Read Te B'aib'ara Ieremia 14 Bible Online

Ieremia 14 - Te B'aib'ara bible

Ieremia 14

¹Ao ngke e maan te karau n aki b'ab'aka, ao E tuangai te UEA b'a n na kangai nako ia aomata:

²A tang Iuta ma Ierutarem ngke e a m'autakataka te aba.

³A kanako ia aia taani m'akuri taan tautaeka nakon taabo ike a kaawakinaki iai taian ran. Ma bon akea naba iai; ao a okirikaaki ma te b'arannano ao aia tiaeki aika bon akea naba kanoaia. [49]

⁴E a maan te tai ae e aki iai b'aka te karau, ao a aoraki taan ununiki ngke a matakuakina tabwenabwenan aon te aba i aon te tano ae m'auteretere.

⁵E bungia natina te ria i nanon te tawaana, ao i mwiina, e kiitana bunna are e tib'a bungiaki ao e nako ni kakaaea te uteute.

⁶A mataki taian ati ake a aki manana i bukin korakoran te mate ni baki. Ma ngaia are, a tei i aon taian tabuki ao a kaaneneboia te ang, ma aia kaantaninga b'a a na aroka boin te uteute ae e mawaawa.

⁷Tiaki mutiakiniko ao ti karaoi baika a rangi ni buakaka ma e riai b'a ti na katuaaeaki. Ma ngkana Ko kamaiura, te UEA, ao a na bane n noora korakoram aomata ni kabane.

⁸Bon ti Ngkoe ara kaantaninga; bon ti Ngkoe are ko konaa ni kamaiura ngkai. Ko buokiira n te bong teuana, ma Ko a manga aki n te bong are i mwiina.

⁹E koaua b'a e kakubanako te kabuanib'ai aei? Te tia buaka Ngkoe ae e kabaeaki baim? Ko rineira, ao e mena ikai am Tembora. Ko na aki kiitaniira!

¹⁰Au aomata, kam tangiria n tiotio nako, Bon akea naba ami keiaki ni kan kaaningkami ma Ngai. Ma ngaia are, N nang katinanikuingkami ngkai ma ni katuaaingkami i bukin ami bure. Bon aio au taeka Ngai ae te UEA.

¹¹E taku te UEA, “Ieremia, ko na aki buubutiai b'a N na buokiia aomata aikai.

¹²Ane a na bae n aki am'aam'arake[50] Ma ngkana a tangira buokaia, N na bon aki ongo, N aki butim'aai aia karea nako. Ao N na onea mwiin anne ni karokoa te buaka, te baki, ao te aoraki are e na kamaunanako ia.”

¹³Ao I kaeka ni kaangai, “A teimatoa burabeti ake tekorakina n tuangiia aomata b'a ko na bon aki karokoa te baki ke te buaka, ma Ko na anganiira te raoi.”

¹⁴Ao E kaeka te UEA ni kaangai: A taku b'a a taetae i buku, ma a kewe! I bon aki taetae naba nako ia teutana, ao I bon aki rineia b'a au burabeti. A taetae ma ni miia aika akea manenaia, ao taeka ni kaiwa aika akea manenaia, ao oin aia iango.

¹⁵A taku burabeti ni kewe aikai b'a e na reke te rau ma te am'arake ae e m'aiti. Ma I tuangngkami b'a bon burabeti naba aikai aika a na mate n te buaka ao te baki.

¹⁶Ao akana a ongo irouia a na mate naba, n aron are e bon riai b'a e na reke nako ia. A na karenakoaki rab'ataia nako nanon kawain nuukan te kaawa i Ierutarem, i bukina b'a a na mate naba aia utu, ao a na akea ae e na tiku ni maiu, are e na tauniia.[51]

¹⁷Ieremia, naako tuangiia aomata am namakin i aon te b'ai aei. Ma ngaia are, I tuangiia ni kaangai: “E na taonako rannimatau n te ngaina ma te bong, i bukina b'a a mate au botannaomata n te ikoaki ae e korakora.

¹⁸I noora rab'ataia aika a mate n te buaka i nanon taian tawaana. Ao I nooria aika a mate ni baki i nanon taiani kaawa, ma a bon waaki aia m'akuri taian burabeti ma ibonga, n aki ataa te b'ai ae e a tia n riki.”

¹⁹Te UEA, Ko a katinanikua Iuta? Ko a ribaa Ierutarem? E aera ngkai ko orea rikaaki Iuta: n te ikoaki ae moan te korakora? Ti a kaman kakantaningaa te rau ao te tai ni kamaiu, ma bon akea te b'ai ae ti karekea b'a ti te b'ai ae e kakamaaku.

²⁰Ti a tia ni bure nakoim ma ara bakatibu.

²¹Ngkana Ko kamaiura, ao ane e na kaota aron korakoram. Ko na aki kariaia am kairiribai b'a e na kam'araea am Tembora, are Am kaintokanuea ae e tamaroa. Ko na aki m'aninga are Ko a tia ni berita b'a Ko na kamaiura.

²²A aki konaa ni karokoa te karau taian bouannanti, ao a aki konaa ni b'aka tamruru ni karau i bon irouia. Bon ti Ngkoe ae Ko konaa n taua aron te karau, ma ngaia are, ti katikui ara onimaki iroum, Ngkoe ae te UEA ae Atuara.