Read Te B'aib'ara Ieremia 22 Bible Online

Ieremia 22 - Te B'aib'ara bible

Ieremia 22

¹E kanakoai te UEA b'a N na nako nakon ana bareti Uean Iuta b'a N na taetae nakon te uea, ma ana mataniwi ao aomata ni kabane ake a mena ikekei.

²E tuangai te UEA b'a N na kaangai: Bon te UEA Ngai ma ngaia ae kam na kakauongo raoi! Kam a tia ni kariaia aomata b'a a na kewe, ma ni kimoa, ao n aonikaia aine aika a tia ni mate buuia, ataei aika akea aia karo, ao iruwa aika a maiu ikai.

³A a tia n riki aomata aika akea aia bure b'a konan ami m'akuri n tiritiri, ao tabeman mai buakoia a tia n tiringaki. Ma I tuangkami ngkai b'a kam na karaoa ae e raoiroi ao ni kakoaua b'a e karaoaki te motiraoi. Kamaiuia aomata nako akana a karawaawataaki n te motibuaka.

⁴A na teimatoa n tautaekana Iuta ma te bareti aei uea man ana utu Tawita ngkana kam ongotaeka i Rou. Ane a na waaki n rin ao n otinako ngaiia ma aia mataniwi i aon aia aoti ke aia kaanibuaka.

⁵Ma ngkana kam aki katinanikuai, ao I berita ni bon arau b'a e na wene n uruaki te bareti aei.

⁶Kam na ongora nakon te b'ai ae I iangoia. Ti te bo mimitongin ana bareti uean Iuta ma Kireata ke taubukin Reb'anon are te kabanea n rietaata. Ma e na riki b'a kaanga te kaawa n anti ae akea kanoana ngkana I karaoa taekana.

⁷N na kanako ia taanga ni buaka b'a a na urubekeia, ao a na anaaki kaina ake taian tiira aika a tamaroa b'a taian aia.

⁸Ane a na ri rarikina aomatan botannaomata aika a kakaokoro ao a na titiraki ni kaangai, “E aera ngkai E karaoa aei te UEA nakon te kaawa ae e korakora ae Ierutarem?”

⁹Ao ane a na kaeka tabem'aang ni kaangai, “I bukina ngke a taromauriia antiia ianena aomata ma n urua aia boraraoi ma te UEA ae Atuaia are e a tia ni karaoia ngkoa ma ngaiia.”

¹⁰E a mate te Uea are Iotia, ma kam na aki tang i bukina. [74] Ma kam na tang i bukin natina te mm'aane are te Uea are Ioati [75] are e katikitikaki nakon te kaawa teuana, ao e aki manga oki.

¹¹E riki b'a te uea Ieoaati [76] i aon Iuta i mwiin maten tamana are te Uea are Ioati.

¹²Ma e a manga anaaki Ieoaati b'a te taenikai nako abaia ianena. Ao ngkai I berita Ngai ae te UEA b'a e na mate ikekei ao e na aki manga noora abana.

¹³Te Uea ae Ieoiakim,[77] ko a reke n te kaangaanga! Ko karaoa te bareti ae a rangi ni buubura ruuna ake i eta.

¹⁴Ko karaoi wintoona aika a buubura ao ni kamanenaa te kai te tiira b'a rabunan kain te winto ao ko beeniia n te uraura. Ma ko karaoa ae e raoiroi ao ko kairoroia taani kateitei b'a a na m'akuri n aki kabooaki.

¹⁵Ngkana ko kabatiaa te kai te tiira n am bareti e bon aki konaa ni karikiko naba b'a te uea ae e raoiroi riki nakon tamam are Iotia. E kakaraoa te raoiroi n taai nako e anga te motikitaeka ae eti nakon te aomata ae e kainano ao te aomata ngaia ae e raoiroi.

¹⁶Ao bon anne raoi nanona ae kam na ataai raoi. Ma ngaia are, e maiu raoi ao e teimatoa n reereke kanana ma nimana ae e tau.

¹⁷Ma ti te b'ai ae ko rangi n iaiangoia bon aron te kewe ke te kabuakaka ke tiringaia tabem'aang aika akea aia bure.

¹⁸Ieoiakim, bon akea temanna ae e na tang ngkana ko mate. A na bon aki rairaki n titiraki aomata ni kaangai, “E aera ngkai e konaa ni mate ara uea ae e kakannato?”

¹⁹Ko na taunaki n ai aron taunakin te aati; e na aeaeaki rab'atam nako tinanikun mataroan te kaawa ma n tewenakoaki i buakon te baareka. Bon aio au taeka Ngai ae te UEA.

²⁰Kaain Ierutarem, a a tia ni kamanatuaaki botannaomata nako ake ko onimakiniia. [78] Ko na nako Reb'anon n tang; taang n te aba are Batian ao i Moaba.

²¹I kauringko, i nanon taai aika a raoiroi. Ma ko katinanikuai, n aron are ko a tia ni karaoia naba ngkoa ngke e uarereke Iteraera.

²²Ngkai ko nang kab'ainrangaki i bukin am bure nako. A na kamaunaaki nako am taan kairiiri n te ang, ao botannaomata ake ko onimakiniia a nang kataenikaiaki ma ni katikitikaki nako abaia ianena.

²³A na mangoo n tang ma te maraki kaanga te aine ae e bung akana a maeka n te bareti ae e rabunaki wintoona n te tiira.[79]

²⁴Te Uea ae Ieoiakin, [80] are natin Ieoiakim [81] te mm'aane, e ngae ngkana ko rin i baiu b'a kaanga te m'am'a ae i baiu ae kanikinaean m'aakan te uea, ma N na bon buutiiko nako mai tabonibaiu.

²⁵N anga ngkoe nakon te kairiribai are ko maakua, nakon te Uea are Nebukaneta [82] ma ana taanga ni buaka, ake a tangiria n tiringko.

²⁶Ko kaai ni bungiaki ma tinam [83] i Iuta, ma N na karenakoingkami ni kauoman nako abaia ianena, ike kam na mate iai,

²⁷ma n tangitangira okiran mwengami.

²⁸Ieoiakin, ko aki tangiraki kaanga te b'aata te kaatiibu ae e a uruaki. Ma ngaia are, kam na tewenakoaki ngkoe ma natim nakon te aba ae ko tuai man ongongo ma ngkoa.

²⁹Aban Iuta, bon te UEA Ngai. Kakauongo ngkai nakon te b'ai ae I taekinna!

³⁰Kamaunaa araia natin nako Ieoiakin man te utu n uea. E a aki tau, ao akea naba temanna ae e na manga uea. Bon aio au taeka Ngai te UEA.