Read Te B'aib'ara Ieremia 20 Bible Online

Ieremia 20 - Te B'aib'ara bible

Ieremia 20

¹Bon te ibonga ao te mataniwi i bukin tararuaan te Tembora Batura are natin Immera te mm'aane. E ongo au taeka,

²ai ngaia are e a oreai naba. [66] Ao i mwiina, e tua b'a N na katikaki ma ni kabaeaki n taian tiein [67] n te Mataroa are Beniamin i nanon ana Tembora te UEA.[68]

³N te bong are i mwiina, e a kainaomataai Batura, ao I tuangnga ana taeka te UEA: N na aki manga araniko b'a Batura, ma N nang araniko b'a Maakui B'aai Nako.[69]

⁴Ane ko na maaku, ao ko na manga kakamaakuia raom. Ane ko na nooria kairiribai aika a tiringaki n te buaka. Ao i mwina, N na karaoa uean B'aburon b'a e na anai aomata ni kabane mai Iuta b'a taenikai, e na tiringiia tabem'aang ao e na katikitikiia tabem'aang nako B'aburon.

⁵E na kaitiaka kaub'ain te uea ma n anai b'aai nako aika a kakaawaki mai Ierutarem.

⁶Batura, ko bure ni kewe ao n taekinna b'a taian rongorongo mairou. Ao anne bukina ngkai I kanakoa B'aburon b'a e na anaiko, ma am utu, ao raoraom b'a buure nako B'aburon, ike ko na bane ni mate iai ma n taunaki iai.

⁷Ko kam'aneai, te UEA, ao I bon riki b'a te nanobaba iai. Ko korakora riki nako iu, ao Ko a tia ni kataenikaiai. A aki toki aomata ni matanikakanikoai ao n taetae n aki akaaka nako iu.

⁸Ko a tia n kariaia b'a n na ti katanoataa te urub'ai ma te mate. Bon akea te b'ai ae e anganai am rongorongo b'a ti taetae n aki akaaka ao taiani kangaanga.

⁹N taai tabetai ao I taetae bon i nanou b'a N na aki manga oki n iangoiko te UEA, ke n atoatonga aram. Ma a ura am taeka i nanou ma riiu, ao I a aki konaa ni kainab'aabu.

¹⁰I ongo aia maningongoo aomata ae e kaangai, “A bane ni maaku aomata nako. Ara tai ngkai ni bukina Ieremia!” Akea te b'ai riki ae a karaoia raoraou ake I tataneiai ma ngaiia b'a ti tataningaan b'akau. A taku, “Tao e na bon konaa ni kam'aneaki Ieremia. Ao i mwiina, ti kab'aka ao e na booraoi arora ma ngaia rimwi.”

¹¹Ma bon te tautia ae e korakora Ngkoe te UEA, ae ko tei i rarikiu. Ane a na b'aka taani kakiriwe aikai ao a na mamaara a na rangi ni b'arananoia, ao e na akea tokin mamaaia.

¹²Te UEA ae Moan te M'aaka, Ko kataia akana a karaoa ae e raoiroi, ao Ko atai naano ao iango ni kabane. I a tia n tuangko ngurengureu nako, ngaia ae N na matakuakiniko ngkana Ko a irataangau nako ia au kairiribai nako.

¹³I anenea te nebonebo nako im te UEA. Ko kamaiuia aika a karawaawataaki mairouia aika a buakaka.

¹⁴Kamaraiaa te bong are I bungiaki iai! Ko na aki kakab'aia tinau.

¹⁵Ko na kamaraiaa te mm'aane are e kaangai nakon tamau “Te rongorongo ae e raoiroi! E a reke natim te mm'aane.”

¹⁶Ke e riki te mm'aane anne b'a kaanga aron taiani kaawa ake Ko kamaunai n akea te nanoanga teutana. Ke e ongo taian takaarua ni kakatauraoi n te moaningabong ao kakarongoaan te buaka n te tawanou.

¹⁷E riai ni mate i bukina ngke e aki tiringai i m'aain bungiakiu. Ao e na riki biroton tinau b'a ruanimateu.

¹⁸E aera ngke I bungiaki? Tiaki ti i bukin te kamarakaki ao ni mate ma te kakamamaaeaki?