Read Te B'aib'ara Ieremia 15 Bible Online

Ieremia 15 - Te B'aib'ara bible

Ieremia 15

¹E taku te UEA nako iu: Ngkana arona b'a a mena ikai Moote ma Tamuera, ma n tataro i bukimi, ao N na bon aki bita naba nanou. Ma ngaia are, N na kanako ia kaain Iuta.

²Ao i mwiina, a na titiraki b'a a na kanakoaki nakea, ao tuangiia Au taeka Ngai ae te UEA ae e kaangai: Tabeman maibuakomi a na mate n te aoraki ae e kamaamate. Ao tabeman, a na mate n te buaka ke n te baki. Ao nikiraia ana uotaki nako abaia ianena.

³N na katuaaingkami ni kawai aika aua aika a kakaokoro. Ane kam na mate n te buaka ao a na katitikaki nako rab'atami irouia kamea, a na kanaki irikomi irouia mannikiba, ao a na kam'akeruaki riimi irouia maan aika a aki manana.

⁴E na riki te rekenikai aei i bukin b'aai aika a buakaka [52] ake e karaoi ami uea are Manate [53] Ao kam na ribaaki irouia botannaomata ni kabane.

⁵Kaain Ierutarem, antai ae e na nanoangaingkami? Iai ae e na titirakiningkami b'a kam uara?

⁶Au aomata, kam a tia ni katukai ma ni kitanai. I a kua ni kaotan te akoi. ao bon anne bukina ngkai N na tiringkami

⁷ma ni kamaenakoingkami kaanga te uteute ae e ukaki nako n te ang. N na katuaaingkami n te nanokawaki ao te mate i bukina ngkai kam rawa ni biti aromi.

⁸A m'aiti riki aine aika a mate buuia i aon Iuta nakon tanon te bike. E na roko buakanakimi ae kamimii n te tawanou! Ao tiina i Ierutarem ana tang i bukiia natiia.

⁹E rawaawata nanon te tina ao e nikobuaka. A tia n onikaki ana bong aika a oota nakon te rootongitong i bukin mateia natina mm'aane aika a itiman. N na tiringiia ni kabane taian nikira ni maiu. Bon aei au taeka Ngai ae te UEA.

¹⁰Tera ngke I aki bungiaki! I aki toki n reke n te kangaanga ma kaain Iuta ni kabane. I aki taatangoa te m'ane ke n taarau. ma a bane ni kamaraiaai aomata nako n te aro ae ti te arona.

¹¹Ao E kaeka UEA ni kaangai, “I berita b'a N na kaawakiniko, ngkana e roko te kabuanib'ai, ao nako ia naba ami kairiribai ngkana a buubuti buokaia.” [54]

¹²Kaain Iuta, kam aki konaa ni konaia kairiribai aika a na buaka mai meang n aron ae kam aki konaa n urua te biti ae e renganaki ma te buraonti.

¹³N na anganiia ami b'ai ni kabane i bukina b'a kam a tia ni bure n taabo nako i aon abami.

¹⁴Bon te ai uniu ae e aki konaa n tiringaki, [55] Ma ngaia ae, N na karikingkami b'a aia toro ami kairiribai i abaia ianena. [56]

¹⁵Kam bon noora aron karawaawatakiu n taeka aika a kamaraki aika a aki toki n rooroko, ao I karaoi baikai ni kabane i bukim te UEA. Ko na aki taotaona nanom nako ia au kairiribai; Ko na irataangau nako ia i m'aain ae a tiringai.

¹⁶I rangi n ongotaeka, ngke Ko taetae nako iu, i bukina ngke bon Am b'ai ngai, te UEA ae Moan te M'aaka.

¹⁷I aki kaei bootaki ni kukurei ni kakukureiai iai. Ma I kaawakinai, i bukina ngke Ko a tia ni kaonai n unim.

¹⁸I ikoaki kaakaiaki ao e aki tootoki marakiu. Ko nang kab'araa nanou kaanga te raanga n ran ae e a m'auteretere i nanon tain te aumaiaki ae e kabuebue?

¹⁹Ao E taku te UEA nako iu: Ko na aki katoka taetaem kaanga te baba! N na karikiko riki b'a Au burabeti ngkana ko okirai ma n taetaekina au rongorongo. I taku b'a a na kariaia te b'ai ae ko taekinna kaain Iuta. Ma ko konaa ni kaaitarai aia m'akuri nako aika a kamaraki,

²⁰i bukina b'a I kakorakorako, kaanga te oo te buraonti. A buakaka ao a tiritiri, ma N na mena i rarikim ikekei ni kamaiuko

²¹ngkana a buakaniko. Bon aei au taeka Ngai ae te UEA.