'aaka.

¹⁷Ao I kaangai nako ia kaain Iuta, “Booti ami b'ai; kam a katobibiaki.

¹⁸E taku te UEA b'a e na uotingkami taiani kangaanga aikai nakon te kataenikaiaki, ao ane kam na karenakoaki man abami kaanga te atiibu are kanoan te bana.” [36]

¹⁹Ao a kaeka aomata ni kaangai, “Ti a ikoaki ao ti nang mate. E aera ngkai ti taekinna b'a ti aki konaa ni kaitaraa te maraki?

²⁰A uruaki mwengara; ao a mate natira. Bon akea nikiraia ake a na buokiira ni kakaaea kamanoara.”

²¹Ma I kaangai nako ia, “Bon taian nanobaba ara taani kairiiri i bukina b'a a rawa n ongo i roun te UEA. Ai ngaia ae ti a maae nako kaanga tiibu.

²²“E na ongo te aba karongoaan te urub'ai mai meaang ae kaanga ai aron te baa. Ao n te tai ae e aki maan, a na uruaki ara kaawa nako ao a na maeka iai taian tiakaore.” [37]

²³I ataia te UEA b'a ti aki tauu aron maiura ngaira aika aomata.

²⁴Ko na kaeta arou, n aron ae e bon riai ni karaoaki nako iu, ma ko na aki marakinnanoai, b'a I kaawa ni mate.

²⁵A rawa ara kairiribai n atongko b'a te Atua ke n taromauriiko. A a tia ni kamaunaia ara aomata ao a katuka ara botannaomata b'a te b'ai ae e wene n urubekebeke. Ma ngaia ae Ko na un irouia ao kakioia nako!