Read Te B'aib'ara Ieremia 18 Bible Online

Ieremia 18 - Te B'aib'ara bible

Ieremia 18

¹E taku te UEA nako iu,

²“Ko na nakon titoan te kaatiibu, ao ngkana ko roko ikekei, N na tuangko te b'ai ae ko na taekinna nako ia aomata.”

³Ao I nako ikekei ao I noora te tia karao kaatiibu b'a e tabe ni karaoa te b'aata ae e uarereke i aon ana wiira ni karao kaatibu.

⁴Ao ngkana e aki roko te kaatibu n te tamnei are e tangiria, ao e konaa ni manga urua teina nakon te tamnei teuana.

⁵E tuangai te UEA b'a N na kaangai:

⁶Kaain Iteraera, iai m'aakau Ngai ae te UEA i aomi, kaanga te tia karao kaatiibu ae iai m'aakana i aon ana kaatibu.

⁷Ngkana I karawawataa te botannaomata ae e buakaka ni koutiia nako ma ni kamaaenikunna,

⁸ao e a manga rairaki te botannaomata anne man te buakaka, ao N na bita nanou.

⁹Ngkana I berita b'a N na kakorakoraa te botannaomata,

¹⁰ma ngkana e a manga moana aki ongotaekana nako iu ma ni karaoa te buakaka, ao ane N na manga bita nanou ao N na aki manga oki ni buokiia.

¹¹Ma ngaia are, kam na ongo irou, ngkami aika kaain Iuta ao Ierutarem! I a tia n iangoia b'a N na oroingkami n te kabuanib'ai, ao N na aki manga bita nanou ni karokoa kam katoka ami bure ma ni moana maiumi ae e raoiroi.

¹²Ma I ataia b'a kam aki ongo. Ao kam na bon kaangai naba, “Ti aki tabe ma te b'ai ae Ko taekinna. Ti a tia n iangoia b'a ti na karaoa te bure, ao ti taningamatoa ma ni karaoa te b'ai ae ti bon tangiria!”

¹³Ma ngaia are, I tuangkami Ngai ae te UEA b'a kam na titirakiniia botannaomata nako, b'a a tia n ongongo karaoan te bure ae moan te kakamaaku n aron ae kam a tia ni karaoia ke a tuai.

¹⁴E a tia n rannako te tinoo are i aon maungan Reb'anon, ao a aki konaa ni m'autakataka taian karaanga n ran ikekei. [63]

¹⁵Ma kam a tia n rairaki nako mairou ngkami Au aomata ngke kam kabuoki taian b'ai ni kaboiarara nako ia bouannanti aika akea manenaia. Kam a tia ni kiitana te kawai nikawai ma n ira te kawai ae e aki ataaki ike a na toki waemi iai n taian bouannanti.

¹⁶Ane e na uruaki abami, ao a na bane akana ri rarikina n taraia ma te maaku ma ni katoutou atuuia.

¹⁷N na kamaenakoingkami kaanga bubun aontano ae e ukaki nako n angin mainiku, ngkana a buakaningkami ami kairiribai. Ao i mwiina, N na anga nuukau nako imi i nanon bongin te kabuanib'ai anne.

¹⁸A taku aomata tabeman, “Ti a katiaa taekan Ieremia! Bon iai ibonga n taai nako ike a konaa n reireiniira ana Tua te Atua, ao ai uana naba ma aomata ake a rabakau b'a a konaa n anganiira taeka n reirei, ao burabeti b'a a konaa n anganiira ana rongorongo te UEA. Ma ngaia are, ti na aki manga ongo i roun Ieremia, ma ti na bukinna n te bure.”

¹⁹Taiaoka te UEA, kaekaa au tataro. Katokiia au kairiribai man kabuakakaau.

²⁰I kataia ni buokiia, ma a manga kabooa mwiina ni kena te m'anono ni kam'ane i buku. I bon butiiko naba b'a Ko na aki katuaaia.

²¹Ma ngkai I a butiko b'a Ko na kamateia natiia n te baki ke ni kamateia n te buaka. Kakeai buuia ma natiia mm'aane aine nako n te aoraki ao te tiritiri.

²²A a tia ni ken taian m'anono aomata aikai ma b'ainikam'ane i buku, te UEA. Karaoia b'a a na takaarua ni maaku ngkana Ko kanako ia taanga ni buaka b'a a na buakan mwengaia nako.

²³Ko ataia b'a a baairea aron tiringakiu. Ma ngaia are, Ko na un irouia ao Ko na katuaaia! Ko na aki manga kab'ara aia bure n aia bure aika a rangi ni kakamaaku.