Read Te B'aib'ara Ieremia 19 Bible Online

Ieremia 19 - Te B'aib'ara bible

Ieremia 19

¹E taku te UEA: Ieremia, ko na nako nakon titoan te kaatiibu ao ko na kabooa te riiti te kaatiibu. Ao kairiia unimm'aane ma ibonga aika kara

²nakon te M'arua are Innom, i tinanikun te Kaatiibu ae e Uruaki [64] Ao tuangiia aomata Au taeka aika a kaangai:

³Bon te UEA Ngai ae Moan te M'aaka, ae Atuan Iteraera, ao kam riai ni kakauongo raoi ngkami aika uean Iuta ma kaain Ierutarem. N na karokoa te kangaanga ae moan te korakora i aon te m'arua aei n te aro are a na tiaoki akana a ongo taekana.

⁴A a toki kaain Iuta man taromauriau ao a karika te m'arua aei b'a te tabo i bukin taromaurian B'aara ao anti tabem'aang aika a bon tuai man buokiia ke ni buokiia aia bakatibu ke aia uea.

⁵Ao a tia ni karaoa te tiriaomata ikai, ma ni kabuokiia natiia, ataei aika akea aia bure b'a aia karea nakon B'aara. I bon tuai n tuangkami b'a kam na karaoa te b'ai anne.

⁶Ma ngaia are, kam na taratara raoi! N te bong teuana ao e na aki manga aranaki te tabo aei b'a Tobeta ke te M'arua are Innom. E na aranaki b'a te M'arua n Tiritiri!

⁷Bon iai ami babaaire aika a rangi ni korakora ngkami aika kaain Iuta ma Ierutarem, ma N na urui [65] taian babaire akanne i nanon te m'arua aei. N na karaoia ami kairiribai b'a a na tiringkami, ao N na tuangiia taiani mannikiba ao maan aika a aki manana b'a a na kang rab'atami ngkana a mate.

⁸N na onika Ierutarem nakon te b'ariko ni m'akorokoro n atiibu, ao a na bane n tiaoki akana a rirarikina ma ni maaku ao a katoutoui atuiia.

⁹Ane e na bane te am'arake ngkana a tabe n iangoa uruan te oo ami kairiribai b'a a na tiringngkami. Ao e na rikirake bakimi n te aro are kam na bon kana irikoia raomi ni karokoa naba bon natimi.

¹⁰Ieremia, n te tai are ko taekina iai te b'ai aei, ko na urua te tiaeki ngkana a tabe n tarataraiko aomata.

¹¹Ko na tuangiia naba Au taeka ae: Bon te UEA Ngai ae Moan te M'aaka, ao I kauringngkami b'a N na urua Iuta ao Ierutarem n aron te tiaeki aei n te aro are e na aki konaa ni manga reke b'ainakina. Kam na tauniia ami mate ikai i Tobeta, ma angiia ma iroumi a na mate ao e na aki reke neia n taunaki.

¹²N na karaoa Ierutarem b'a te tabo ae e bareka kaanga Tobeta, ngkana I kaonrakea n rab'atami aika a mate. N na karaoa aei i bukina ngkai a tia ami uea n tam'arake nako taubukin ami auti

¹³ma ni kabuoka te b'ai ni kaboiarara nako ia taian itoi i karawa, b'a kaanga manga taian anti. Ao kam a tia n anga taiani karea aika te wain nako ia antiia ianena.

¹⁴Ao I nako Tobeta, ao I tuangiia aomata te b'ai are E taekinna te UEA. Ao i mwiina, I nako n rin ni katawanangin te Tembora ao I takaarua nako ia aomata ni kaangai,

¹⁵“Kakauongo aomata ni kabane! N taai tabeua aika a tia n nako, E kauringngkami te UEA ae Moan te M'aaka, ae Atuan Iteraera b'a E na karokoa te kabuanib'ai i aon Ierutarem ao kaawa ni kabane aika a uarereke akana a kaan i rarikina. Ma kam taningabono ao kam rawa n ongo. Ao ngkai E nang karokoa te kabuanib'ai te UEA are E a tia ni berita iai.”