Read Te B'aib'ara Ieremia 11 Bible Online

Ieremia 11 - Te B'aib'ara bible

Ieremia 11

¹E tuangai te UEA ae te Atua b'a n na kaangai nako ia kaain Iuta ao Ierutarem: I kauringngkami Ngai ae te UEA b'a N na kamaraiaa ane e aki kaawakina te boraraoi are I karaoia ngkoa ma Iteraera. Ma ngaia are kam riai ni kakauongo raoi nakon te b'ai ae I taekinna.

⁴E tuai man bitaki au babaaire man te tai are I kaotinako ia iai ami bakatibu mai Aikubita, te botannaomata ae kaanga ai aron te ura ae korakora are e karanaki iai te biti. I tuangiia ami bakatibu b'a ngkana a ongotaeka nakon Au tua, ao N na riki b'a Atuaia, ao ngaiia a na riki b'a Au aomata.

⁵Ao i mwiina, I karaoa te b'ai are I a tia ni berita iai ao I anganiia te aba ae moan te tamaroa, ae ngaia ae kam a maeka i aona ngkai. Ao I kaeka ni kaangai, “Eng te UEA. E boni koaua anne.”

⁶Ao i mwiin anne, e a manga tuangai te UEA b'a N na kaangai nako ia aomata ni kabane ake a mena i nanon kaawain Ierutarem ao i nanon kaawan nako Iuta: Kam na karaoa raoi nanon te boraraoi are I karaoia ngkoa ma ngkami.

⁷I a kaman tuangiia ami aomata man te tai are I kaotinakoa ami bakatibu mai Aikubita, b'a a na ongotaeka i Rou. Ma kam a tia n taningabono

⁸ngkami ma ami bakatibu. Kam a tia n rawa n ongo, ao kam onea mwiina ni karaoi b'aai aika a tangiri nanomi aika a onrake n te bure. Kam a tia n aki kaawakina te boraraoi are I a tia ni karaoia ma ngkami, ma ngaia ae N na kamarakingkami n taiani maraia ake a reke mai iai.

⁹E taku te UEA nako iu: Ieremia, a iaiangoa kam'aneau kaain Iuta ma Ierutarem.

¹⁰A a bon tia naba ni bure n aroia aia bakatibu, n aroia ngke a rairakinako mairou ao a manga taromauriia anti tabem'aang. E a tia te abanuea meang are Iteraera n urua te boraraoi are I karaoia ngkoa ma aia bakatibu, ao ngkai e a manga karaoa naba anne te abanuea maiaki are Iuta. [38]

¹¹Aio te b'ai ae baaireia b'a e na karaoia. N na karokoa te rawaawata i aoia kaain Iuta ao Ierutarem, ao e na akea ae e na reke birinakona. Ane a na buubutiai buokaia ma N na aki ongo aia tataro.

¹²Ao i mwiina, a na anga taiani karea nako ia anti tabem'aang ma ni kakaaea buokaia mairouia. A rangi ni m'aiti riki antiia kaain Iuta nakon aia kaawa,

¹³ao a m'aiti riki aia baonikarea i bukin B'aara nakon m'aitin kawain nanon te kaawa i Ierutarem. Ma a bon aki konaa ni kamaiuia kaain Iuta antiia aikai man te kabuanib'ai.

¹⁴Ieremia, ko na aki tataro i bukiia aomata aikai ke ni buubutiai kamaiuia. Ngkana ko buubutiai i bukiia ao N na bon aki kan ongo, ao N na bon aki naba kan ongo ngkana a tataro!

¹⁵Ao i mwiina, e tuangai te UEA b'a n na taetae ni kaangai nako ia kaain Iuta: Bon Au aomata ngkami aika kam rineaki, ma bon akea riaimi ni mena ikai i nanon au Tembora, ni karaoi m'akuri aika a buakaka. A na bon aki konaa ni kamanoingkami man taian kabuanib'ai ami karea akana kam anga nako iu, ma ngaia are, kam riai ni katoka karaoan ami bootaki. [39]

¹⁶N te tai teuana kam riki b'a te kai te kureebe ae e onrake n te uaa. Ma n te tai ae e aki maan ao N na kanako ia taani kakiriwe aika a kakarongoa b'a a na urui m'aangam ma ni kaurarakei n te ai.

¹⁷Bon te UEA Ngai ae Moan te M'aaka. Ngkami aika kaain Iuta bon te aroka ngkami ae I a tia n unikia, ma kam a tia ni kamaraka nanou ngke kam a manga anga karea nakon B'aara, n aron are a tia ni karaoia kaain te abanuea meaang. N na nang kouti ngkami mani waakami.

¹⁸Iai tabem'aang aomata ake a iangoa tiringau. Ti te bo ngai ma te tiibuteteei ae e kairaki nakon te tia tiri tiibu, bon akea te b'ai ae I ataia n aron te babaaire arei.

¹⁹Ma E tuangai te UEA b'a a tia n iaiangoa koreau ni kab'akaaki kaanga te aroka uaana ma b'aina ni kabane b'a e aonga n ae akea ae e na manga konaa ni manga ururingai riki.

²⁰I tataro nakon te UEA ni kaangai, “Te UEA ae Moan te M'aaka, Ko bon kaakaraoa ae e raoiroi, ao Ko atai iango ni kabane. Ma ngaia are, I onimakiniko b'a ko na buokai n irataangau.”

²¹Ao i mwiina, e taku te UEA: Ieremia, a taku tabeman m'anen Anatota [40] b'a a na tiringko, ngkana ko teimatoa n taetae i buku.

²²Ma N na katuaaia. Ane a na mate aia rorobuaka n ataei n te buaka, ao ane a na mate ni baki natiia.

²³Ao ngkana e tia ae N na karaoia, ao a na bon akea temanna man aia utu ae e na tiku ni maiu.