Read Te B'aib'ara Ieremia 17 Bible Online

Ieremia 17 - Te B'aib'ara bible

Ieremia 17

¹Kaain Iuta, a aki konaa ni kamaunaaki ami bure. A koreaki i nanomi kaanga taeka aika a koreaki n te unika i aon te atiibu ke nib'aaki i aon koonan taian baonikarea. [58]

²A a tia ni katei taian baonikarea ni beekan te roro teuana i mwiin te roro teuana ao a taromauriia te anti are Nei Atera n taabo nako i aon abami, i aon taian tabuki ao taiani maunga, ao i aan aroka aika a korakora.

³Ma ngaia are, N na anai ami b'ai ni kabane, n reitaki ma ami baonikarea nako, ma n anga ni kabane nako ia ami kairiribai. [59]

⁴E na bua [60] te aba are I anganingkami ao N na karikingkami b'a tooro i abaia ianena, i bukina ngkai kam a tia ni kakorakoraa uniu kaanga te ai ae e aki konaa n toki urana.

⁵I a tia Ngai ae te UEA ni kamaraiia koraki ake a tannako ma i Rou ma n onimakina korakoran te aomata.

⁶A na m'autakataka kaanga te aroka ae e mena n te rereua ae e taoro tanona, ike akea te b'ai ae e konaa ni maiu iai.

⁷Ma N na kakab'aiaia akana a onimakinai

⁸A na riki b'a kaanga taian aroka aika a maiu i rarikin te raanga n ran aroka aika a roko wakaaia n te ran ao baaia aika a mawaawa n taai nako. A katiinakoa te uaa ni katoa ririki ao a aki konaa n tare n te ran.

⁹Kam rangi ni kam'aam'ane ngkami aika kaain Iuta n te aro are kam a manga bon kananobabaingkami i bon iroumi, ao kam aki konaa ni bitaki.

¹⁰Ma I atai baika kam a tia ni karaoi ma ami iango ao I kakoaua raoi b'a e na reke nako imi te b'ai are kam bon kaantaningaia.

¹¹Kam karawaawataia tabem'aang, a na bane ni kiba nako b'aai ni kabane aika kam karekei, kaanga taiani mannikiba aika a raure man taian bunimoa aika a kimoaaki. Ao i mwiina, kam na ataia b'a ngaia kam rangi n nanobaba.

¹²Ara UEA, bon te kaintokanuea ae e mimitong am Tembora ae e tei i aon te maunga ngke e moan tia.

¹³Bon te koburake n ran Ngkoe ae e anganiia Iteraera te maiu ma te kaantaninga. Ma ngkana a aki kubara te b'ai ae Ko taekinna aomata ao a na kamaunaaki nako kaanga taian taeka aika a koreaki i aon te tano.

¹⁴Te UEA, boni Ngkoe ae I neboiko. Ma ngaia are, Ko na kamarurungai ma ni kamaiuai! Ao i mwiina, N na marurung raoi ma ni kaawakinaki raoi.

¹⁵A taku kaain Iuta nako iu, “Ieremia, ko taku b'a ko na tuangiira te b'ai are E taekinna te UEA. Ma e aera ngkai e tuai man koro bukina?”

¹⁶Ara UEA, Ko rineai b'a N na kaawakiniia Am aomata, ao bon anne te b'ai ae I a tia ni karaoia. Ko atai b'aai ni kabane aika I a tia n taekin, ao bon akea te tai teuana ae I butiiko iai b'a Ko na katuaaia iai.

¹⁷I onimakiniko i bukin te katantan i nanon tain te kangaanga, ma ngaia ae, Ko na aki kakamaakai.

¹⁸Ko na kaakea kab'akau ao b'ainrangiu, ma ko na kab'akaia au kairiribai ma ni kab'ainrangiia. Karokoa te urub'ai irouia b'a e aonga ni kororaoi bukin maakuia.

¹⁹E taku te UEA: “Ieremia, ni mataroan nako te kaawa ae Ierutarem, n reitaki naba ma are teuana are e kakabongana te uea,

²⁰ao taetae nako ia aomata ni kabane. Ko na tuangiia te b'ai ae I taekinna: Bon te UEA Ngai, ma ngaia ae, kam na kakauongo raoi.

²¹Ngkana kam kan kariki maiumi b'a b'aai aika a kakaawaki,

²²ao kam riai n aki karaoa te b'ai teuana n te Kaitibong.

²³Akea te b'ai teuana ae kam na uoti n rinnako i nanon mataroan te kaawa ke i nanon mataroan ami auti, ke n taabo nako.

²⁴Kam na tabua te bong ae te Kaitibong! I anga ngkoa te tua aei nako ia ami bakatibu, ma a taningamatoa ao a aki ongotaeka ke a rawa ni kaetaki. Ma ngkana kam ongotaeka,

²⁵ao ane e na tautaekanaki n taai nako Ierutarem ma Iuta irouia uea aika man kanoan Tawita. Ane a na rin man mataroan te kaawa aikai te uea ma ana mataniwi i aon taian aoti ke i aon taiani kaanibuaka, ao a na raonaki irouia kaain Iuta ma Ierutarem. Ane a na maeka n taai nako aomata i Ierutarem,

²⁶ao tekorakina a na roko ikai man kaawa aika a uarereke ake i rarikina nako, man kaawan nako Iuta ao Beniamin, [61] man te aba are tabukibuki ao aaba ake a rinano ake i maeao, ao man Rereuan Maiaki. Ane a na uoti taian karea b'a kakukureiau ao i bukin kaaitauau, [62] ao ai uana naba ma taian angab'ai ake te uita ao te b'ai ni kaboiarara.

²⁷Ma ngkana kam teimatoa n uouoti b'aai i nanon mataroan te kaawa akanne n te Kaitibong ao n teimatoa n karaoia b'a te bong n aki akaaka, ao N na kaurai taian mataroa aikai ma ni kab'aka te kaawa, n reitaki ma nonona nako.